Misao Lhahvom ah Pu LM Khaute leh Pu Paolienlal kipahpihna kinei

Lamka 2022 May 8: Misao Lhahvom Community Hall ah zan sunnung in Somkholal Road Development Committee saina in Pu LM Khaute (MLA 58 Churachandpur ST Assembly Constituency leh Pu Paolienlal Haokip (MLA, 59 Saikot (ST) Assembly Constituency lawhchinna kipahpihna program nei uhi. 

Hih hun ah Rev Letkholian, ECA Lanvalui Pastor Area in MLA thak nihte a ding in vualzawlna ngetsak a, MLA nihte lopna in Bawng 2 leh Vok 1 gou in ankuang umkhawm uhi.

Pu LM Khaute in a thugenna ah, a naupanlai in Tualnuam a Somkholal Memorial School ah kai a, huo hunlai in lampi a hoihlouh ziak in leibul apan khekol khuktan a kheptou in khedap pen bag sung ah kikuah chi hi. Hun hongpaitou zel in Donbosco ah a kailai in leng lampi a ngeingei mah hithou chi a, a chang a tuihat ziak in lei neilou a om hun bangleng om chi hi. Huai hunte tuni tan theilai ahihdan gen a, lampi hoih banah lei hoihtak neihding lunggulhna ziak in MLA election om teng in candidate-te kizuisek mahleh tuni tan a ngeingei hilai chi a, himahleh MLA Paolienlal Haokip pen development a lunglut ahihna ah amah tungtawn a lamlian hoih leh leipi hoihtak hong omngei ding lam-et thu gen hi. Mualkot leibawlna ding in Rs. 4 Crore val sanction in om ngei mahleh NEC leh DoNER kal a kitheihsiamlouhna a om ziak in sanction khitsa pen tumkik chi hi. Mualkot lei bawlna ding in nasatak a panlak ahihnung in PMGSY nuai ah Bailey bridge ding in bawlna kipanta chi hi. MLA hisate'n M.Lhahvom area nelhsiah mahle uh tu in "Wind of Change" hong omta ahihman in lametna liantak nei ahihthu gen hi. Mualkot apan Tuitha tawn a Ngurte a pawtding ring road poimawh mahmah hi'n gen a, tu in Tuitha lui in hon nang in mental block khat om mahleh khatvei tei town in hon uap ngeingei ding ahi chi a, MLA luite'n kum 30 val ana puahlouh uh tua amah leh Saikot MLA in zankhat thu a bawl thei tuanlou uh ahihman in theisiam ding in ngen a, lei leh lamlian hoih bawltheih teitei na ding a panlak ding lunggulh uh ahihdan gen hi. 

Paolienlal Haokip in a genna ah Khuga Canal kiang a lampi omte zuih theih taktak ahihlouh ziak in lamlian dangkhat Ring Road om theihna ding in proposal pia hi'n gen a, Monglenphai apan Joljam ah kaltou in Mission Compound a lutsuk a Lhangnom tan tungding proposal pia ahihdan gen hi. Tutung in i ngaihtuahna uh leh lungsim put uh liansak in, Singngat AC, CCpur AC, Saikot AC chih omlou in eigam hivek ahihman in kithuah a i sepkhawm ding uh ahi chi hi. I gamsung uh khantouhna ding in pangkhawm in semkhawmni chi a, huaimah amah utdan leh mipite deihdan leng himahleh hon dal thei tam mahmah a, Manipur pen amah kia a kitoudelh zoulou state ahihman in Central govt a kinga hi a, state a i tenkhawmpih uh a mi tamte'n Valley district teng a Development teng kizangbei leh chih ut ahihman un mipi palai dia telchingte pankhawm ngai a, development om theihna ding a pankhawm a ngaih bang in gamleitang humbitna ding in leng singtangmi MLA-te pankhawm ngai chi hi. Dampi Forest Reserved, Thangching Forest Reserved, Cheklaphai Forest Reserved, Chivu Chandrakirti Park chihte telin gam leh gua humbitna ding diktak ah panlak poimawh chi hi. Khaw hausate theihpih leng hilou a, gamsung a ana tengte theihpihna leng hilou a thil hong kihihte mipite'n a hunteng in 'aw' suah theikei mahle uh mipi palai dia telching a om MLA te'n 'aw' suah a pangkhawm a gam humbit ding in chial hi. India Danbupi gelhtu Dr BR Ambedkar in protection honna koihsak pen kua party leh kua nam engbawlna leh kuamah rights suhsakna hilou ahihman in, eimah rights humbit ding in a MLA pihte chial a, Paite, Thadou, Hmar, Zou Vaiphei leh a dangdang a i kikhennate uh koihkhia a, hausate'n leng All CCpur Chief Association chih khawng hon dinkhiak uh hoihsa hi'n gen a, Manipur Assembly a singtangmi MLA teng leng kihoukhawm a, i gam bangchi leh humbit a khangtou sak thei ding hiam chih mipite leh MLA-te'n Agenda a neih hunta chi hi.

Share: