LOVE YOU ZINDAGI

~ Pastor Thangdoulal Suantak

 

Love You Zindagi chih kammal pen, kammal kithang mahmah khat ahihziak in a theilou i omlouh diing uh ka gingta a, hitalezong a theikha lou omthei ahihna ah, a thak in khatvei kikum khawm lehang chi in, tuni a i thupi diing un k'ung teel hi.

 

Love: Hih pen mi zousiah a diing a kammal kihahzat mahmah khat ahi a, it/ itna leh ngaihna lamsang genna ahi. Zindagi pen Hinna genna ahi. Huaziak in Love You Zindagi chih kammal pen, ei haam in "Hinna aw, kung it hi/ Hinna aw, kung ngai hi," chi lehang a dik pen diing in ka gingta hi.

 

Bible: "Pasian in leitung a it mahmah a, tuachiin a tapa tang neihsun a pia hi." ~ Jn. 3:16.

 

Jesu Khrist a saptuampih, munchin gamchin a om a, hih thu na sim zousiah tung ah i Toupa Pasian thupha hung tungta hen…!

 

Leitung ah hinna khenlah-huai mahmah napi a, a khenlah-huaina ziak diktak a ngaihsun lou mihing tampi a ki-om a, hibang mite lak ah nang leh kei zong i pangkha maithei hi. Hinna kichi a manphatna na-ngawn a mulou mi tampi om a, huate lak ah i pangkha hiam? Hichibang mite'n ama hinna a siat diing khawksa lou ua, mi dangte hinna a siat diing zong khawksa lou uh hi. Mi khenkhatte'n a hinna uh chimtaak uh hi. Nang chimtaak kha ken, leitung chi-le-sa pianken in hoihna tuam chiat nei lazong, a sung a hing hinna pen mi zousiah a diing in a hoihdan kibang hi. Hih ziak in, hinna pen i it ua, i hawmthoh bawl diing uh, i duat diing uh, hoihtak a i kep diing uh ahi.

 

Bible gingta a muang mite i hih ua ahihleh, HINNA pen zahbawl diing, suksiat louh diing, Zu tawh buahsak louh diing, Khaini (Golden Tabacco) tawh buahsak louh diing, Teep theihte (Smokings) tawh buahsak louh diing, Sajan, Kuhva chikimte, Sikhar, Talab leh a dang tampite tawh zong buahsak louh diing ahi. Aziak pen, "Pasian biak-inn na hi ua, na sung uah Pasian kha a teeng chih theilou na hi uh ama?" 1Kor.3:16 in chi hi. "Mi kua hiam in Pasian biak-inn a buahsak leh, Pasian in amah a bawlsia diing,"…na chi hi. "Mi kuamah amah leh amah kikheem kei hen," chih zong kigelh hi.

 

Pasian na zahtaak na sak a, Amah ka bangkim hi na chih ngam diing a, ka hinna Pasian a kipan a ka ngah leh ka neih ahi na chih ngam diing a ahihleh, na taksa Pasian deihna bang in keembit in.

 

Gen. 1:27, "Pasian in Ama kibakpih in mihing a bawl a, Ama lim-le-meel suun in, pasal leh numei a bawl hi," Gen. 2:7, "Toupa Pasian in lei lak leivui a kipan in Adam a bawl a, a nak hawm ah hinna hu a khahkhum a, tuachiin tua Adam hinna nei mihing a hung suak hi," Bible in na chi ahih man in, i hinna uh pen Pasian aa ahi a, eite pen Pasian hinna kha teenna inn (1Kor.3:16) chihna i hi uh hi. Hibang ahihziak in Pasian na itna leh na zahna zahzah a na hinna na it a, na zah diing na mawhpuakna hi.

 

Leitung thubuaite in na hinna a buaisak diing phal ken. Leitung thusia-laasiate in na hinna a buaisak diing phal ken. Mi dangte ngaihdan tawh na hinna lam paisak ken. Nang pen Pasian hinna teenna innpi na hi a, leitung buainate, thusiate leh sil hoihloute a kipan a, a keembit diing a mawhpuakna nein a hi. Love You Zindagi chi inla, Pasian na itna leh na zahna zahzah in na hinna it inla, zahtaak in.

 

Tu a kipan in, mite deihdan leh kilawmsakdan bang a hinkhua zangh hi nawn kenla, Pasian deihdan leh hoihna bang a hinkhua zangh hizawta in. Pasian deihna, hoihsakna leh lungsim Bible ah kimu hi.

 

Love You Zindagi…..

Share: