Mini Secretariat ah Saikot MLA Pu Paolienlal Haokip office hon in om

Lamka, May 13: 59-Saikot Assembly Constituency sung a om mipi a lianpen apat a neupen tam in Imphal naih gigeh ngailou in MLA kimuhpih theita ding hi. Mini Secretariat, Tuibong ah tuni zingkaal dak 9:30AM in Pu Paolienlal Haokip, Hon'ble MLA, 59-Saikot Assembly Constituency office ding honna leh latna om hi.

Hih hun ah Pu S Khaikhopau Ngaihte, Addl DC/CCpur in Ribbon teptan in hongkhia a, Upa Khailun Haokip, ECA, Molnom in Pasian khut ah lan in Hon'ble MLA Pu Paolienlal Haokip a ding in vualzawlna ngetsak hi. Saikot MLA office kalkhat in ni 3 sung kihong ding a, Thohnawnni (Monday), Ningani (Thursday) leh Kiginni (Saturday) teng in zinglam dak 9:30 apan sun dak 12:30 kikaal leh nitaklam dak 4:00 - 6:00 kikaal kihong ding a, Kiginni in zinglam chou kihong ding hi. 

Hon'ble MLA Paolienlal Haokip in hih hun a agenna ah mipi deihna tawh telching a om ahihna ah mipite haksatna leh gentheihna omte constituency sung pansan a genveng hong hih theihna ding a huo mun a office hongkhia hi'n gen hi. Govt lam in zong MLA quarter ding hun sawtlou nungin pia ding uh, himahleh Vote Campaign lai apan a hun tamzaw constituency mipite tawh zat khawm ding chih a kichiamna ahihziak a, constituency sung mah a office ding hongkhia hi'n gen hi. Constituency mipite'n hunpaisa in MLA muhtheihna di'n Imphal tan ah vadelh in sum tampipi seng mahle uh tuni'n tuadan ngai nawnlou di'n amau constituency sung mah ah MLA kimuhpih theita ding uh chi hi. 

Mipite a awlmawhna ziak liauliau a hih mun a office a honkhiak hi'n leng gen hi. Constituency a MLA-te amau Constituency sung ah a om tamlouh chiang un nawngkaina tamtak om jel ahi chi a, MLA quarter tawh kisai in Government ah apply bawl mahleh kideihsak tuamna omden a, MLA-te Quarter ding kituh thawh kichi government a ding a zong zaklak huai mahmah ahihdan leh mipi'n deih a atelching uh MLA-te quarter ding government in a piak theihlouhna zong mipi'n a theih ding uh deihna a, amah constituency sung a office a honkhiak ahihdan gen hi. 

Saikot MLA nuai a semte Kamboi Haokip (Personal Assistant), Seiboi Haokip, Public Relation Officer (PRO), Esther & Marina (Computer Assistant), Nu Chiin (Chowkidar), Driver in Nehminthang, Lamboi leh Mangtinlen hi uhi.

KHALVONTAWI

VOICE OF THANGKHAL

Share: