Singngat MLA Chinlunthang in Teikot ah tuilakna ding enkhia

Lamka, 2022 May 6: 60-Singngat Assembly Constituency Hon'ble MLA Pu Chinlunthang in tuni sunnung dak 2:30 in Singngat khawsung a mipi tuinek ding kiningching om theihna dingin Teikot khawkiang a Tuitha lui enkhia a, hua mun akipan Singngat tan ah tui laklut dingdan velchian hi. Singngat khawsungmite'n a gendan un, Singngat khosung a Veng tuamtuam ah kumsial in tui haksatna beithei ngeilou a, tui haksatna maituah den ahihdan uh gen uhi. Tulel in Singngat khawsung ah inn 2400 val om a, singtang khua himahleh Water Tanker a tui a lei mai uh ngai hi'n gen uhi. Tuni a Singngat MLA in tuilakna munding a etkhiak hun ah Public Health Enginering Department CCpur PHE-Division apan John Thanglienmang, EE; L.Paulungmuan, AE; Haukhansiam, SO leh Lalringdik, SO tel uh a, Singngat khawsung apan CSO tuamtuam lamkaite'n zong zui uhi. MLA Chinlunthang in Singngat khawsung a tui kiningching omtheihna ding in fund omthei dandan a nasep kipan ding hi'n gen a, hun sawtlou nung in Tuitha luidung ah tui kholkhawmna munding leh a poimawh dingte survey bawlding in Team khat sawl hiding hi'n gen hi. Singngat MLA in Tuilakna munding leh tui kholkhawmna mun ding a etkhiak zawh in Singngat khawkiang a Model Residential School zong enkhia a, huo nasepna a kinlam a zawh ahihtheihna ding in a kisaipih department kiang ah gending ahihdan gen hi. Residential School compound ah Component 18 om a, February 2019 in nasepna kipan hita hi.

KHALVONTAWI

VOICE OF THANGKHAL

Share: