Research & Preservation of the Zo Identities (RPZI): Press Communique

HISTORY bawltawm pansan a Tonzang, Chivu mun a Meitei lengpa min a park kibawl toh kisai panla tatak di a omlouh lai in, Research & Preservation of the Zo Identities (RPZI) in ma ana pan in, hiai toh kisai in tha leh zung, lungsim tampi seng in mipi kuapeuh nungthuapna toh lam tuamtuam ah pan i na la tou uhi. 

Zomi Chief Association (ZCA), Manipur Tribal’s Forum, Delhi (MTFD), Collective Lawyers’s Trust, India, All Tribal Women Union, Manipur, Zo Re-Unification Organisation (ZORO), Mizoram, Tribal Intellection Forum, Manipur, Mizo History Association, Mizoram  leh RPZI te’n history pomdan kibang in Chivu Stone Inscription ah history dikloutak a kigelh Meitei Maharaja Chandrakirti in Lusei hausa 4 leh khua 112 tung a vualzou ahih dan kigelh pen diksalou in kinang a, tua ban ah Zo suante ukpipa Goukhothang Guite zekhem a hon matsakna mun ah amah mantu Meitei lengpa pahtawina a park bawl lemsa lou a kihih dan kigen hi. 

Hiai toh kisai RPZI in pan latou in memorandum tuamtuam Chief Minister kiang leh department tuamtuam - State Archaeology, Kangla Fort leh Archaeological Survey of India te kiang ah kipia hi. Outer Manipur MP kiang leh Hill Areas Committee (HAC) Chairman kiang a le memorandum kipia hi. 

Pic: RPZI met Manipur Chief Minister Biren Singh and Shri Ginsuanhau Zou, Ex-MLA on 22nd August 2021.

Huchi in hiai thu toh kisai talks tuamtuam kinei a, Singngat Ex-MLA Pu GS Haupu toh tamvei pi kinei in, Kangla Fort Board toh 3vei lam bang, Chief Minister Pu Biren toh bang round 2 kinei hi. A nunung pen in Ex-MLA Pu GS Haupu Chairman na nuai in, CM Expert Committee toh kinei a, historical distortion pen bawldik ding in kithukimna kineithei a, park min kia ah kithukim theilou in ki om hi. RPZI in park min dia Chivu Park kichi mah leh CM deihna bang in Singngat Ex-MLA in Chivu Chandrakirti Park proposed in, hiai pen CM Expert Committee in pom a, himahleh RPZI in pomthei lou in, kithukimna omtheilou in kihouna dinkhawl in om hi.

Huchi kawmkal ah, Singngat MLA thak kinei a, Chief Minister Pu Biren in park hongkhe ut lotel ahih chiang in Singngat MLA Pu Chinlunthang Zou ana nohnoh hi. Pu Chinlunthang Zou in le innpi tuamtuamte leh CSOs tuamtuamte toh RPZI meeting nihvei hon neihpih hi. Innpi tuamtuam te’n le hiai park bawl di toh kisai diksa lou vek ua, himahleh hihtheih bangmah neilou kisa chiat uhi. Huchi in RPZI in a dinpih Chivu Park mah ah ading kip ding ua, Pu Chinlunthang in amah proposed name - Chivu Archaeological Park (In memory of Chandrakirti) chih CM kiang a suggestion pelut himhim ding in meeting hon khakpih hi. Bang teng hileh Singngat MLA pu in i dinmun uh theisiam a i gam humbitna ding a pan thak hon la a, RPZI dinsan mah hon dinpih teitei a, CM toh kilemna hoihtak hon neihpih ding in ngetna i bawl ngal ahi. 

Hichi a RPZI in  kal tampi a kisuan nung in, tunai in Raja Goukhothang Guite sih champha 150 phawkgige program ah Pu R. Sanga leh Raja Goukhothang Guite 150th Death Commemoration Committee te’n Raja Goukhothang Guite pen Meiteite thah hilou a Britishte thah chi in history kum 149 val i na paipihsa uh hon khek uhi. A poi mahmah ahihleh hiai committee te’n Imphal a Meitei Maharaja Sanajauba Leishemba leh CM Pu Biren kiang ah Raja Goukhothang Guite Britishte khut a mat leh si ahih dan memento va pia ua, hiai in Raja Goukhothang Guite, Meiteite thah hilou a Britishte thah ahi chih a gelhthoh a proof va pia suak ua, poi kisa mahmah hi. 

Hiai public statement leh committee te thilhih in RPZI leh a tung a kigen pawl tuamtuamte dinpih history leh panlaknate bangmahlou suahthei ding dinmun a om ahihman in poi kisa mahmah hi. Chandrakirti sepaih te’n Raja Goukhothang Guite zekhem leh man ahih ziak ua, Chandrakirti min a park bawl hithei lou ding chi a negotiation kibawl nilouh pen, tua Britishte mat leh thah a hon chih chiang un, RPZI pansan zuau hon suah di dan in om uhi. Tua ban ah Treaty of Sanjenthong (1873) leh Treaty of Kaprang (1876) te tanpha zero hon suahthei di hong bang uhi. Raja Goukhothang Guite Meiteite khut a mat leh thah ahih dan Meiteite leh a historiante mah un a pomsa uh ahi. Huchi ahih man in, Pu R. Sanga leh Raja Goukhothang Guite 150th Death Commemoration Committee  te’n ngai poimoh in, hiai toh kisai bawldik dan hon neithei le uh a deihhuai mahmah hi.

Kum tampi kal i na suannate uh leh history i na paipihsa uh bangmahlou kisuahtheih dinmun a ding i hih man un, hiai thu RPZI in kingai poimoh in mipi theih ding in thusuah hon kibawl hi.

“We are not makers of history. We are made by history. —  Martin Luther King Jr

— Information Secretary,

Research & Preservation of the Zo Identities (RPZI)

Lamka | 09 May 2022

*****************

Share: