Medical College suankhiak sawm tungtang deihlouh thu taklang

Lamka 2022 June 15: Mata khua ah Rs 325 Crore beiding a Medical College kibawllel a mun suankhiak ding chih tawh kisai a thuthang tuamtuam om tawh kisai in, Mata Village Authority, Vaiphei Chief Association Haopi Range, Zomi Students Federation (ZSF) ghq, Zomi Chief Association (ZCA) ghq, Zomi Youth Association (ZYA) Ghq leh Zomi Mothers Association (ZMA) Ghq in Union Home Minister Amit Shah kiang tungding memorandum khat pia uhi. Hiai tawh kisai mah in tuni nitaklam dak 4 in tua Joint signatory te'n Lamka pansan Press-te kimuhpih in, thil omdan genkhiakna nei uhi. Huai hun ah Lallunkam, Chairman & chief Mata Village in a gendan in, December 27, 2020 in Union Home Minister Amit Shah in India ggamsung pumpi ah Virtual Mode a Medical College 79 a suangphumte lak ah CCpur District a ding in leng Mata khawkiang a medical College ding telkha chi a, tua Medical College mun ding leng Vungzamuan Valte leh a innkuante'n Medical College dia poimawh zah Acre 23 a lian himahleh gam leitang Acre 25 a thawn in pekhia uh chi hi. Himahleh tu naizek in Mata mun a Medical College omdia lemgelsa pen mundang ah omdia namphu a panlakna om ahihdan thu za in, Health Minister ngei in leng a guk a Survey bawlkhin ahihdan a zak ziak in, poisa in zan June 14, 2022 in Union Home Minister kiang tungding Memorandum pua uh chi hi. Govt in gin omtak a thupukna a laksa leh Work Order dungzui a Keystone Infra Project Limited in semta leh building khenkhat banah approach road leng bawlna zawh ahihnung a, a mun suan ding kichi pen Govt in omsak lou hamham ding in ngen a, tua ngetna a bawl uh ngaihsak ahihlouh a, thupukna Govt in a bawlsa khut lumlet mah hon batsak leh Joint Signatory te' chin leh ha suang a nang ding uh hi'n gen hi. Medical College tawh kisai in Land development ding in Mata khua leh a kim a khaw tuamtuam in nitha 3000 val seng a ana buaipih uh hita ahihdan gen in, area mipi'n ngaikhawk mahmah ding uh hi'n gen a, Medical College pen suankhiak ahihkei phot leh area mipite'n a theihtawp ua nasepna kithuahpih ding uh hi'n gen a, Govt in thupukna a laksa naupang bangmai a a tawpkik louh ding uh ahi chi hi. Joint Memorandum ah a taklat dan un,  gamsung a Medical College 75 bawlna ding a suangphum a omte lakah CCpur District leng a telkhak ziak in district mipite kipak mahmah uh chi a, state Govt in tua Medical College pen CCpur District Hospital pansan in College khat dinkhiak ding in thupukna la chi hi. Vungzamuan Valte s/o (L) VK Tawna in kipaltak a gam leitang Acres 25 a lian a piak ziak in, September 15, 2020 in State Cabinet in tua Medical College pen Mata khawkiang a gam piak a omna mun ah koihding lemsa uh chi a, tua gam thawh a om  pansan in State Govt in DPR bawl in, huaipen Ministry of Health Govt of India in lemsakpih chi hi. Zuihding tuamtuam omte zawhnung in Union Home Minister Amit Shah in December 27, 2020 in Virtual Mode tungtawn in suangphumna nei a, nasepna kingang theihna ding in state Govt in Medical College mun ding zotna NH-102B apan Approach Road pen a fund release pah uh chi hi. Medical College bawltu ding Tender sap nung in, construction work bangkim Keystone Infra Private Limited in semding in piak hi ua, amau tu in Land development tawh kisai a kimkhat val zouta in, campus sung ah structure khenkhat leng tungkheta uh chi hi. Tulel a State Govt in 100 Days Achievement om sung in tua District Hospital huang a College pen honkhiak sawm in class leng patpah sawm uh a, himahleh nasepna lamzangtak a a pailai in state govt in Mata khawkiang a Medical College omding pen a ziak asan omlou leh kisiamtanna bangmah omlou in K Mongjang Village ah suankhiak sawm  in kisa uh chi uhi. Manipur Medical Minister in June 11, 2022 a K mongjang mun a phak tawh kisai in lamdang sa uh ahihdan gen ua, Nation Projects khat govt in thupukna kichian a laknung a, mimal leh pawl khenkhat deihziak a suankhiak sawm a om mawk pen lamdang sa uh ahihdan gen in, tuhun a Mata khua apan K Mongjang ah Medical College suankhiak ahihleh mipite lungtang nasak ding a, ngaihtuahna hoihlou a piansak ding banah BJP vaihawmna hoihlou hidan in ngaihtuahna piangsak ding chi uhi. Huai ahihman in, hiai thu ah Union Home Minister Amit Shah kigolh a, buaina omlou a Mata khua a nasepna pailel sutzop ahih a zawh siang ahihma tan paisuak sak ding in ngen uhi. Hiai Memorandum ah Lallunkam, Chief of Mata; T Piangkhanpau, Secy VA Mata; Haulemlal, Chairman, Vaiphei Chief Assn Haopi Range; Henliankhup Secy Vaiphei Chief Assn Haopi Range; Nengzalian Tonsing, President ZSF Ghq; Samuel Taithul, Secy ZSF Ghq; Pumdou Thangsing, President ZCA Ghq; G Khamkhohau, Secy, ZCA Ghq; Biabiak Phiamphu, President ZYA Ghq; T Lianzalal, Secy ZYA Ghq; Chingngaihdon, President ZMA Ghq leh Elli Mawi, Secy, ZMA Ghq in suaikai uhi. Medical College tungtang ah January 27, 2020 in Director Health Services, Govt of Manipur tawh Doner lam apan Vungzamuan Valte in Deed of Gift bawl uh a, huai ah Hill Institute of Medical Scieces bawlna munding in a thawn in Acres 25 piak a om ahihdan taklat in om a, gam leitang piak a ompen kum 3 sung a a zatna ding a a kizat keileh Donor te kiang ah piakkik ding in suaikai uhi. Huainung March 20, 2020 in Amit Biswas, Under Secy Govt of India in Secretary, Dept of Medical education, Govt of Manipur a theihsakna ah Phase III a ding in Centrally Sponsored Scheme nuai ah Medical College thak ding in Manipur ah 1 piak a om ahihdan taklang a, huai ah Churachandpur a Meducal College ding in Approves Cost 325 crore hi a, Central Sare in 90 percent ah 292.50 Crore hiding a, State Share 10 percent ah 32.50 Crores hiding chih taklang hi.

Share: