PAITE TRIBE COUNCIL: PRESS COMMUNIQUE

June 6, 2022

Apaita April 30, 2022 ni a YMA Hall, Hmuia Veng, Lamka a Raja Goukhothang Guite Memorial Trust makaihna a Pu Raja Goukhothang' sih champha kum 150 chinna zatna hun ah, Pu Dr. R. Sanga in Pu Raja Goukhothang Guite, Meiteite mat leh thah hilou in, Britishte mat leh thah hizaw ahi chih hon gen hi. Tua ban ah Raja Goukhothang Guite, 150th Death Commemoration Committee in agelhthoh in Goukhothang pen Britishte khut a mat leh si ahi chi in Meitei Lengpa pia uhi. Tua toh kiton in, inam sung ah hiai toh kisai hamhaihna liantak hon tun a, tu phing a Britishte siattutna in mipite kiguihsak in lung-amsak mahmah hi.

Hiai toh kisai in Paite Tribe Council GHQs, Young Paite Association GHQs, Paite Academia Forum (PAF) leh Research & Preservation of the Zo Identities(RPZI) in kikup khawmna bangzahvei hiam akineih nung in Pu Raja Goukhothang Guite' sihna toh kisai - oral tradition leh colonial writings pansan in etchetna kinei hi. Huai dungzui a kimukhete anuai a bang ahi:-

1. Pu Raja Goukhothang Guite mantute Britishte hilou hi. The Lushai Expedition (1871-72) a kuan Manipur Contingentte Major General Nuthall makaih himah leh amaute ngaklou in, March 7, 1872 in ana pai masa hi. Nuthall pai nung in Chivu mun ah agiahphual uah Pu Raja Goukhothang Guite leh aheute vatung in Meitei Major nih - K. Balaram Singh leh Thangal makaihna nuai a zekhem a mat ahi uhi.

2. General Nuthall in Pu Raja Goukhothang Guite mat a om athu in lemsakpih mah leh amah tung a thunei Brouchier leh Edgar in pompihlou in mohpaih zawsop uhi. Huaiziak in, hiai tungtang ah Britishte kigolhkhakna omlou a, Britishte thah ahi chih pomtheih guih vual hilou hi.

3. Oral tradition leh lavuite a kipan Pu Raja Goukhothang Guite pen Chivu mun a mat ahihnung a Manipur Maharaja in suangkulh ah khum a, huaimun a si ahi chih kuapeuh theihdan leh nial vuallouh thudik ahi. Oral tradition leh colonial record kikalh hizawlou in kituak hizaw ahi.

4. Pu Raja Goukhothang Guite' sihnung in Meiteite tung ah atapa Sumkam thangpai petmah in phuba laksawm hi. Himahleh, Meitei Lengpa toh kihou (negotiate) thei in kilemna (treaty) nei thei uhi. Hiai tungtawn in Pu Raja Goukhothang Guite sihna toh kisai in Britishte genphakna ding omlou a, Meitei Lengpa khumlup mah a si ahihdan chiang mahmah hi.

5. Pu Raja Goukhothang Guite pen Freedom Fighter leh Martyr hi dan a gen pawl leng om hi. Himahleh, ahihnatak ah, amah Britishte dou dia kuan ahikei a, Meiteite dou dia kuan leng ahi samkei hi.

6. Pu Raja Goukhothang Guite 1872 in si a, asih nung kum 19 nung in Britishte'n 1891 in Manipur gam uk pan uhi.

Hiai bang a thudik leh pansan kichiantak khangthu nei himah leng, mahni hamphatna zonna leh mai-etna ziak a bulbal neilou a ikhangthu leh tanchin khek guih a hong om poi kisa mahmah hi. Ei sung kia hilou, Imphal pansan newspaper tuamtuamte a kisuahkhia leh namdangte'n apansan theih ding thugelh piakkhiak a om ahihman in poi kisa petmah hi.

Hiai bang thilhih leh thugen nei in inam leh gam maban sautak hetkha phetlou in 

khangthu bulbal neilou suah uh ahihman in akisaipihte'n tua bangte ana susiang pah ding in ikizasak uhi. Kuate hiam mai etna ziak a mimal leh pawlkhat in khangthu khek guih chikmah in kipomlou ding a, hiai toh kisai inam leh gam maban khaktu hong hih leh akisaipihte mohpuakna liauliau hi ding chih leng ipuang ahi.

Maban hun ah leng mimal leh pawl kuapeuhte ipilvan ua, gam leh nam, ban ah ikhangthu uh kimawlna a zanglou ding in ikitheisak uhi. Mimal leh pawl  tuamtuamte'n igam leh nam, khangthu toh kisaite ah ikampau leh kalsuan ding tan thei ding in ikizasak ua, khangthu khekna ding hial khop pilna leh siamna muthak/neithak ihih leh achetna toh Paite innpi PTC heutute kikuppih masa a mipite theisiam masasak ding in ikizasak uh ahi.

( V. VUNGZATHANG)

 Chairman, CWC

(THANGZAMUAN TOMBING)

  General Secretary

Share: