Nampi Kihinso Nadin

 NAMPI KIHINSO NADIN THUTAH THIPI NGAM LAMKAI INGAICHAUVE

                                                                                                    ~ Pr. Thangkhomang Suantak

                                                                                                            L. Semol | 14-02-2023

VANNOI khang thusim ho ivet leh nam jouse hin jalen na angaichat cheh  ahi. Nam khat in jalenna amutheina ding hin lamkai tamtah ahung kisep ji e. Hinlah thutah thingam a dinpi ngam lamkai ho jeh a nampin jalenna akimu ji ahidan thusim hoa akimu jin ahi. Hiche holah a chun Bible a kon in thusim  khatle ni minphah ute. 

1. David (I Sam. chapter 17-18): Jesse in chapa sagi aneiyin; Eliab, Abinadab, Shimea, Nethanel, Raddal, Ozem chuleh David ahiuve. David hi aneopen ahijeh leh sonlel umpen ahijehchun kelngoiching in apang in, insung a son umcheh a ute jouse chu Israel sepai (Saul lengpa sepai) in a pang uve. 

Hichephat laiya hi Philistine ten gal a ahin choujing u ahi. Philistine ten akison piu chu Goliathe milenpa, misang pa, mi thahat pa chu ahi. 

Alang khat a Israel sepai hochu Saul lengpa sepai mai maiya akigel jeh uchun thingam a Goliath kidintepi ngam aumtapouve. David vang hi Jesse chapa telah a sonlelpen hijong leh atohna a kitah jing ahi. Thutah thipingam ahijeh chun apan angansena kelngoi ho chu sahang hon ahin nokhum teng thi ding kicha lou va ana kidelpi jia kelngoi ho chu sahang hoa kon a ahuhdoh ji ahi. 

Nikhat aute Saul sepaiya pang ho anthah a ahung leh Philistine te galhangpan Israelte achou choujeng, chuleh Israel sepai ho koima hung potdoh ngamlouchu amutan, ama jong Goliath satding chun akigotai. Aman thutah athipingam chu ipiham? Philistine te chu cheptan lou ahiuvin Israelte vang cheptan sa ahi. Israel ten Goliath chu aletjeh le asan jeh a akichat u ahi, David in vang aletjeh chun kisepkhel ponte ati ahi. Hijehchun hiche Cheptanlou mipa hin Pathen mite hitin noise theipon te tia akipehdoh jeng chun Pathen in amang chan Israel sepai asang ajan akichat chu David in hahsalouvin athat tai. Hitihin David ama phatchomna ding kigellou chuleh athiding ahinding khoh sah louva thutah thingam a adinpi jeh in Israel te chu Philistine te khut a kon in ahudoh e. 

2. Babylon gam a Daniel loiho (Daniel bung 3): Babylon gam a Israel sohchang holah a chun Daniel le aloi mithum hojong apang uve. Pathen aginjeh un Pathen in chihna le thepna kidang apeuvin Babylon gamsung a vaipo holah a chun achingpen in apang uve. Hichu Babylon lengpa Inpi vaihom ho chu a engset jeh u chun lengpa chu aguh in athunun un Daniel le aloiho kipalna tei ding chun Dura phaiyah lengpa chu milim lentah atunsah un hichu Babylon gam pumpin bohkhup a chibai boh din thu apeh sah tai. Daniel loihon vang hiche milim chu bohkhup in chibai aboh tapouve. Hijehchun lengpan amaho chu akouvin thupeh ajuiloujeh un meilhum sung a lelut din agotauve. Hinlah David loiho chun, “ ..,.Vo lengpa…a lhacha a kapan u Pathen chun meilhum deojeju akon le nang lunghanna eihuhdoh nomule eihuh nauvinte. Amavang eihuhdoh hih u jong le napathen jong kahoulou diu sana milim doi natundoh masang a jong kaboh khup deh loudiu hi lengpan neihetpeh uvin,”(Dan.3:16-18) atin ahi. Hitia thiding ging louva thutah adinpi jeh un meiyin jong aka deh pouvin ama hojal chun Babylon gamsung ah Israel te chu jabol achang un ahi. 

3. Pu Dr. T .Lumkim: Amahi inam sung uva Pu Paokholet Singholpa chun Lucifer anatin, nam sung a lamkai tampin jong, “Pastor ahile Bible phaten kipoh hen Nam lamkai ahileh pistol kipoh hen,…” tia a eng eng a houva tha ding chan a gojing  jong I umda lou u ahi. Hinlah akhohtah khat chu a eng eng a houho leh achung a thilse gong jouse tuchan a adamnalai aumbeh seh tapoi. Amahi jile cha anei nung a lekhasim kipan hijong leh aman  agelkhoh pen chu ipiham? 

(1) Houbung thu: Bible hin ipi asei mong mong ham? Ipi jeh a Christian hohi kikhen thei ham? Aman amudoh chu Christa tahsan jal a chitin namtin Christian akisotah leh akiloikhomna diu chu aumsa Houbung ahijeng e tihi ahi. Ama phatchomna ding thu hilou Bible thu joh hangsan tah a asei ahijeh chun athusei hi adihpoi tia nel theiding ana umpoi. Ama phatchomna ding gelkhoh hilou Nampi le Houbung gelkhoh ahijeh in Pathen in amangchan, akhang akhang a Kukiten imanchah thei diuvin, (1) Hospital (2) Seminary (3) Nursing School (4) Administrative buildings  etc…alamdoh in ama mimal neigun hetthei ding a kilamdoh poi.

(2) Namthu: Naga gallaiyin thiding kicha louvin nampi min in ana ding jing in koima noise ina chang pouve. UN chan in namthu aga lhut e. Hitia Houbung le Nampi dia pan alah vang hin koima sumle pai ana kilah poi. Ama jeh a Kukite thusim UN lhung ahin, tun mi kimkhat in, “T. Lunkim in ajou jouvin Kukite UN ah akinepsah e,” tiloijong aum in ahi. Aman UN chan lampi agalhunlut ahibouvin, aban hi amatobang Nampi a dia thingam a pang hon anung ajuyidiu joh ahi. 

Thugeilhe

Tupet Kukite dinmun: Tupet Kukite dinmun hi mihon ima a eimulou pet, eihojong ima a ikimu lou pet u ahi. Mipin jong lamkaiho kitahsan lou lamkaihon jong mipi kitahsan lou, ikitahsan tolou pet u ahi. Lamkai le haosa inei sun hou jong a haosat hinau le lamkai ahinau jong Govt. a kon a phatchomna themkhat beh mutei ding tup atamjeh un Govt. masang a thutah dinpi sang a Govt. kiphat bolding kitamjodan a mipin amu ahitai. 

Hijehchun hitobang dinmun iphah laitah uhin, Nampi kihinso nadin David bang a, Daniel le aloi ho bang a chule Pu Dr. T. Lunkim, bang a ama chang phatchomna ding hollouva thutah hangsan tah a dinpi ngam a thipi ngam lamkai ingaichauve.

-:o(O)o:-

Share: