LM Khaute IPS, DGP Manipur in ZYA GHQ’ head office hong

Lamka, 2021 July 10: New Lamka a Gouchinkhup Veng sung Hangzasial road (Opp. Chin Baptist Association Sinai Church) ah tuni sunnung dak 2:00PM in Zomi Youth Association (ZYA) Head Office honna om hi, Hih hun ah LM Khaute, IPS, Director General of Police, Government of Manipur in Chief Guest hihna tawh ZYA Flag kaihpalhna nei in hongkhia in Rev. Khamchinkhai, Senior Executive Secretary, Zou Presbyterian Church Synod in Pasian kiang a latna nei a, hunzatna ah Guest of Honour in Thangkhosei Guite, Secretary, Guite Innpi leh Chief Host in John K. Ngaihte, Chairman, Zomi Council pang uhi. Programme sung in Thangsianbiak, President, ZYA GHQ in vaidawn thu gen a, Lianzalal General Secretary ZYA in presentation hun makaih ah, Kuki Khanglai Lawmpi GHQ leh Hmar Youth Association GHQ lamkaite'n zong uap in thu gen uhi.

Chief Guest LM Khaute in huo hun ah ZYA GHQ kithuahpihna pia a, maban ah office a zat ding Sofa set piakding in chiam hi. ZYA in khantouh lam manawh a kalsuan ahihdan atheih ziak in kipahpih hi'n gen hi. Gamsung khantouhna tawh kisai in maban ah Manipur a railway service honglut ding hi'n gen a, huai dingin lei leh tunnel bawlna in ma sawntou zel chi hi. Train tungtawn in Manipur akipan Myanmar leh Asia gam tuamtuam kawmtuah theihna hong om ding ahihman in gamsung khantouhna hong hiding chi hi. Gamsung khantouhna ding in state sung banah state dangdangte tawh cultural exchange neih poimawh a, Lamka khawpi pen Model Town suahsakna dingin gamsung ah khantouhna tuamtuam a om poimawh chi hi. Khantouhna ding a poimawh non-political organization chih a om philanthropic in poimawhna leh mawhpuakna liantak nei ahihdan gen a, gamsung ah khantouna leh lemna-muanna a omna ding in nam tuamtuam tengkhawmte lak ah kituahna leh kipumkhatna poimawh a, huai ding a kuapeuh in panlakhawm ding in DGP in chial hi.

Programme zatsungin ZYA office ding inn neitu (late) Kaineipau zi Niangzangai in zong thu gen a, aman ZYA GHQ in a poimawhna banga azat ding in thilpiak pia hi. Chief Guest leh Guest tuamtuam banah ZMA leh Philanthropic Organization tuamtuam in leng thilpiak pia uhi. Huai hunzatna ah Zomi sung a Tribe tuamtuam apan lamkaite banah ZRO leh Zomi Council nuai a frontal organization tuamtuam makaite tel uah, Guest of Honour Pu Thangkhosei Guite, Secretary Guite innpi in ZYA GHQs Office a zatding Computer set in pia ah, programme hunsung in ZYA nuai a Kikhai khawm Philanthropic Organisation tuamtuam a lamkai ten zong uap uhi.

MG Muanlal

Information Media & Publicity ZYA GHQs

Share: