Tonjang khua a JD(U) Tuivai Area Worker Meet nei

Lamka 2021 October 28:Janata Dal United Tuivai Block saina in tuni sun dak 12 apan in Tonjang village, Singngat Sub Division  ah Tuivai Area Workers meet neih in om hi. Huai ah hunzatna Kaisuanlal, secy Tuvai Block JD (U) in makaih in, Pauzathang Joint secy Tuivai Block JD (U) in gelhlut a, Upa Mangzakap in thumna in pan hi. Tunlamthang in vaidawnna thugen a, Tonjang Village Authority apan thugenna om banah hunzat sung in, P Tunzamang, Social worker; G Thangkhanpiang, President JD (U) Singngat Unit; S Thanglunlal Social worker; Pauzalian, president ZYA Tuivai Block; S Ginkhansiam, president PTC Lungthul Block; G Nengzamawi, President PTC Singngat Block; Lhainei Tungnung President Mahila JD (U) Ccpur district; George Jangkholian Munluo, Advocate; Wahengbang Rojit Singh @ Bullet, state Vice President JD (U) Manipur & Intending candidate 4-Kshetrigao AC leh Hangkhanpau Taithul, Ex Minister & president JD (U) Manipur banah khaw hausa tuamtuam in thugen ua, huntawp ah Upa Khamsuanpau in kipahthu gen in, Upa Chinzamang in hunkhak in, hunzat sung in Nancy Biaklun, Muan Hangzo, Niangsiankim leh Rebecca Mawite in lasa uh a, paikhawm mipite'n annkuang umkhawm uhi. Hiai workers meet ahihleh maban a Manipur State Assembly election 2022 om hun a 60-Singngat AC apan candidate sawm Hangkhanpau Taithul ngaina leh amah adia worker te adia neih a om hi a, huai hun ah M Dorendro Singh Chief General secy JD (U) Manipur, Rabikant Meitei, General Secy organisation JD (U) Manipur, Limjalet Haokip Sr Vice President JD (U) Manipur leh Ksetrigao Mandal Youth Secy kihel in, Guite Kual apan worker tamkhop a kihel ban uah area hausate leh Tonzang, Suangphu, Sialsih, Hiangtam, Bualkot leh Behiang apan khaw mipite tel in mipi tamkhop in uap uhi. P Tunzamang in a genna ah i gam humbit ngai a, i gam humbitna ding a assembly a thugen ngam ding om sun Hangkhanpau ahihdan gen in, Manipur govt in forest a puanvek sawm ahihman in i suahtakna ding a panlak ngai ahihdan gen a, huaiding Hangkhanpau loungal panla theiding omlou ahi chi a, hangsan tak in i pang ding a, pangkhawm in i gam suahtakna ding in pan khawmni chi hi. G Thangkhanpiang in a genna ah thudik a pai hunta a a lemlem kineih chihte thil hithei hi nawnlou ahihdan gen in, maban a kitelna om ding ah mipiten JD (U) telching a thudik a pang ding in ngen hi. S Thanglunlal in a thugenna ah i gamsung Politics pen sang mahmah ta a, MLA Minister i hih nakleh development pen a omsa hi a, himahleh i gamsung ua buaina omte issue omte banah khang tamtak a hon sukha theidingte state Assembly tutkhawmna ah genkhawmna ah genkhak in om panta a, zan zek in leng HAC in a recommend sa ADC Bill pen luikhiak himahleh a lawhchin louhna ding in a tamzaw ten panla uh a, maban ah i rights pen i zat theihna ding a panlak ngai a, huaiding a panla ngam leh phungam ding omsun Hangkhanpau ahi chi hi. I rights pen i humbit ut leh ei khut ah om a, i thuneihna pen i vote a hong kinga ding ahihman in election hun ah i telching ding theini chi hi. Pauzalian in a genna ah Singngat bial in MLA telching a omte lakah mi genteng yes a mi kh va liak maimai ding poimawh nawnlou chi a, i gam hon duhgawh tam petmahta ahihman in maban ah singtangmite tanvou omsa kepbitna ding a assembly house a kitom ngam ding mi poimawh ahihdan gen in, huaiding in Hangkhanpau lou omlou chi hi. S Ginkhansiam in a thugenna ah election a nai chiang in gam leh nam it kipumdim chi a, candidate te thutuam hileh mipite mahmah leng sum deih kipumdim ahihman in i gam paidan dik nawnlou in paikhial gawp chi a, sum leh pai deihna ziak leh contract nna muhna di khawng a vote hilou in i gam chidamna ding leh i gam humbitna ding a vote in namsung phelkhap theidingte vote nawn keini chi in, guite kual te Hangkhanpau a dia pang ding uh ahihdan gen in, nungtolh hilou ding chi hi. Hangkhanpau in a genna ah kum 10 nung in kitelna ah hong kisa thak nawn chi a, pul natna hilou kahna leh mauna i gam a om a haksatna meipi zingpen hihveng ding a Zogam in honsam ahi chi in huaiding a hong kipekhia ahi chi hi. Assembly tutkhawmna ah issue take up ngamding in chin zou na ding hiam chih kingaihtuah sek a, huchih nung in mipite kahna kahpih a genoih theiding amah om ahihdan kithei in hong kipankhia chi a, Gal om chiang in makai ding kimu zoulou chi in, Lamka zaang a thau hong kikap hun a Imphal tana leng om ngamlou a Delhi a omten bangchi bang a i haksatna hon genpih ngam ding ahi ua chi hi. Candidate khenkhat in intending candidate a panglai sum ziak a ki withdraw kik theiten bang lamen ahi ua chih mipiten na theih uh hunta chi a, Contractor tungtawn a MLA hongching ten contract mah buaipih uh a, tu in dept a cashier tanpha len chihtheih phial in bill pending khawng a deihsakte issue bawl chi hi. Sumsin siammi hilou ahihdan gen in, lausa a i sepchiang in kilauthawng a, himahleh hangsanna leh thutak a i din chiang in lauhding bangmah omlou ahihman in, telching ahihleh singtangmite rights hangsantak a gen ding ahihdan gen hi. Aman a genzelna ah 2007 a Singngat AC apan MLA dia telching ahih hun in leng Assembly ah singtanggam a development tawh kisai question a bawl ziak in muhdah a om lawh hin gen a, tu khawng a MLA hilel ten contract nna tam a sep laisiah uh ia pallun bang a ngai uh hin gen a, himahleh mual deuhdeuh ahi chi hi. Thudik omlouh chiang in i gam ah kinakna leh kisiatna tam chi a, tutung a JD (U) a hat ngeingei leh justice leh equality poimawh ngaih masak hiding a huaizawh in development paipih hiding chi hi. Singngat a MLA te ruling hiden mahle uh a gaw ahi chi a, kitelna om hun ah tulel a BJP makih govt a CM Biren leng CM hong hilou ding a, CM tawh kihouthei chia na deih uleh ana en un CM leng hong kikhek ding ahi chi a, tu in assembly a issue gendi om leh a gen thei diam chi kawm in bangzah vei a genta a chi hi. Solar tawh kisai in state govt approval a zekai ziak leh association a makai khenkhat in lehkik a sawm hun a mipi paiding aphallouh ziak ua lehkik hitheilou uh chi hi. Tutung election a a chin leh nam chidamna ding mah ngai poimawh ding ahihdan gen in nam kipumkhatna leh khekhat a dinkhawmna ding a panla ding ahihdan gen in, gamsung ah kilemna a masapen a koih ahihdan gen hi.

Share: