SITA RAM

Ram in Sita it, Sita in Ram sumte it!!

By: Pastor Thangdoulal Suantak

1Ti.6:10 …Dangka ngaihnatna pen gilou chinteng bulpi ahi a, hua pen khenkhat in a deihgoh ua, ginna a paimangsan uh, tualeh ama'uh leh ama'uh lungkhamna in a pumdim uh hi.

Ni danglai in tangval melhoi mahmah khat a om a, a min Ram a kichi hi. Amah pen a pianna nu leh pa'n a asihsan ziak un Hindu Temple a siampute khut ah mi hausa, company nei khat in a koih a, "Ka tanu Sita na kitenpih diing ahi. Aman na haksatnate ah hoihtak in a hung kem diing a, tuachi mahbang in nang zong amah hoihtak in na kem diing hi," a chi hi. 

Tualeh amah pen natna chituam mahmah khat nei ahihziak in siampute khut a kikhoi dam diing in a nusiata hi. Hun a hung pai zel a, ni khat hih mi hausa, company neipa a sita hi. Hibang ahihlai in a tanu Sita in, a pa sum maktaduai 75 lakkhiat a summeet bawlna tuam khat paipih a sawm hi.

Tuachiin a sum teng lakkhiat sawm in bank ah a vapai a, theihtawp suah a, a gen nung in bank officerpa in a kiang a sum lakkhiatna diing tuamtuam a gen nung in, ni khat thangpaitak in bank ah Sita a hung pai a, "Sum lakna diing a poimawh na chihte uh k'ung tawi kimta hi, hung pia un," a chi hi. Tuachiin bank officerpa'n hoihtak in a enchian a, tuachiin a kiang ah, "Hih pen Ram suai bek a lakkhiat theih diing ahihziak in bawlthei ka neikei uh hi," a chita hi. Hibang ahihlai mah in bial MLA-pa in Sita a na deihgawh hi. Sita zong summeet bawlna a lunglut ahihziak in hih bial MLA-pa tungtawn summeet bawlna diing a sum tamtak lakkhiat a sawm a, hilezong hih bial a MLA-pa a mi piltak ahihziak in, kha nih sung a kiang a giak a, kha nih sung a zi hi diing a, a suai kaihna diing lai khat bawlsa in a na koih hi. Hih lai a, Sita in a suai a kaih leh a sum deihzah a mu diing a, hilezong bial MLA-pa kiang a kha nih hun a zak ngai diing hi. Hilezong Sita in a sum deihzah a lak a, kha khat sung a, a meet tawh a ditkei leh a zi hi diing in a gen hi. Aziak pen kha khat sung a a pa account a sum maktaduai 75 lakkhiat a hua tawh dit diing chih a ngaihdan ahi. Hilezong ama ngaihdan in bangmah a paithei kei a, Ram lou a bangmah bawl theilou a suak hi. Hilezong Sita in Ram a musit mahmah hi.

Lamdang omlou ahihman in Ram valak a, bank a zawhpih a, sumte lakkhiat diing chihlouh ngaihdan a omthei nawnkei hi. Tuachiin temple a om Ram a vagukhia hi. Hibang a a hung pailai un mi giloute'n lamkaal ah a na suam uh a, tuachiin a hinna uh humbitna diing in mi zawngte teenkhawmna mun khat ah a hung kibuta uh hi. Hih mun pen ni danglai a Sita a project bawlna diing a, a deih ziak a, a mite a na gentheih bawlna mun ahi. Hih mite'n Ram pen mi hoihtak ahihdan a theih ziak un a na huh uh hi. Tuachiin a hung pengta uh hi.

Hichih hunlaitak in bial MLA-pa in Sita tung ah thubuai a bawl a, court ah, "Sita in ka thukhun uh bangmah in a hung simsak kei, thukhun dungzui a ka zi diing ahi, court in hung gelsak un," a chita hi. Hihbang ahihlai in Sita in gen diing a neikei a, ukil a zak diing nasan zong a muzou kei hi. Tuachiin Ram leh hih mi zawngte a pangkhawm ua, Sita a diing in court ah a ding ua, tualeh kha guk sung a Sita in a leiba a sukfel diing in court un thupukna a lata hi. Hih kha guk sung a bangmah a bawl theih kei leh bial MLA-pa zi a apan diing chihna tawh kibang ahi.

Tuachiang in Ram in a it Sita a diing in lemsalou sim kawmkawm in a sumte a lakkhiatsakta hi. Aziak pen aman Sita a it a, hilezong Sita in Ram saang in a sumte a itzaw hi. Hibang ahihlai in hua sumte lak ah Sita pa laigelh khat a om ua, hua lai ah, "Mite leh ka innkuante'n ka neihsa dan a a theih uh hih sunte pen company ka pat diing lai a, Ram pianna nu in a khamh (gold) khii sut a, a hung piakna tungtawn a, a meet kikholte ahih ziak in hih sumte a unpi a Ram sam ahi," chi in a kigelh hi.

Moral: Sita in a it taktak diing pen a it khak louh ziak in buaina tampi a na thuak hi. 

Sita in a it luh diing a it ziak a, a buainate:

1. Bial MLA-pa tawh a kal a thubuai leh a suai a a awkna.

2. Mi giloute'n thah a sawmna uh.

3. Bank a bawltheih neilou a buaina.

4. A muhsit mahmah mi zawngte khut a kipiak haksasakna buaina.

5. A meel hoihna hamphatpih sawmte ziak a buaina.

Sita in a it diing a ngaih diing diktak pen a na it in a na ngai leh hih 5te tawh a buaikei diing hi. Nang zong tulaitak a na it a, na ngaih theih mahmah diing, na haksatna zousiah pan a hung hundam a, na khelhna pan a zong hung hundam a, taangtawn hinna manphatak hung piatheipa Jesu Khrist, I Toupa Pasian na it theihkei leh leitung buaina mah ah Sita bang in na awk thei hi.

1Ti.6:10 …Dangka ngaihnatna pen gilou chinteng bulpi ahi a, hua pen khenkhat in a deihgoh ua, ginna a paimangsan uh, tualeh ama'uh leh ama'uh lungkhamna in a pumdim uh hi.

Share: