K Khaibiaklian in 60-Singngat AC ah MLA tuh ding

Lamka 2021 Sept 22: Tuni Zinglam dak 11 in S.Khamthang Special Contractor tenna inn, Lailam Veng ah K Khaibiaklian in a innsungmite kaikhawm in, Kum kik 2022 State Assemble Election om hun a 60-Singngat (ST) AC a Candidate khat ahihsawm ahihdan kipuankhiakna nei hi. Huo hunzatna S.Chinsuanlian Secretary Suantak Dopmul Phungpi Organization (SDPO) in lamkaih in, Upa Khaikhankap in thumna in pan a, S.Thangkhenhang (Thusa) Chief of S Zezaw in vaidawnna thugen hi. Hunzat sung in K. Khaibiaklian, Intending Candidate for 60-Singngat AC leh S.Dalsianpau banah huo hun a paikhawm Hausate banah Upate'n thugenna nei in, Rev. Hangmuanlian, Director Youth & Mission Department Thangkhal Baptist Church in K Khaibiaklian a ding in vualzawlna ngetsakna nei a, huntawp ah intekpa S Khamthang in kipahthu gen in, Pastor Thangdoulal, Thangkhal Bible Translator in hunkhak in huo hun a paikhawm teng in annkuang umkhawm uhi. K Khaibiaklian ahihleh January 16, 1986 a piang in, Delhi University nuai a Master degree zoukhia ahihbanah Zomi Relief Committee ah Finance Secy dinmun lenlel in, District sung ah Student te a ding in 'Yes I Can' kichi NGO ah Advisor hihna len a, 2009-11 sung ZSP Delhi ah President hihna len hi, KB Enterprise neitu ahih banah Loukhoumi Organic Producer Company Ltd ah Chairman a pang in, Society for Rural Development and Empowerment India ah General Secy len hi. Politics tawh kisai in 2018 apan BJP workers a pang in, Churachandpur District BJP ah General Secretary dinmun len a, maban ah Election om hun a ching ngei dia kimuang ahihdan genkawm in, Government in mipite a empower dingdan tak a empower lou ahihziak in, mipite empower na ding a MLA dia hong kisa ahihdan gen a, Gam leh Nam puahna ding a hong kisa ahihdan leh party tawh kisai in tu in BJP General Secretary ahih dungzui in BJP ticket ngahsawm a panla ahihdan genkawm in, telching ahihleh development work a paipih kawm in gam leitang kepbitna lam pibawl ding ahihdan gen hi. Aman a genzelna ah I gam pen kisaktheihpih mahle I rights-te I zat theihkei leh I gam pen a mang tawh kibang ahihman in I gam kepbitna pen ngai poimawh masapen ding hin gen a, palai ana hisate a demna hilou in intellectual input pen petheilou uh ahihman in, I gam pen tuantual mahmah ahi chi a, Dan bawltu ding leh a diklou omte I bawl diklouh ziak a hihtan kitung ahi chi in, tusang a khawkzaw tan hongtun a I khek zawh nawnlouh ma a panlak poimawh ahi a chih banah kum 36 paita a Singngat Lhanghoi veng a piang ahihna ah kum 36 nung a a gam mipite tawh semkhawm dia hangsan tak a hong kipia ahihdan gen kawm in, Dan bawlna ding a educated mah poimawh leh a sim thei leh gelhthei poimawh ahihman in Dan bawl a gam humbit ding a kisa ahihdan gen hi.

Hun Paisa in Thangkhal Tribe Organisation General Headquarters te ITNA ANNKUANG umm khawm pihna nei in, TTO GHQs Panpihna dingin ₹ 50000 pia hi.

KHALVONTAWI

VOICE OF THANGKHAL

Share: