JESU'N SABILTUNG NOU MANG (Matt. 21:1-11)

~ Rev. S. Thangnou

Pastor, TBC (ABA), Delhi

Jesu'n gualzou a Jerusalem a lut ding in Sabiltung nou a zang hi. Hih Sabiltung nou a zakna toh kisai in theih ding a poimoh isak khenkhat i en ding hi.

Amasa in Sabiltung (Lokael) omdan gen phot ni.

Sabiltung pen vanpuak a hat, gamlapi a paizou, puakdan zong a siam mahmah ganhing khat ahi. Sakol sang in zong a hatzaw hi. Nop leh noplouh omlou a thuak mialmual a pua ahi. Ahihhang in a kilak/kisin nailou Sabiltung noute pen le mahmah a, zattheih leh tuantheih paipai hilou hi. Jesu'n a kisin nailou zang sese hi. Bible in nasepna, gimthuakna, kilemna, kingaingiamna leh Thukhunlui (OT) hun a 'Balaam' houpihna pan pilna thupi genna in a kizang hi. Palm Sunday ah lemna tunna in a kizang hi. Kidouna-Kumpi hilou in Kilemna-Kumpi ahi.

OT sung leh NT sungah Pasian mizat a tamzaw khanglai, khangnou vive hisim hi. Jesu'n khanghamte sang khangoute zang nuamzaw tham chih ahi. Tua man in Sabiltung nou tungah Jesu tuang hi.

A le mahmah Sabiltung nou tunga Jesu a tuan teh a zual mawk pen a lamdang khat ahi. Mihon tampi kikou taleh zong a tunga tuang Jesu deihna bang in a pai ngeungeu hi. Kuamah in hung thuzoh louh, chiangduai leh suangkul (jail) ten hung zualsak zoh louh na hi ding hi. Jesu na saan a na ki-uksak leh na zualpai ding hi. Tualthat leh migilou tampi Jesu'n khellah neilou in zualsak zou hi.

Hih Sabiltung nou bang in genhak leh khel in le mahmah na hitazong in Jesu na ki-uksak phot leh zual in na hoih ding hi. Pasian in mangthei leh muanpha-nu muanpha-pa ding in a thu hung gualzawl ta hen. Amen

---10042022---

Share: