TBC2021: Nipi Saang

Zillai Panpihna 

By: Pastor Thangdoulal Suantak

Tuni Bible Taang Simna Diingte: Kil.1:1-8.

1. Kil. 1:1: Chiamtehna tawh Kisai a Theih Diing.

Chiamtehna kichi Israelte'n a poimawh-ngaih mahmah uh sil khat ahi a, hih chiamtehna omlou in bangmah taksang/gingta utlou uh hi.

ETSAKNA:

1. Jn. 6:30: Ama'un (Israelte'n) a (Jesu) kiang ah, "Ahihleh ka muh ua k'ung taksan theihna diing un bang chiamtehna n'ung ensak thei diing a?

2. Jn. 4:48: Tuachi`n Jesu`n a kiang ah, "Chiamtehnate leh sillamdangte na muh kei uh leh na gingta kei ding uh," achi hi.

Chiamtehna hizahta a Israelte'n a poimawhna ziak uh ahihleh, Pasian in ama'uh Chiamtehna mah tawh a na makaih, Egipt a kipan a Kanaan dong hih chiamtehnate mah tawh a na makaih a, a na gualzawhpih ahihziak ahi. Etsakna diing in; (1) Belaam sakol haamna (2) Tuipi San kaanna (3) Chiangkhut Guulpi suakna (4) Tapa taak pen sihna (5) Gawtna chii 10te (6) Sum guul (7) Lei kamkaak chihte leh a dang tampite a om hi. Hibang a Pasian in Israelte a na makaih ahihziak in Chiamtehna tawh Tunung chiang a hung tung diing thute lahna/hilhna a hung nei hi.

2. Kil. 1:2: Pasian thu leh Jesu Khrist theihpihna thu.

Pasian vaantungmi in Johan kiang ah 'Pasian thute leh Jesu Khrist theihpihna thute a theisakta,' chih ahihman in muanlahna diing a omkei a, hih Kilaakna a thute thudik Pasian a hung kipan ahi chih a kichian hi.

3. Kil. 1:3: Thumangte a hampha diing uh, Ahun a naitaak ziak in.

A). Pasian leh Jesu Khrist theihpihna thu kimtak a kigenna leh kigelhna (Bible) Laisiangthou a i muh uh thu a mangte/ a zuuite a hampha diing uh, chih pen muanlahna diing omlou, thudik ahi. Thu i man diing maw? I manlouh diing? Chih kikaal thu pen eite thukhenna dandan ahi. 

B). Ahun anaita: Hih pen Grk. Ah Kairos ahi a, Eng. Ah Epoch/ Eras chih ahi a, Season (Hunbi) genna ahi (Dan. 8:7). A mi siangthoute la in Jesu a hung paibaihta diing a, a hun diktak kithei kei leh zong a nai mahmahta chihna ahi. Tulaitak in hung paita leh, nang leh na innkuante mansa in na om uh hiam? Chih eite kidok hileh i chi uh ahi.

4. Saptuam Sagihte

1.Ephesa Saptuam

2.Smarna Saptuam

3.Pergamos Saptuam

4.Thiatire Saptuam

5. Sardis Saptuam

6.Philadelphia Saptuam

7.Laudisia Saptuam.

Hih Saptuam sagihte ahihleh, tulai a Turkey tumlam gam a om Saptuamte ahi uh hi.

Kil. 1:5-6: Hih taang pen, Jesu genna leh Jesu'n eite a diing a a nna septe, a hung tatdante a genna ahi.

5. Meeipi/Meeikhalpi tawh a hung pai hi.

Meeikhalpi/ Meeipi ahihke'h Meeilum a lomh a om, Bible a kimute pen guahtui pua meeilumte genna ahikei a, Pasian ompihna, Makaihnate genna ahizaw hi.

ETSAKNA: 

1. Pasian in a mite Meeilum tawh makaih.

2. Puanbuuk meeilum in tuamdim.

3. Solomon Temple Meeilum/ Meeikhalpi a dim.

Meeilum lak ah Jesu hung pai diing.

6. Amen leh Eimen

Amen khiatna: Taangtung teiteita hen chihna ahi a, Ka ut hi, ka thukim hi, na gen bangbang hita hen, chihna ahi.

Eimen khiatna: Amen pen Hebrew ah Eimen ahi a, 'Adik ahi (Declaration of confirmation) chihna ahi.

7. Alpha leh Omega

Alpha pen Greek laimal/ leiteng kipatna ahi a, Omega pen Greek laimal tawona ahi. Hih pen eite chihdan a A-Z ahi. A gen ut pen ahihleh, Nna leh sil zousiah kipatna leh tawpna ahi.

Share: