KRISTIANTE ZUIH DING LAMPI THUMTE

~ Rev. S. Thangnou

Pastor, TBC (ABA), Delhi

Gingtute Khristian chi a a kiphuah masakna mun pen Antiok khua ahi (Nasepte 11:26). Tua gingtu masate Khristian kichi masa lou in 'Lamzuite' na kichi masa hi. Rome Laikhak in "Khasiangthou a nei loute pen Khrist mi ahikei hi," a chi hi. Khristian chih pen Toupa Jesu 'hunpa' a sang, a nungzuite lampi thukhun a nei taktak te i hi uhi. Zuih teitei ding lampi thum om hi.

1. Damascus Lampi (Nasepte 9:1-19): Damascus Lampi kichi Bible in "sisan a dim bora-ip (sack) meikaang san" bang chihna ahi. Damascus pen Syria khopi (capital) ahi. Khalam ah kikhekna chiamtehna (symbol of transformation) in kizang hi. Laisiangthou pumpi ah 55 vei kimu hi. Khristiante bawlsia Paul kikhelna pen Damascus Lampi ahi. Kikhelna lou in Khristian kisuak theilou a, vangam kitung theilou hi. Tua kikhelna ding in Jesu Khrist gintat a saan kul hi. Khasiangthou in hung kikhel sak ding, tot ding masa kikhelna lampi Damascus Lampi ahi.

2. Emmau Lampi (Luke 24:13-35): Emmau Lampi i chih chiang in Toupa toh zawk khawmna, Jesu toh kikholhna lampi chihna ahi. Hebrew ham in 'hammat", tua pen "tuisanaak (hot spring)" chihna ahi. Toupa Jesu sihna pan a thoh khit nih vei a kilakna pen Emmau Lampi a khualzin nihte tung ahi.  Jerusalem pan mel 7 in Emmau gamla hi. Amaute Jesu toh zawk khawm ua, Jesu paisuak ding sa'n a khaam ua, nitaak ann a nekhawm uhi. Tuateh Jesu mang hi. Khristian i chih Jesu  toh zawk khawm, nekhawm te a hi. Houlim khawmna lampi Emmau ahi.

3. Calvary Lampi (John 19:17-22): Cavary Lampi chih pen sisan luanna, gim thuakna, singlamte puakna lampi ahi. Khristian te'n kibawlsiatna, kihuatna, pawl sung buaina, si-le-sa toh kidouna tuamtuamte a thuak tawntung ding i hi uhi. Vangik lua puak pen hichi zaw deuleh chi om tuan kei hi.  Ahihang Kross na puak chiang bek in Kham Lukhu na khu pan ding hi. Kross omlou in Kham Lukhu omlou hi.

Paul in "eite gim tampi thuak in vangam i lut ding" a chih bang in, Kross lampi pen a nuam hilou in gimna, kho-ul kaina, khitui naptui luanna, haksatna toh kidim lampi ahi. Stephen in zong a sih kuan in "amaute khelhna maisak in" chi'n thum a, a puankempa Saul kikhel loh hi (Nasepte 7:54-60).  Toupa Jesu'n zong hih kammal mah toh thum a, a thatte Penticost ni in kikhel siang uhi (Luke 23:34).  

---24042022---

Share: