KUKI REBELLION/KHONGZAI GAL

 Excerpt from the Book HISTORY OF MANIPUR by Late Pu Ngulkhohao Lhungdim 3 times MLA from Saikot Constituency 1974-1989 

(Part-1)

TU MASANG chun Meilhei holeh Naga hon Kukiho Khongzai tin ana heuvin, loikhat in Khongzai Lal or Kuki Rebellion chu Thadou War tipouvin mi phung min in khonung in abol uvin Thadou hikhalou galbol holoi dingin nommo maithei leovin akiseije. Chutichun Khongzai hohi galbolthem, galjou them,jankahleh gallou doithua galte khokim a ipiham kibol juija akilhim teng khosung a umho chun khohe juilou chutia chu a imut lahkah uleh jingkhovah thingjang vah chipchep phat don tahleh Khongzai holoi chun khosung chu jucha lon na alonjui uva mi aphil uva aneileh agou u ana kilahjui u ahin numei pasal chapang simsenlou ana tuh lih jui uva gallu anakipoh jui u ahin, adehin Tangkun hon ‘Khongzai hunding, hungin te, kanao kap kap hih in ‘ tia achateu lhepna a ana neijui uvin anakiseijin, Meilhei te leh Naga hon Eimi jouse chu Khongzai ahintiuvin, British teleh Bengali honvang kum 1780 vella pat  achu ‘Kuki’ or ‘Kuchi’ tia eina het u ahitan, tua Thadou kitiho hi kum 1965 ST/SC Modification List a aum jouva bou kihedoh ahin, Kukiho lah a phungbhah khatleh nibou ahop joubep ahin, kum 1956 a hung um doh ‘min’ khat chunk um 1917 vella miho anakikou nading chu historically something fantastic himei theijin akiseije.

Chukitleh mi loikhat in mijouse min ‘Khongzai’ kiti chu amaho phungmin dana ahin kilah uva modified form a ‘Khongzai’ ahin tiujong hi English ten distorted and form akisemdoh tailou ipidang hintem tia lahthei khat in aum kigon a ipichu hitaleh 1956 Tribe Modification List a jao khalou tichu Any Kuki Tribes lah a ana kiladoh ta, Tribe 29 holoi in anahop khahlou jeh a mijousen ama deilam lama aphunggol hou hopsoh dinga ahin boldoh dan uvin akimun ichan geija mipin adei dingdan, posterity in hin hilchen kit nauvinte. Mrs. Ethel St. Claire Grimwood injong 1891 kum chun alekhasut naho ah phate chan Kuki tin anasun in, Shakespear injong Kuki tin anasun in, chuti ahijeh chun World-II leh amasanga thilsoh jouse chu Thadou tia asut uvah hitam tihi adih adih lou mipin judge bol maijin tin ajehchu Thadou hung kihet nahi Official tahin SC/ST Modification Act, 1956 akipan bou ahije tihi koiman anelthei ding tahsan aumpoi achuti leh 1956 joulama gal leh tol aum tahleh Thadou History or Thadou War jong itithei u hintin 1956 kum masanga Eimite thusim hochu Kuki War or Kuki Rebellion or at least Khongzai War beh tin record bolleuhen galsat na anajao jouse chu jong hop intin, 1917 kuma Leiset Gallen kidouna umjouva Kukite haosahon British ten Labour Corps natongding mi 2000 ahol nauva anache nomlounau toh kilhon a alungdamlou houjeh a gal anabol uchu ‘Kuki War’ kitileh koiman No tiding in ginchat aumpon chulaija chu kamcheng a Khongzai ina hiuvah, suttho achu Kuki inahiu ahijeh in, tunung jongleh 1956 masanglai peh a thilsoh hochu 1956 joua minthah hotoh ikanbeh lou diu uhi mipi deepen khat ahiding ginchat aumlheh in ahije.

Amasa a kisei tobang chun Anglo Manipuri War April 1891 laija chujong Kuki haosa holoi chuleh Jubaraj khat hol a Sapkang te chu kihoutoh a nomang ding tichu amahon anagel pan u anahi tan, akhoh khat chu ahileh Chahsad tehi Manipur Lengte chungah ana lungdam hih uvin, Pu Nehlam hi ana philkhah jehuvin Chahsad te hin Sapkang tehi panhu nading lunggel ana neikha jui uvin, Kulachandra leh Tikendrajit in China gamma cheding atiu chun jong Chahsad leh Ukhrul, Burma gamkai Kuki hon Manipuri holoi tohgon chu anapom thei pouve anakitin ahije, Pu Nehlam Kuki Chief of Chahsad chu Imphal a ahung vale juileh Political Agent toh akimuto jui in Manipur lengpan aging motan, chutichun lampi ah ahung valena ah lengsepai hon aman uvin ahingin avun alip uvin Pu Nehlam pao louhel in athangtom behseh in paojong paolou kapjong kaplouvin athohin alaicha geijin alhisohpoi tin gollui thusim akimu jingin, Pu Nehlam kibolna hi Kuki te jouse dia thangtom umlou ahipoi.

Chutichun kum 1917 velchun Kuki/Khongzai haosa tampi anaum jongleh amin che doma ana kiseichu Aisanpa, Chengzapao, Jampipa Khotinthang Sitlhou, Chahsadpa Lhunkhomang Alias Pache, Laijangpa Tingtong Haokip, Lonpipa Pu. Ngulkhup, Thenjolpa Pu Enjakhup Khongsai, Khollhou, Loikhaipa Pu Semchung Haokip, Chongjangpa Pu Lunkholal Sitlhou, Gobohpa Pu Leokhothang Haokip, Loibolpa Pu. Heljason Haokip, Hengleppa Pakang Haokip hohi hausalen loilah a gal hangsan mi ana hiuvin, hausalen anahi vangin Songpi Semthong, Bollunmang in Britishte anakicha in imacha hansanna na anatong ngampoi akitie, Teising hausa Tongzalet Haokip in selmei asat vang in akile heikit in Sapte apanpijeh in Kukite history a dingin mihangsan dinmun ah kikoithei lou ding ahitai.

Kuki holoi in Gal bolding ativang uvin a tribal chanpiu Naga hon British te lam angai jing uvin, chutichun Labour Corps kiti French Galla konding chu kichejong leh kithi thouthou ding thina veve inmun ah kithileh ahijenge ti lunggel ahung umdohtan, Kuki Chief atamjon British te chu kidoupi ding, Sylhet leh Cachar gama kiphin holoi chutoh pan lah khomding tin Rajkumar chapate mikhat Chingtha Sanajaoba lamkai na in Manipur Maharaja chu nodoh ding Sapkangte chutoh nodoh thading ti tohgon jehin Chahsad haosa Pu Pache leh Pu Semchung, Loikhai hausapa in Ch. Sanajaoba chu guhthim in akimupi lhon in, Britishten French gama chedinga potpo ding mi akhop uchu Kuki ho jaulou nading hatah in angai touvin English miho komma chun Kuki honpot popou vinge atiuvin haosahon Political Agent chu akimu piuvin ngehna aneijuvin ahivangin Churachand singh lengpa chun Hill mi ho chu Naga hihen Kuki hileh sol teiding agon phat in Mombi leh Longja hausahon Political Agent lekha apeuvin Labour Corps ah Kukite pangpou vinge tin ngainom umlou tah in thumop apeuvin, chuphat in Capt. Coote leh Sepai 100 hon Mombi lam amanouvin inho jouse ahal uvin mivang athat sam pouve. Chuleh bol gimnei behsehlou nading thupeh amuphat uvin ni 10 jouvin sepai hochu Imphal ahung kileovin ahileh phat chomkhat jouvin December 1917 a kipat in Mombi a Kuki hero hon Manipur phaicham noilam ahin nokhum jinguvin, mihochu asuboi lheh uvin, Burma gama Chin Hills miho loi chun jong Manipur gam Kuki ho tohgon chu apanhu nomthim uvin, Chin Hills gama chujong Labour Corps gallaija natong ding mi ahinkou nauva chedingin sapten mi ahol uve tichu theida zehin gal asohkit uvin, chute chun Manipur valley 700 sq miles sunglah tailouse chu aboisoh tan, Kuki hausa jousen Open War tobangin kho khat leh khokhat thingkho leh malchan kholhang asam uvin, Britishte pichu joudinga kinemin gal anabol uvin ahije.

Kuki hon agalvon uchu chemjam leh tengcha ahipen in, meipum leh bongvun na kisem bomb pohkeh thei ho akipoh uvin, mun phabep ah songtum kolthang asem uvin mikhat in ngajui ding lampi kentong agenglai dunga galte ahung kikai phat uleh songtum bomb chu akisat tanleh miho chu achimden ding ti ahin, munt hum vellah kisuhsel in asat lhauvin English Sepai tampi athiuvin, Chin Kuki miho jong athikhauvin tin anakiseije. Britishten sepai/riflemen mi 3000 vel azang uvin Brig.General Macquoid lamkai na in Kuki hochu suhthip nading hatah in angaitouvin, Kuki ho chu nungchon deh louvin a amanouvin, Sapkangte doungal sat dingin agama gam ah kihouna aneijuvin sathin salung anekhom uvin,   Kuki hochu Bengal gama galbol hatho loi in atilkhou u himaithei ahilouleh German hon guhthima ana atil guh u hidingin Tammu vella lekha kithe ho amatdoh nauva chun Britishten ahedoh thei uvin ahije. Ajehchu Tammu vela Eimi ho loikhat in lekha milim jau akipoh uvin milim hochu German holim ajauvin, chujeh teidiuvin British ho chun Huns kiti German hon Kukiho chu ana tilkhou khah dinga agingmo lheh uve tin anakiseije.

Manipur Lengte leh Kuki ho kimatdan hojong aselheh tan, Anglo Kuki War a jauding chun Tikendrajit loijin Kuki Chief ho ahin tepleh phabep agajau vang uvin tichu Khongjangte noija se agajau uvin, Kuki Chief atamjon Chahsad hausalen Pu Nehlam Haokip Meilhei ten aphil uchu alung damthei pouvin, British ten Manipur bailam tah a ahinlon khum theinau chu hill area seah Sapte dalding koima cha anaumkha tahih uvin Naga hoc hula angaina a Angami ho tailou chu gal kisatpi dinga lungthim neibehseh ana hiloujeh uvin April 23 nin Manipur phaicham sechu Sapkangte noija aum dohtan, Hill area chu ahileh chamlhatna jatkhat aumjing jengin British ten jong khautah in aventup deh hihuvin, chutia agalvet hehu chu hikhat intin Labour Corps a solding tithu ah mi gama chedoh ding ngaplou na in Kuki hausa hon gal ahinbol uvin, French gal konda jeh sehseh chu jong ahideh pon, Christianity hung machal chujong Hill hausahon ana ngaithei pouve tin anakiseije.

British Govt. in thupeh ahinnei dungjui uvin Labour Corps kiti leilei, ponbuhson, thilpole dinga Manipur hill mi 2000 ahin thumu chu akichaijin, ahin thumbe kit uvin hichu Kuki haosaho chun ajahnom hihbeh uvin, hiche thuah Political Agent, J.C Higgins in I.B ah kikhopna asemin ahinlah Kuki Chief holoi ahungnom hih uvin, Kuki hausa loikhat adehin Songpi Semthong Haokip loijin Britishte anakichat jeh uvin French gala cooli dingin mi tampi anasol uvin Kuki hausa atamjon vang anasol nompouve. Chutichun German gama Sapkangte potpoa chea thisang in inmun ah kithijoleh aphajoi titoh gollhang hatlai ahijeh uvin akingaipiu nungah hon chelou dia alho utoh hausahon akilolna aneijutoh British te chu akichat lheh vang uvin kidoupi mai tahen tin panmun akisem uvin, British ten German gam a chejouse Meipum khat pehding in atep peh uvin kikhopna ah jukha adondiu ahinpohpeh uvin ahileh ‘Keihon meithal kaki somthei nauve’ atipeh uvin, German gam chu gammon mama ahin, gache leochun nalhung teng uelh Manipur gam ngaikit pouvin nate atiuleh nungah loikhat in Kuki gollhang holoi chug ache khauleh German numeihon hin kimat get uvinte tin achelou nadiuvin mang jat jat aseijuvin, Kuki Chief hon ‘Keiho Kuki hohi sakhonei kahiuvin, kithoi nading imaho umthei pontin. German gamah chethei pou vinge tin Sapte chu adonbut uvin, thempu umlouna gam ah gamlah a vuilouva kathidiu ahije tin anel kalpeh uvin, Kuki hon Milong hochu ana opkhum u ahijeh in Kuki gollhang naphal lou uleh Milong hobeh neipeuvin atikit uleh Milongho jong pethei pouvinge atikit uvin, Mr. J.C. Higgins chu alungdong lhehtan Kuki hausa ho chu Langva insah peh ding, meithal khatcheh pehding tiho jong anoplou phat uvin Sapte chun kidoupi chu aphatsah louvang uvin ‘open hostility’ chu ahitah jehin Calcutta ah Governor General kom ah report abollin, alungkhamna thuho chu aseijin, Naga ho vangchun thu angaina uvin Kuki hon vang Labour Corps a ami sol pou vinge tin adding det kheh tauve tin hetsahna apetai.

*******

*via WhatsApp*

Share: