Saptuam leh Longpi (Church and Ship)

~ Rev. S. Thangnou

Sr Pastor, TBC (ABA), New Delhi

LAISIANGTHOU sunga Jonah laibu i sim sim chiang in, Jonah tanchin a kipan in Longpi (ship) leh Saptuam (Church) in hihna bangzah hiam tehkak thei ding in a om hi. Tuate saulou in tehkakna (comparision) i nei ding hi.

1. Leitung pumpi ah mitampi leh vangik tampi puak theihna omsun Longpi ahi. Saptuam sung ah zong minam tampi leh nna leh vai tuam tuam tampi a om hi.

2. Longpi in munkhat pan in khualzin a, tupna mun nei in a pai den hi. Saptuam zong leitung pan in vantung ngim in a pai hi.

3. Longpi a hawl/tawl om a, a kem leh nasem tuam tuam om chiat hi. Saptuam ah zong lamkai, upa, numei, khanglai a tuam tuam a om chiat hi.

4. Longpi tuipi tung ah pai a, lauhuai sethei in tuisung a tumthei, mangthei hi. Saptuam zong leitung ah om a, lauhuai in sethei, buaithei hi.

5. Longpi a pai lai a tuangte khat ginatlouhna hang in huihpi'n mut a, khawl hi. Saptuam sung ah zong khat zuau leh ginatlouhna hang in gimna buaina om thei hi.

6. Jonah hang in huihpi nung/laang in longpi tuisung ah tum dek dek a, van zousiah tuisung ah kipai hi. Saptuam sung ah lamkai khat hang in buaina leh supna lianpi tungthei hi.

7. Jonah ama deihna bang a apai ziak in longpi giksak in tuisung tum ding in om hi. Saptuam zong eimah deihdan a apai ziak in leitung ah tum khathei in om thei ding hi. Pasian deihna bang, a thu bang damna hizaw hi.

---11092022---

Share: