FATHER'S DAY MESSAGE

✍️ Pi Bethelniang

Admin cum Treasurer, TULAI-HUILHI

Sunday | 19 June 2022

ANNA JARVIS kitinu chun 1908 kumma Mother's Day anaphudoh bangchun, *Sonora Louise Smart Dodd* kitinu chun 1910 kummin Father's Day ahinphutdoh kitnin, tunin amanu jallin vannoi gamtinna *Father's Day* kumsehleh muntinna loupitah in imangtheijing tauve. *Mrs. Dodd* kitinu hin bailamthetna ahinphudoh vang anahipoi. Amujouse komma anaseijin, koiman akhohsahpehlou jehchun analolhingpoi. Lamlen a amujouse komma anaseijin, mihochun anuisatbepseuvin ahi. Father's Day mansangin, "national fishing day" kimangjoleh gamchengin phachomjonte, tihopouvin anadonbut uvin ahi. Mrs. Dodd hi kum 16 ahichun apenna anun anadalha tai. Aman penpi sopi 5 aneije. Apa William Jackson Smart kitipahi Civil War veteran khat anahi. Pagong ahivangin achate 6 anakhoukhah jouvin ahi. Pathen thilgon dungjuijin, *Mrs  Dodd* lungtupchu ahungmolson, Spokane, Washington (USA) munna hungkiphutdoh pan tan ahi. Kumseh, June lhasung Sunday athumchanna hi Father's Day dinga phondoh ahitohlhonna tunichanna vannoi pumpin hungkimangjom jing ahitai

Father's Day back history hi iseidingleh, seidingtampi aume. Hijongleh, tuni *Pa Nikho* (Father's Day) ahitohlhonnin pate manlutdan, pate mopohna aletdan, pate loupidan, jaboldinga lomtah ahidan message joh chomchan seikhom uhite.

*Pa* beija *nu* kiti umtheilou ahi. Pate jalla nute hung umdohtheija, nute jalla chate hungpengdoh thei ahiuve. Achutileh, koichu abul ham? Koichu akisem masapen ham? Ngensena kipe chu koiham? *Pate* chu abulpi ahi. *Pa* umlouna insungho veuhite, chuleh mipa aumvanga paduh-padahlouho umna insung veuhite. Mipa kisuhtah le monpi umtah umna insung ivetleh thangset le ochat aum'e. Ahinlah, mipa khat hi-ngalla, ahivanga aji-acha dinga kisonpitheilou, monpi theilou mipa umna ho ivetleh, leisetna damun (gotmun) naipen ahitai.

"Happy family" kitihi mipa akonna hungkipan ahi. Minu chavai, minu duhdahlou tampijeh a "happy family" umdohtheilou jongchu aumthounai. Hijongleh, alhangpia insung semtupdinga mopohna bulhingset kipe chu mipa te ahiuve. Minu ho chu pate kithopi (helper) maimai ahibouve. Bible injong aseisa ahi.

Phatchesaho nungvet uhitin, tutudinmun gahveuhitin, ahunglhungding jong galdot uhite.

Insung, khosung, houbung sung, gamkaisung, nampi sung ivetleh pachat umtah mipa atamthounai. Jaboldinga lomtah mipa, kineppi le kisonpi umtah mipa jong atamthounai.

Ahinlah vetda umtah mipa phalou, mipa chavai, mipa duhdahlou, monpi theilou mipa atamlhehjengtai. Insung chavai atamjo jong mipa chatvaijeh ahi. Houbung le khosung machaltheilouna jong mipaho mitmo jeh ahi. Nampisunga minoise ichannau jong mipa lamkaiho kitahloujeh leh meisan jeh ahi.

Mipa ho mitmo jalla minu le chate guhthim in amitlhiu alongjinge. Broken family hon happy family ho a-otchauve. Minu ho leh chate jachatding gelphalou mipa ngoltah atamvaltai.

Tunin kigelphau hite. Tuni Father's Day ahitohlhonnin...........

Vo mipa,

Hazekiah lengpa bangin na-insung kisemtuptan.

Naji-nacha kivetsuijin.

Khamnathei pailhan.

Pathen kom bellin.

Jon lungthim pailhan

Nehguh-chahguh pailhan,

Hou-inn kai jingin.

Insung maicham semjomjingin.

Bible sim leh taonan pontho jingin.

Neipap kiloset pailhan. Jouthu seihihbeh in. Lepche-lepthol in kimangcha hihbeh in. Nachan chunga lung-oi jin. Sumngailutna pailhan. Naji-nachate monpithei, kisonpithei, jaboltheijin hinkho mangin. Damsot hinsotna dingin nehpha jengbou nenlang, twithengsel don jingin. Hinkho chom nathei kiti mongmong nungsun jengin. Achutilouleh, najinu meithai hungsoh intin, nachate chaga sohdiu ahitai. Thilse-thilpha hetkhen theina dinga Pathenin lhohbu napehchu thilphabolna ding jengin mangchan.

Achunga kipe juidinga  kilom hohi, mipa jousen ajuicheh diuvin tem le taona sangpen ahungkineije. Chutileh, tunia Father's Day manlo umding ahi.

Tuni Father's Day ahitoh lhonnin, mojousen pate ho jabolna leh ngailutna neicheh hen. Amaho lhahsamna kithopi dingin nute le chate kipantaute. Bible simjing leh taona jaolouvin imacha alolhingthei kit poi.

Hiche Father's Day message simdohjouse Pathen in phatthei boh cheh tahen.

Wishing you a Happy Father's Day 2022

Share: