KRIST LAIKHAK (2 Kor. 3:3)

~ Rev. S. Thangnou

Pastor, TBC (ABA) Delhi

Laikhak kichi Ham/Pau teng gelhkhiat hiam namkhiat thute mikhat kianga khak chihna ahi. Tulai a Fax, WhatsApp, mobile phone leh adangte kizat bang in nidang lai in mun gamla leh haksatnate ah kithujak sakna in ana kizang hi.

Laikhak khat peuhpeuh sik-leh-tang a sawl ahihman in agelhtu in a khakpen (amutu) kiangah a gennop teng a gelh hi. A sungah thu poimoh tuamtuam kigelh hi. Atangpi in ki-itna, kingaihna thu, kihanthawnna thu, leh a tuamtuam asia-leh-apha kithuzak sakna ahi.  Mimal vai, insung vai leh pawlpi sung vaite leh government vai ah zong laikhakte mah na kihahman mahmah hi.

Sawltak Paul in Korinth Laikhak nihna zong Macedonia gamlapi apan in ngaihnatna lianpi toh gingtute ana khak hi (55-57 CE). "Noute ka laikhak uh na lungtang ua gelh, mizousiah  theih leh sim nahi uhi" achi hi (2 Kor. 3:2). Krist laikhak, kou gelh, laitui a gelh hilou a, Pasian hing kha a gelh, suangpek a gelh hilou a, taksa lungtang pek a gelh na hi uh..." ( 2 Kor. 3:3) achi hi. Gingtute pen Pasian laikhak, Krist laikhakte ihi ua, laitui leh suangpekte a gelh hilou ihi uhi. Khasiangthou zang a i lungtang sung a gelh ahi. I taksa pen khalam laikhak (spiritual epistle) ahi. Mizousiah in i niteng hinkhua ana sim zing ahi. I om sung bek hilou in i om nawnlou nung donga zong i omdan, khohei dan, i nung ima a midang te'n a lungsim a hung sim zing ahihdan phawk huai isa uhi.

Tuaziak in ei gingtute/Kristiante Pasian laikhak, Pasian a kipan ihi uh. Amah a pan chitna leh hoihnate sim theih ding a, Krist laikhak manpha tak ihi. Laikhak hoih hidi'n Pasian in thupha hung pe ta hen. Amen.

---27032022---

Share: