Interview: Footballer Sebastian Thangmuansang Tungdim, ISL Player

SEBASTIAN THANGMUANSANG TUNGDIM, ISL PLAYER TOH KIHOULIMNA

EIMITE lak a ISL Player um sun khat, tulel a Odisha Football Club a kimawl, a neu apat Football lunglut, sanlam 5.8ft leh agiklam 67 kg, ki-fit tittet mi ki self-discipline zou mahmah Zotangval nou khat ahi a: "Mikhat in leitung pumpi nei henlen, ahinna taan taleh, ama dingin bangpen aphatuom diei? ahisihleh min ahinna tangin bang apekhe thei diai?(Matthew 16:26)" chih a Bible taang deihte lak ah khat ahi.

Kuamah dang ahikei a, India-Burma-Bangladesh ZO Suonte pumkhat ding buaipi a Zo-Reunification Organisation (ZORO) adia gim-le-tawl khoksalou a Zogam 'Manipur-Mizoram' dung-leh-vai a ana taai kawikawi, "Zogam Sakawl" chi'a ana kithang ban ah Zou Bible PASIAN LAISIENGTHOU (The Holy Bible in Zo, Published by the Diocese of Imphal, January 1, 1983) translator ana hi, 07 Feb 2016 a a'ng na beisan Pu Aloysius Nehkhojang Tungdim leh Pi Angel Vungneiching Tungdim tate li lak a atumpen ahi.

Bawlung suih siam hun awl neih sun chia Bible sim a thumna toh hun zang zel, unaupa Sebastian Thangmuansang Tungdim toh Bruce K. Thangkhal, Joint Editor, Zogam Today kihoulimna anuai abang ahi.

Zogam Today (ZT): Interview theidia hun nang pieh ziehin lungdam ung.

Sebastian (SB): Kei toh kihoulim dia khosahna lienpi toh nang kalsuonna tung uah kei zong Zogam Today tung ah lungdam ing.

ZT: Tu laitah innlam ah bang ngai tuo? Bang tan um ding?

SB: Buoipi thupi pen chu Season tha adia kisahkholna, inn ah sep theithei sem, innsung mi lawm-le-guol toh hun manpha zat hun himai. Naupangte practice ka bawl khawmpi zel a, tunai in T. Khuangkhai leh Mongkot khua ah Coaching ka va bawl uhi. Hun nei daan zil in mundang zong ka sawm thou uhi. September lah tan vel inn ah um maithei.

ZT: Na tanchin them khat nang share thei diei?

SB: Aloysius Nehkhojang Tungdim (late) leh Angel Vungneiching Tungdim te tapa tum peen kahi a, ka pienpi sanggamte ahileh Mary Chiinzoujam, John Chinminlal, leh Judith Chiinngaihlien. Zoland Villa,Thingkangphai, Chiimtui Veng, Lamka a khosa lellel ka hi uhi. Kei khu 25 July 1998 a pieng ka hi.Tulel a Odisha FC a Right Back a kimawl ka hi.

ZT: School hei ah nana kaai aa?

SB: Class A apat Class 12 tan Donbosco Higher Secondary School, Salem Veng ah ka kai a, hinanleh 12 kasim laitahin Football Academy a din May 2013 kum a trial dia ka pawt in ka na sun zom nawnsih a, ka siemzilna ahileh NIOS leh IGNOU ah ka zop ta hi. Tun IGNOU ah BA 3rd year exam ding ngah ka hi.

ZT: Na neulai apat Football lunglut nama, awleh ang inspire um ama?

SB: Pienken lunglutna hidin gingta ing. Tua banah ka nu kana zuizel na a teacher posting mun Behiang, ka pute umna New Lamka, tu'a ka khosahna uh Thingkangphai te a football ana ha bawl mama ua, tuamite apatsa inspiration ka mu hiva. Ka U John Lalboi in zong ang na kimawlpi/nahil zelte football a ka kalsuon masat peen te ahi.

ZT: Kum bangzah vel nahin football na kimawl tai?

SB: Kum 4-5 vel ka hilai apat hiva kei thei daan in.

ZT: Football lunglut chi nu-le-pa'n a thei un, bang ngaihdan anei ua?

SB: Ka lunglutna ahizie'n ka nu-le-pa'n hing khaam lou, inter-school tournament ka ki-apmai na uh zong ang en zel ua, lekhasim toh hoideu a ka kopnaah leh khoh asa sih uh, hinanleh professional tahtah dia ka'ng kisingsah phetin lekha siemthei ka hizie'n a lunggeel uh akikaa veve'n ka thei. Mibang a tahsa hatlou ka hina ah lunglien tah a ang tawsawn ka nu-le-pa thupi kasa.

ZT: Mipi mai a football na kimawl masatna lah?

SB: AFC Grassroots Inter-School (Donbosco) Under-12, 2007.

ZT: High School/College Level ah footbal kidemna ah na pang ngai ei?

SB: AFC Grassroot Inter-School 2007 & 2008 leh Subroto U-14 tournament ah ka na pang, kou hunlai in inter-school/college tournament tamlou ahizie'n panna di ana tamlou hi.

ZT: Bang achileh Pune FC Academy (tu'a Pune City Academy) lutkha thei?

SB: Lawite apat leh Facebook/internet website tungtawn in Pune FC Academy a trial um di chi ka zaah tahin May 2013 in ka va kuon hi. Round hun khoppi zou in Shortlisted lah ah ka zau a, August ha in Intensive Pre-Season Training cum Final Selection ah Pasian hepihna toh ka lawching kia hi. India pumpi apat ang peikhom Player Under-17 toh Under-19 te lah a Under-17 Age-Group adia selection ka mu ahi. Coach 3/4 in Technical, Positioning, Tactical, Personality, Physical dungzui a Points tam penpente ala uh ahi. Full Scholarship ahia, neh-le-taah, lekha lam a sangsie, kimawlna van, hostel accomodation, stipend, indoor games ho zong a um hi.

ZT: Football Academy ah bangchi'n hun na zang ua?

SB: 1) Zingkal Breakfast, 2) Dahkal 2 vel practice kibawl, 3) Study Class kinei, Tutor hing kuon zel - English, Commerce leh Social-Science chi ho ang hil taangpi, 4) Lunch, 5) Rest, 6) Free Time chieng Gymn Class ka kinei, 7) Snacks, 😎 Dinner. Dahkal 8 bang zan ah ki-imu, suun ah zong tomkhat ka imu (afternoon nap) zel, tam ka chiin daan ahi.

ZT: Training lai a hasah nasah pen khat nang gen thei diei? Bangchi'n na ki-adjust?

SB: Hun tamzaw ah natna-satna (injury) um nanleh niteng a tanlou a masawn/progress gige ding (a masawn loute ki-sawldoh/release zel). Siemna kidemna ah sangsiete lungtup sang mama ahiziehin ki-engbawlna zong gimnei(cruel) thei mama ahina toh mittui luonni, a hasiet huoi hun a tam zong in lawchinna nisuo hoi lametna toh hahsatnate thuo tou hamham zel in, tuami ki-engbawlna hahsatna ka tuohte in khonung a din thuohhatna leh lungtang khauna in ang pang zaw hi.

ZT: Bang Club ah na kimawl masapen?

SB: Innlam ka umlai in official tahin Lamka United Soccer (LUS) a ka na kimawl masapen hi. Contract chi zong um vaselou. A lamkaite Pa Thangchinhau, Pa Thangzasong leh Pa Thiauthianmung te in humi hunlai a kei naupang noukhat piching te lah a maban ding khuolna toh ang na deisah/gingtatna te uh thupi kasa a, a tung uah ka lungdam mama hi.

ZT: Bang club lah ah na kimawl kha ei?

SB: Pune FC Academy (2013-16) ah kum 3 ka um hi, a kum 4-na 2016-17 pen ISL team FC Pune City (FCPC) in Pune FC team take-over abawl zieh un FCPC Academy ka kisuoh ta uhi. Chennai City FC (2017-18) on-loan from FCPC, NEROCA FC (2018-19), Gokulam Kerala (2019-21), Odisha FC 2021 pat tutan.

ZT: Bang position na tang kha, ei man kiteel thei ama?

SB: Ka neu apat Midfield ah ka na kimawl a, ahin Academy ka lut zaw'n coach te deidan toh Right Back ah ka kimawl hi. Hinanleh apoimaw dungzui in Position tuomtuom kimawl thei dia ang train uh ahi.

ZT: Na kimawlna Club nuam nasah a um ei? Coach lah?

SB: NEROCA pen ei gam ahiziehin anop daan leh mipi mai a kimawl anop daan tuom vilvel a, hinanleh Gokulam Kerala pen facilities kiningching zaw hi. Coach lahlah ah Pune FC Academy ka lut tung a Coach Nishant Mehra, NEROCA FC ah Renedy Singh (former Indian international footballer), Gokulam ah Fernando Varela (Argentina) amauteng lungsim siengthou daan uh, deisahna toh ahoi-asie iim lou imai a gen ngam, mi hahsat daan atheisiam daan uh, Coach hoi ahiban uah a mihina (good human) uh thupi kasa hi.

ZT: Weekend bangchi'n na mang zel ua?

SB: Weekend a match a umlou leh ki-relax hun in ka zang zel ua, lawite toh dine-out vel ka nei zel uhi. Atangpi'n Sunday match a umlou leh off zel.

ZT: Sunday kikhop, ahilouleh hun zawl na bangchi zat zel?

SB: Kikhop na di alem leh Sunday Holy Mass ahilouleh ZCF/KWS ah ka kikhawm zel hi. Kikhop theilou ni Sunday chieng Gospel ho sim in thumna ka nei zel hi.

ZT: Na Bible Verse deih pe'n bang?

SB: Matthew 16:26 leh 1 Corinthians 13:1-3.

ZT: Tulai khangnoute mobile games adiehin PUBG addict gamsieng a bangphiel ta ua, phone leh hun na bangchi khen?

SB: Phone/Social Media hi'n kei hi'n koikoi ang subuoi thei a, hinanleh tuamite hun hawm daan siem angai mama hi. Tulai a khangthah adia gaal lian peen khat ahi. Ahi'n sil khat poupou tupguhna toh sangtun i tupleh phone khoisawt, PUBG hi'n games khat poupou hitaleh, imut hun kikhel zen a ngolpi'n i maban bangtan hing tunpi lou ding hi. Naupang tamzawte zong mi houdaan thei nawnlou/donlou zen a phone meeh ahichieng un i maban uh ziing mama, nu-le-pa khel a phone nau dawn a kizang mawhpeen i khankhua dingua guuh/poison ahi. Naupang aka leh phone in zol nawn da vai.

ZT: Romance lam lah, Zo lienu te'n na ong lai ei i chileh bangchi'n dawng ding?

SB: Nunngah/tangval lai a lawmngai pen i siemzilna toh balance i siemphot leh asietna a um ka sasih. For what is life without love?

ZT: Sportsperson khat di'n tahsah bangchi kikeptup poimaw?

SB: Khamnathei neh in amasapen in i sung (stomach/digestive organs) susie ahiziehin i haat di bang tahin kihaat theilou. Mihing pangai khat a dia zong hoilou khamnathei, thagum zang a bawlung sui di pa din bang chituh in asubuoi diei? Mite'n guolte sang a hat thei na'ng dawn/neh ding nichin a abawl/sui lai un, silhoilou chinteng tahsa a thun suh te adin mi pha hahsa deu va chi'ng. Imut kham ding, tahsa recovery na dia nikhat a tui 5 litres beh dawn ding ahi.

ZT: Na favourite football player koi, azieh?

SB: Ka favourite player Bastian Schweinsteiger (Bayern Munich legend) a nunnem/lunglet daan, on and off the pitch a class a maintain daan. Ka Idol (role model) khu Cristiano Ronaldo ahia, a ki thununna, a tupguhna leh bangkim etton taa ka sa hi.

ZT: Indian Super League (ISL) na tuntheina thugu nang gen thei diei?

SB: Pasian. Aziehpen kei haatna, siemna, tupguhna leh kei hetna guo in bangtan tung sih vang, miracle/vangphatna phulou a ka tan tampi um vang hizaw.

ZT: I-League leh ISL kikhietna lienpen bang adiei?

SB: Sum kiseng zat, Fan Following leh Football Quality ISL sa'ng zaw.

ZT: Manipur mi adiehin Lamka mi, I-League leh ISL ah player bangzat vel um pha?

SB: Lamka apat I-League leh ISL Season 2021 ah Khaiminthang Lhungdim (IL) NEROCA FC, Cleaven Hmar (IL) TRAU FC, Robinson Khongsai (IL) TRAU, Gogou Hangshing (IL) Churchill Bothers FC, Ginminthang Hangshing (IL) Churchill Brothers FC, Seigoulun Khongsai (IL) Sudeva FC, William Neihsial (IL) Sudeva FC, Sana Konsham Hyderabad FC toh kei ISL a kimawl, mi 8/9 vel china ahi.

ZT: Football khu professional tah a peipi na sawm ei?

SB: Ing, Pasian in dam a ang siem leh.

ZT: Football khu nehsuina ching in na mu ei?

SB: Competition asan ziehin a lawching a vang a, hinanleh kipumpieh zoutah a pang a lawchinna neite a din nehsuina guo hilou hausatna thei ahi.

ZT: Nu-le-pa khenkhat in tate football lam lunglut a deisah sih a, tam kikal bang bang'e na ngaihdan?

SB: Pienken a thanopna nei naupang khat pawng khaam pen a hinkhuo/damman kilah sah tawbang ahi. Football ki-apmai ziehin professional hi sese ding china ahisih a, football in naupang khat hinkhua a hen lamdang /puihuoi daan zil sah a hoizaw. Football values, guollel-guolzaw siem dan, tung a mi zatat dan, hasat-genthei hun a thawkia pai apoimaw dan, tahsa neh-le-dawn a kikep siengthou dan, chi-le-nam a kikhenna umlou a kigawmna football, pankhawm hatna ahidan chite naupangte zil sahin pro-player ahiloutaah in zong mihing manpha ahing hitei ding lamet huoi hi.

ZT: I gam ua na puohnat a um ei?

SB: (i) Sahkhuo lamkai hagau mi ma hihen, (ii) Politics ding mi thudih, mipil leh laisiem ma hihen, (iii) School ah exam pass na di meimei hilou in hinkhuo a zah di finance, moral, practical languages - Spoken English, Hindi, Manipuri ban ah Real-Life Skills practice hileh, (iv) Football lamah full-size pitch khatbeh kineilou puohnat lah huai zum zong zumhuai, (v) Khamthei (drugs) bawlkhiet leh hawmthaang lam ah long-term affect di ngaituo vateh lou a moral compromise i bawl zel uh zong ngaituo thuuh deulei i maban uh chimul thou huoi hi. (vi) Nu-le-pa te'n football academy fee, vocational training dia tate lunglutna ah sum seng ngamlou a phone/gari man tampipi poimaw lou/innsung dinmun toh kituo lou a aleisah ngam zel uh zong peidan hoilou tah khat ahi.

ZT: Player khat kum bangzat tan kimawl thei, dam a na umleh post-retirement plan ah bang duhthusam na nei ei?

SB: Tahsa ki-etkol hoi dan zil ahi.

Khenkhat kum 34 a retire, khenkhat kum 40 lam tan zong kimawl thei veve.

Retire zawlam duthusam gam ah lut talei, tuletu'n option a ka koi 2 um hi. (i) Business: Nasep hoina di'n sum poimaw ahiziehin amasapen in stable business ki-establish thei henlen Zogam dung-le-vai ah kimawlna, siemzilna leh taga-gentheite nasatah a dopsang ka ut hi. (ii) Professional Football Coach.

ZT: Football lunglutte bang na advice nuam ei?

SB: Amasapen in "Enjoy and express yourself", tuaban ah "Put in the work needed", "Football like life will be cruel and nasty to you, but you must fight your own battles and win them too."

ZT: Na hun manpha nang zatpiehna tungah lungdam ung. Pasian in hing pui tou zel ta hen.

SB: Kei zong lungdam mama ing.

~ Zogam Today [04-07-2021]

Share: