Railway a sepna leh eilawi ~ Mumung Tonsing

SORKAR ah nasepna i zong hehu sek ua, himahleh Railway lam pibawl zoulou deuh ihi di uam chih sim in om hi.

Sorkar a sepna hong kihong omzel dante et in Railway in semtu ding tamtak la gige uhi. Zone wise in kikhen zomah a, semtu ding lamun leh tam lazou pen ahi di uam chih lungsim ngaihtuahna hon piangsak hi. 

CDS INFOTECH a kipat khiak dek lai in Railway Recruitment Board NF Railway Chairman ka va mu a, exam centre poimoh ahih dan ka genpih hi. Aman, TCS te toh kihou un, amau sai sai dandan poilou ahi honchi hi. TCS te toh kihouna neih theih dandan in kinei zel... RRB a sem khat toh ka ki maikha ua, aman Delhi a Rail Bhawan ah gen lai din hon angvan zomah a, delhi a amah zin hun di hun remchang a la in Rail Bhawn tan ka nih un ka tung ngei uhi.

2019 kum a kalsuan na te phatuam hehu in kilang kei mahleh Pathian in poimoh asak hunhun in thil hon lemtuak sak a nikum a pat Lamka a railway exam om di chi in 2 vei jen railway authority ten hong pha mah le uh candidate tawm ziak in exam booking omsa hon cancel sak zel uhi. 

Tukum 2022 in railway exam om nawn di a chi ua, hon cancel nawn di un ka gingta hi. Himahleh lamdang tak in paisuak zenzen a Lamka khua ah amasa pen leh lamka khangthu a chiamteh tham khat hiding in kal masa in railway exam om thei ta hi. Ahih hang in, candidate  hongkuan te unau puansan silh te leh talpak te ahi ua, eilam mi om hetlou hi. Hiai in lungsim hon nuamlou sakzek hi.  Awareness lam taksap ziak hia or service lunglut  huai sa zoulou ihi uh hiam?

Edan khat a et in railway te performance a hoihlou a, a hoihlouh ziak mah in job insecure sim bang hi.  Privatization or PPP mode hitaleh,  govt in railway staff te thakhat a paivek lou hial ding un gintak huai. 

Job security lam buaipih sang mah in chinsawm masa phot peuhmah leng hoih mai lou di hia? Man lou a tul i guan sang in mat zoh nung in atuul ah guang zo leng.

---

Share: