TBC2021:Phatna leh Biakna

Pasian Bangchi Biak Diing Ahia? (E01)

By: Pastor Thangdoulal Suantak 

Ni danglai a mi masa, Pasian hing, Bible a kimu Pasian a na bia masate'n a utna mun khat pouhpouh uah Pasian a na bethei kei ua, hilezong Pasian pen a biakna diing mun diktak ah a na bezaw uh hi. Tualeh hih hunlai in maitaam leh silpiakte zong, ama'uh hoihsakna bangbang ahihke'h deihdan leh lemsakdan bang in zong a na bawlkei ua, Silpiakte piak diingdan thukhun tawh kituak in a pia ua, Maitaam zong a thukhun dungzui in a bawl uh hi. Hih hunlai a Pasian tung a lungdam mahmah mite'n, Pasian a biak chiang un Thukhun (Pasian biakna diing a thukhun) omsa dungzui in a bia uh hi. 

1. Pasian Biakdan Diingte

A. Thumanna: Johan 1:1na dungzui in Pasian pen THU ahi chih i thei chiat diing un ka gingta hi. Tua ahihziak in THU manglou kawmkawm in Pasian a kibethei kei hi. 

Taanglai in Israelte lak ah Pasian tawh kihouthei mi khat teng a na om valek ua, tuate Kamsaang ahihke'h Siampu a kichi hi. Hih Kamsaangte leh Siampute hunlai a Israel mi zousiah Pasian biakdan pen, Kamsaangte leh Siampute thumangtak a, a gen bangbang ua gamtatna ahi. Kithoihna bawl diing hi henla, bangbang bawl diing hitaleh, Kamsaangte leh Siampute thu hilhna ahihke'h ama'uhte tawh kithumuhna omlou in bangmah ahithei kei hi. Aziak pen a bawl diingdan zousiah uh pen, Pasian a hung kipan ahi a, tuate pen Pasian in A Kamsaangte leh A Siampute kiang a a gensa ahi a, mi zousiah kiang ah vagen lou hi.

Taanglai Kamsaangte leh Siampute'n Pasian thu a man bang ua, mipite'n zong Kamsaangte leh Siampute thu a man diing uh hi. Hih THU manna omlou in Pasian biakna a hithei kei hi. Aziak pen THU kichi Pasian ahi (Jn.1:1).

B. Kithoihna: Kithoihna khat pouhpouh in tup khat chiat a nei hi. Pusa-biak kithoihna hi henla, bangbang kithoihna hitaleh, tup khat nei a bawl ahi chih thei masa ni. Bible a i muhtheih uh kithoihna in zong tupna kichiantak a nei a, tua ahihleh KITATKHIATNA ahi. 

I pu leh pate uh hunlai in, a natnate uh a kipan a ama'uh leh ama'uh a kitatkhiatna diing un, bawng leh vok chihte tawh a na kithoih uh hi. Tuabang in Israelte zong Pasian lak a a mawhnate ua kipan a a kitatkhiatna diing un a na kithoih ua, hilezong Israelte kithoihna pen Pasian in a Sila Mosi tungtawnm a a genbang in ahi a, mimal deihna leh deihdan ah a ki-nga kei hi. Hih kithoihna omlou in Dawi hi in Pasian hilezong biaktheih louh ahiziak in Biakna tawh kisai in Kithoihna a poimawh mahmah hi. Singzung Suangzung a kithoihte Pasian singzung suangzung ahi a, Pasiang hing kiang a kithoihte Pasian pen Pasian ahi.

Pasian a bia mite Pasian kiang a kithoih diing chih ahihziak in, Pasian kiang a eite kithoihna ahihleh Jesu Khrist ahi hi. Taanglai in Israelte gan sisan a kithoih in gan sisan tawh a na kitan uh a, hilezong tuni in eite pen, Pasian hehpihna tungtawn a ginna zaal a Jesu a hutkhiatte i hihna uh pen i kithoihna uh leh i kitatna uh Jesu Sisan vaang ahizaw hi. Jesu sisan a KITHOIH na hihkei leh Pasian na bethei kei diing hi.

C. Diktatna: Diktatna omlouhna ah Pasian biakna a omthei kei chih pen mi tamzawte in i theihsa uh ahih diing ka gingta hi.

Zuautat kawmkawm a Pasian bia, guta kawmkawm a Pasian bia, aangkawm kawmkawm a Pasian bia, neekguuk theih na diing zousiah a ne kawmkawm a Pasian bia chihbang pen Pasian biakna diktak ahi kei chih zong i thei chiatta diing un ka gingta hi. Hilezong hih DIKTATNA tawh kisai a tuni a i gen ut pen uh ahihleh, Pasian a diing a mi diktat na hi taktak ahi hiam? Pasian mitmuh a mi diktat na hi hiam? Pasian lak a mi diktat i hihkei leh Pasian bia hileh-malak a Pasian chou hikha theite i uh hi, chih theisiam chiat ni.

Ngaihsutna Nukhiik: Taanglai Israelte hunlai a Israel mite lawhsapna lian pen ahihleh Diktattak a Pasian biakna a na neihlouhna uh ahi hi. Pasian lak a diktatna kisamta uh ahihman un a biakna uh hung buah a, tuachiin a tawpna ah gamtuamte khut sung tung zeel uh hi. Hibang ahihziak in DIKTATNA mizia a neiloute'n Pasian a biak hang un dikthei tuanlou diing hi.

Hih a tung a i gen uh chii thumte ahihleh O.T. (Kumpi David hun masang) hunlai a Israelte Pasian biakna diing a poimawh penpente ahi a, hilezong David a hung khankhiattak in Biakna neihdan a hung changkang deuh a, tuachiin Pasian a na biakdan uh chii sagih muhtheih in a om a, tuate ahihleh;

1. "Khutbekna…" Laate 47:1.

2. "Kikouna (Pasian phat a kikouna)" Laate 47:1.

3. "Kuun a Biakna." 

4. Khupdin a biakna!" Laate 95:6.

5. "Khupbok a Biakna" Kil 4:10

6. "Khutte domsaang a Biakna," Laate 63:4

7. "Laamkaihna tawh Biakna" Laate 150:4 

Hih a tung a kigente tengteng pen "Grace Period/ N.T." hun a i biakna diing daan uh ahi taktak diam?? Hilou maithei diing ahi. (To be continue)

Share: