Singngat MLA kipakpihna hun jat in om

Apaisa April 23, 2022 zinglam nai 12:00 in Singngat Sub-Division sung, Indo-Myanmar border a om Behiang Lentual ah Pu Chinlunthang, MLA 60-Singhat AC kipahpina vaiguan om hi.

Hih vaiguan ahihleh Behiang Village Authorityte lamkaihna nuai a aKuol mipite'n asai uh ahi. Vaiguan ah UZO GHQ, ZYO, ZSP, PTC, YPA, STC, SYO, KIC, KKL, KSO CCPur leh Hmar Innpui ban ah ZOWHRO member-te, hausa 30 dingvel, KPA Singngat Bureau lamkaite ban ah area mipi tampi'n uap uhi. Tuaban ah Myanmar apat Ex-MP Pu Paulunminthang in zong vaiguan uap hi.

Pu Chinlunthang, MLA Singngat in athugenna ah, hihbang vaiguan sai, Behiang Hausapi Jubilee Mawi, Behiang Village Authority-te, Behiang Youth Club-te leh area mipite ban ah PTC, KIC, STC, UZO leh aka hiang omte teng kiang ah kipak thugen hi.

Pu Chinlunthang in agenzelna ah, Singngat AC sung a ding in Behiang pen mun poimawh tak ahi a, border trade centre khat hiding ahihna ah, Behiang khua mipite'n lungsim lian tak a neih uh poimawh chi hi. Tualeh khantouhna om theihna ding in ilak uah lemna om a ngai a, election lai a kihaunate, singnuaimite kal, govt kal ah lemna a om kei leh development hamsa ding ahi chi hi. Development laklut theihna ding in, hausate, social leaderte, mimal-te leh MLA te lunglet ngai ahi chi hi.

Lungsim lian tak a i om kei leh mipi naa kisem khalou thei ahi chi hi. Hunpaisa in Behiang ah School ina puohpha ua, nu-le-pa, zilsaktute(teacher), area mipite panlakna toh tutan in class X joukhia student 65 vel phata chi hi. Tua chimah bang in Singngat jong Education hub suah ding, Exam Centre koih ding, College om sak ding ngaihtuahna kinei ahi chi hi. Tuaban ah Muallum ah zong pawl 10 tan simtheihna ding school puah ding lunggulhna kinei ahi chi hi.

Tualeh Behiang area ah health centre jong hoihta mama a, lampite jong kibawl lellel ahihban ah maban ah Myanmar Tonjang leh Singngat kikalte ding a Tourist -cum- Recreation Centre khat suahna ding in pan kila ding chi hi. Tualeh Chivu park, Zou Gal memorial Cemetry, Zou Gal Memorial Park chihte puahhoih ding leh maban ah cable car zong tourist attraction ding in kikoih thei leh chih a lunggul thu gen hi. Gam puahna ding policy-te MLA pa maimai, MDC pa maimai leh nam lamkaite maimai kiang a na ngap uleh bukim lou ding chi hi. Tualeh Eco System imbalance lam zong ngai poimawh mahmah ahihdan gen a, maban ah gam sung a piang, gamsa, vasate venbit poimawh chi hi.
 
Pi Jubilee Mawi in mipi paikhawmte leh adiak a Chinlunthang ana taisan lou a athuap jing Nam lamkai te leh hausate kiang ah kipakthu gen kawm in Nam lamkai PTC, STC, KIC president-te kiang ah salieng piakna nei a, tuaban ah Pu Chinlunthang a ding a election a na lamkai-te, KPA lamkaite, Hausate leh mi poimawh khenkhat kiang ah puansan piakna zong nei hi. Tuaban ah pawl tuamtuam, mimal te'n zong Pu Chinlunthang kipakpihna silpiak nei ua, UZO Myanmar te'n zong memento piakna nei uhi.

Vaiguan a pang Tribe leader -te'n thugenna tomkim in nei ua, Pu Chinlunthang akipakpi thu uleh Nam khentuam neilou a tutan a tribe leader-te toh tonkhawm leh huaikhawmthei omsun ahihdan gen uhi.

KIC President Pu Letpu Haokip in athugenna ah, Pi Jubilee Mawi apat thugen a, kum sawpi MLA neih theihna ding in MLA neih dan siam poimawh chi hi. Pu B. Dongzalian, President STC in agenna ah, PDS kikhenna maimai ding a MLA jaklou ding, khantouhna ding a zak ding ahi chi hi.

Tuaban ah PTC President Suanthang leh UZO Vice President Jamgenthang te'n zong thugenna nei uhi.

Pu Chinlunthang kipakpihna vaiguan ah mi kiphal tuamtuam te'n a tuak sial 2, bawng 3, vok 2, kel 2 akigawm in gan 9 toh lawm ua, Pastor Thangboi Khongsai, Biel Pastor, Tuivai Dist, ZPCS in Pu Chinlunthang, MLA Singngat leh a innkuanpihte ding in gualzawl thumsakna nei hi. (Zogam Today)

Share: