Thangkhal Missionary-Pi Thuangkhongai Haansuang Honna

LAMKA  —  Thangkhal Namte lak a Gospel (Tangthupha) pua luttu (L) Missionary Pastor Thawngluan' zi Pi Thuangkhongai HAANSUANG honna YPA Haanmual ah tuni 16th April 2022 ni'n om hi.

Hih hun ah Upa Pumkhanpau Thusa in programme zatna makaih a, Upa H. Goukhanchin Bial Upa in Patna thumna nei in, Pastor D. Kamchinmang, Local Pastor EBCC Dorcas Veng in Haansuang honna leh latna nei hi. Pute leh Inntek te apat thu genna om zoh in paikhawm mipi te'n paak piakna nei uhi.

Rev. Dr. Pumzathang Tombing in Missionary (L) Thuangkhongai tanchin saulou genna nei a, tua zohin Mr MG Muanlal, Admin KHALVONTAWI SOCIAL MEDIA (Voice of Thangkhal) inzong thu genna nei hi.

"Tua Haansuang i hon uh Phamta (L) Missionary Thuangkhongai leh a pasal Missionary Pastor Thawngluan Tombing in Kum 1939 March date 7 in Thangkhal Namte lak a Gospel (Tangthupha) hon pawtlut a, amaute nupa panlakna zaal in Thangkhal Minam in khalam a suahtatna ngah ahi," chi  hi. Thangkhal Nam in Missionary te innkuan manghilh ngailou ahihdan gen in, Missionary Pastor Thawngluan Thangkhal Nam sung a alut apat kum 83 val paita ahihdan zong, MG Muanlal in gen hi.

Rev. Dr. Pumzathang Tombing, Chairman, Zomi Nampi Maitam in a gelh "THANGKHAL MISSIONARY PASTOR THAWNGLUAN" kichi laibu khat Pastor D. Kamchinmang, Local Pastor EBCC Dorcas Veng kiang ah MG Muanlal in present bawl hi. 

With our beloved "Thangkhal Missionary-Pi Thuangkhongai"

Hun tawp ah Upa N. Zentutheng in thumna nei in paikhawm mipite'n itna Annkuang umkhawmna nei in, hun zou uhi.

~ KHALVONTAWI

(Voice of Thangkhal)

Share: