Zomi Council in General Assembly cum Election nei, Myanmar a Zosuante kithuahpihna piak hidingin thupuk uh, Zomi Council Chairman dingin John K Ngaihte Telching

Lamka 2021 April 1: Zomi Council tuzingsang dak 7:00AM apan in ZC Complex, Khominthang, New Lamka ah "the Truth shall set you free' chih thupi pansan in Zomi Council General Assembly-cum-Election 2021 nei uhi. Hunzatna session thum in kikhen a, hunzatna Khatkhotong Baite, Vice Chairman ZC leh Hangkhanpau Taithul, Vice Chairman ZC in lamkaih uhi. Session masa zatna ah Genliankap, Chaplain ZRO in thumna a hong in, lamkai ana mualliam sate sunna in minute 1 sung dai dide in om uah, huo zawh in John K Ngaihte, Chairman Zomi Council in keynote address agen banah  Nangzakai Suante, General Secretary Zomi Council in Annual report pia a, Kenneth Muan, Vice President ZRO apan thugenna om in, session masa hum zou uhi. Session nihna ah General Assembly Annual Session hun in zang ua, huo hun a Dr R Sanga, Speaker Zomi Council leh K Khupdoulian, Deputy Speaker Zomi Council in lamkaih in Agenda tuamtuam genkhawmna nei uhi. Session thumna ah Zomi Council Election Commission saina in Zomi Council Chairman leh Speaker ding tawh sim in Elected post tuamtuam tuding kitelna om a, huntawp ah Lamzagou, Vice Chairman Zomi Council in kipahthu gen in, Thongkholian, Vice Chairman ZC in thumna in hun khak hi. Session masa hunzatna ah John K Ngaihte, Chairman Zomi Council in a gendan in, Election pen ninih sung neihding chih himahleh nikhat sung a zawh ding chih hoihsakna om ziak a ni khat sung a zawh ding a lemsakna om a, Zomi Nam nasepna pen voluntary ahih dungzui in haksapi i tuah hun tam petmah ahih dan gen a, tutung term ah thauvui thautang a kidouna omkei mahleh a thu a gal a kidouna om in huo pen Pasian panpihna in 90% percent vel kizou in maban ah zong Pasian mapuina tawh niamkiak sangin khanlam kinawt touzel lai ding chi hi. March 31, 2018 a Zomi Council, Chairman ahihnung in nam lamkaite, MLA leh Minister te nungthuapna ziak a hihtan kitung ahi chi hi. Kenneth Muan, Vice President ZRO in a genna ah commitment neitak in Zomi a ding in nna i sem uah, himahleh election tuamtuam MP, MLA leh MDC vel a tanvou/Panmun i tanlouh hun a bangziak a Zomi kilepsan i hi uah chi in, sum leh pai deihna ziak maimai a Zomi zui hilou in, Zomi a i chiang uh poimawh ahi chi a, Chairman dinmun letlouh ziak a Zomi nungngat san chihte i tawpsan ding uh ahi chi hi. Aman a genzelna ah Zomi ah kimin lou ihih leh Zomi a ding a semlou ding in ngen a, Zomi Zomi kichichi lei zong i tenna gam a environment i ngaihsak louh ziak un zu leh va omding om nawnlou ahi chi a, Pasian in leitung a om sing leh lou, gamsa, tungleng vasate enkol ding Mihingte hon bawl ahihman in huo ding in Sing leh lou hing dipdip a om nawn theihna ding in panlak ngai a, kuapeuh in Air gun a vasa beng nawnlou a, dynamo leh gu khawng a ngasa man nawnlou a, samatna ding a gamhal leh poppy chih chihte i tawpsan ua Green Zogam chih i pat thak uh poimawh ahi chi hi. Zomi te'n politics i saidan uh defensive ngen hi a, himahleh tu in offensive zong poimawhta chi a, maban a election tuamtuam hong om dingte ah selection hong kibawl khakleh zong lamkai te'n theisiam a pawlpi panlakna zuichiat ding in ngen hi. Session nihna a General Assembly om hun ah Agenda tuamtuam genkhawm ua, huo ah Zoland Territorial Council demand bawhzui zel ding in thupuk ua, Sasin-Salung nekkhawmna Zomi identity kembit a, dinpih gige ding in zong a thak in thupukna a lak ban uah, Green & Clean Zogam Mission sutzop ding banah hih tawh kisai Zomi Council Cabinet Committee in Action Plan a bawlkhiak ding un mawhpuakna pia uhi.  Burma a democracy tunding kik ahih theihna dia panlakna khatpeuh support ding, Burma gam buaina ziaka Zosuan hong galtai peuhmah kem a, kithuahpihna piak ding in zong thupuk ua, Zomi nomenclature pom Tribes teng in Census Record a Uniformity Entry omsak theihna dia panlak ding, huo tawh kisai in a kinthei lam a Zomi Council Cabinet in a bawhzui ding un mawhpuakna pia uhi. Huai banah Zomi Secretariate tukum a lamkhiak ahih theihna dia panlak ding in zong thupuk uah, huo ding in Zomi sung a Minister/MLA teng Rs.50 Lakhs nget a thawhsak ding a chih ban uah, 2018 - 2021 sung Zomi Council sum muhna leh senna teng Audit bawlsak ding in zong kituak tak in thupuk uhi. Session thumna a Zomi Council Chairman ding kitelna ah tulaitak a Chairman John K Ngaihte tuhtu omlou in Uncontest in ching a, amah Dr R Sanga, Speaker Zomi Council in kichiamsakna nei in, Zomi Council Speaker ding in Dr R Sanga tuhtu omlou a ching in, amah John K Ngaihte in kichiamsak hi. Zomi Council Deputy Speaker ding in Khatkhotong Baite tuhtu omlou in ching a, General Secretary in Nangzakai Suante tuhtu omlou a ching in, Secy Finance in Anthony Lianboi Munluo, Secy Treasury in H Ginlallian, Secy Administrative Affairs ah H Pauzalal tuhtu omlou in telching hi uah, amaute Dr R Sanga, Speaker in kichiamna neisak in, Genliankap, Chaplain ZRO in lamkaithakte a ding in thumsakna nei a, tuni a Zomi Council lamkai dia telching thak a omte term ahihleh 2021-24 tan hiding hi. Programme bei zoh in Pu Hangkhanpau Taithul Vice Chairman Zomi Council & Ex MLA 60 Singngat AC-Ccpur & Ex Minister leh Pi Grace Zamnu Ex-MDC 23-Muallum ADC/MDC-Ccpur in Pu John K Ngaihte Chairman Zomi Council kipahpihna in Zou Puandum khat silsakna nei in, Paikhawm mipi Nam lamkai te'n itna Ann kuang umm khawmna nei in hun zou uhi.

KHALVONTAWI

VOICE OF THANGKHAL

Share: