Bang in i chi na hiam?

~ Rev. S. Thangnou

Senior Pastor, TBC (ABA) Delhi

Tulai khenkhat in Jesu I gintat I san nakleh chi na thei nawnlou, zawngthei nawnlou, genthei nawnlou in hau in dam ding chi uhi. Hinapi in a chite zong dam denlou in zatui mah toh ki-en veve hi. Zatui zang a damna pen Pasian deihna hizaw hi, a zang nuamlou a sih sa pen Pasian deihna hilou hi. 

Damlouna hang pen 

1. Taksa aom ihihman in: Khanglui lai in china luna khat a om chiang in, dawipeh, kaumat chi’n a tuamtuam ngoh ahi. Dactor ten natna hik nin leh nan ngoh hi. Khristian te'n Setan/Dawimangpa mohna chi hihang. Mihingte taksa om ihihman ana thei, asia thei, akiam thei gulh leh tang nei chi leh sa nei ihi uhi. Nekna, dawnna pan, huih apan, asianglou tampite nekha, dik kha ihiman in i china thei hi. Khovot leh kholum thuak zoulou in zona kina thei hi. 

2. Setan bawlsiat man in: Setan pen hung khempha, hung bawlsia ahihman in i nuntakna hung bawlsia tawntung hi. Launa ding natna, puktheihna, poitheihna, haina, sihna chihte a kipan a tuamtuam hung bawl sia hi. Toupa Jesu hunlai in dawi bawlsiat hangin a hawlkhiat sak, a damsak tampi om hi (Mk 9:14-27 & Lk 8:26-39).

3. Mohna dan thuakman in: Toupa a it a tate sat in thuhilh a chih bang in Pasian ta ihh zoh leh khelhna a bawl chaing in Toupa hung satna om hi (Heb 12:5-6). Pasian in chinat sakna toh mihing thu hilh a, a pumpi zousiah natna toh a kidimsak hi (Job 33:19). Khenkhatte a mauh khelhna hang in a chi uh na a, amohna hang un gimna a thuak uhi. Ahihhang Toupa i mohna zah zah hung thuk denloyu hi. Hung thuk hileh kuaman thuak zoulou ding hi (Sam 107:17). Toupa aw mohnate chiamteh le chin kuan thuak zou ding ahiam? (Sam 130:3).

Chinatna zousiah dawimangpa mohna hikhin samlou a Pasian min thanna leh Jesu min thanna kilatna zong om hi. John 11:4 "Hih chinatna in sihna ding ahikei hi, Pasian min thanna ding leh Pasian tapa min thanna kilatna ding hi," a chi hi. Lazer chinatna Pasian min thanna kilatna ding ahi. Chinatna khenkhat a chinate mahmah in Pasian a muh theihna ding, midang te'n Pasian a muhtheihna ding a natna zong om thei hi. Mittaw khat Juda te'n ama mohna hiam, anuleh pa mohna hiam? chi a adot chiang un, Jesu'n "kuamah mohna hang hilou in, Pasian min thanna ding hi," a chi hi. Tua ahihman in chinat chiang in nakpitak a i kithumsak ding thupi hi. Achinate ginna toh adamg bang in a deishak a pua mite ginna toh zong china te'n damna ngah thei mawk uhi (Lk 8:50, Mt 9:22, Jer 17:14). Simtute Toupa'n dam thupha hong pe chiat ta hen. 

--- 14082022 ---

Share: