TBC2021: NIPI-SAANG TAWH KISAI

KHRIST KILAAKNA (Kil.1:1-A)

By: Pastor Thangdoulal Suantak

Kilaakna kichi Greek haam a hung kipan Mikaangte'n Revelation a chih uh, eite'n Kilaakna chi a i theih pen ahihleh, Apokalipsis chih ahi a, a khiatna ahihleh, "Hong (Asin hong), honna leh genkhiatna chihna ahi.

N.T. Hun ah hih kammal pen;

1. THUTAK honkhiatna chih in a om hi (Rom. 16:25; Gal. 1:12; Eph. 1:17).

2. Pasian mihing a hung kilaakna (Rom. 8:19).

3. Khrist mihing a hung kilaakna (Lk. 2:32).

4. Khrist thupina kilaakna (2Ths. 1:7; 1Pet. 1:7).

Kilaakna chih kammal in sil bang hiam kiphual, a guuk a ip a om, thudik ki-iim leh genkhiat a om ngailou pen hung muhtheih diing a hung kiphuangkhia, hung kilaah chihna ahi. 

Mite a na theihzohlouh Jesu pen Kilaakna Laibu a hung kilaak pan hilou in, Thukhun Lui hunlai pek a kipan a na om, mite'n a na theihsiam louh PA uh ahi a, Amah mu-ngai mite leh mu-ngailou mite'n a theihsiam louhdan uh a kibang a, a mukha mite'n lah 'Pasian ahi' a chi uh hi.

1. Thukhun Lui Hunlai a Mite Theihsiam louh Jesu

Thukhun Lui hunlai, Pawtkhiatna 33:20-23-nate i sim leh, Pasian muhtheihna or mu diing a phalsakna mihingte a diing oin omlou hi. Hilezong Jesu pen mihingte lawm-hoih, panpih diing, Lamkaih diing, Keem leh veeng diing a mansa a ompa leh mihingte tung a thupha a pepa ahi chih thei masa ni. Tua hunlai in Amah pen THEOPHANY- Toupa Vaantungmi, in a kilaak a, hilezong a hunlai a mite theizoh hilou hi.

ETSAKNA:

1. Gen. 16:7-16: Hagar tawh Kilawmtaatna ah, Hagar in Jesu pen 'Muthei Pasian' a na chi hi. Aziak pen Ama'n Hagar thuakgimnate mu a, tuachiin huh/panpih a, khamuan hi.

2. Gen. 17:1: 'Kei Haattungtuang Pasian Ka hi' chi in Sodom leh Gomorah tungtaangthute kikuppih hi (Gen. 18:22ff). Haattungtuang Toupa Pasian (Hos. 12:3-5).

3. Jakob Kilawmtaatna Gen. 32:24-30; Na theihngailou mite tawh na kibuan nawnkei diing hi, aziak ahihleh, hih pen kidemna hilou hi.  

4. Manoah leh a zi tawh Kilawmtaatna Vai. 13:3; Tapa nei diing a thupha piakna. 

5. Gideon Kilawmtaatna. Vai. 6:1-23; 'Midiante khut a kipan in Israelte hunkhia in.'

6. Amah min, Lamdangpa (Vai. 13:18), Kumpi Sathau Kipuakpa, Is. 9:6 ahi.

A tawpna ah Kamsaang Mika Laibu 5:2-na in, Amah zungpi pen taanglai Beth-lehem ahihdan a hung hilh hi. Hilezong Kilaakna kichianzaw khat a omkei leh mite'n Jesu Khrist theisiam lou ahihman un Pasian in vaai dang khat ngaihsun in, Thukhun Thak hun hung omta hi.

2. Thukhun Thak ah Jesu Bangchibang in a kimuthei a?

Thukhun thak hunlai in zong mite'n Jesu na mu-0mu nanle-uh, Thukhun Lui hunlai a mite mahbang in a theisiam tuamkei ua, tuachiin Tthukhun Lui hunlai a mite mahbang in a theihdan chiat un a sam ua, a Pasian hihna mawngmawng a dawkkha kei hi. Mite'n Amah a sapdante uh ahihleh;

1. Mi khutsiampa/ singsuih siampa tapa.

2. Beelzebul.

3. Thusia Bawlpa

4. Mosi Thupiakte Zahloupa

5. Mihing hinapi a Pasian tapa kichi tuampa

Chihte in ahunlai a mite'n a na thei ua, tu hun a om eite theihbang in a hihna diktak, kichiantak a thei mi a tamkei hi. Ahihhaang, eite'n zong Jesu pen Pasian tapa, eite hung tan diing a vaan a kipan a hung kumsuk chihteng baan, i theitam kei uh a, tuaziak in Pasian in a Tapa Jesu Hihna diktakte, Leitung mi zousiah in a theihna diing un Johan kiang a mangmuhna musak in achian-ataai in a laahna a hung nei hi.

3. Kilaakna Laibu a Jesu Hihna Diktakte.

Hih tawh kisai pen i zillai uh ahihman in tomkhat sung i ngaihsut chiat diing un i gendah phot diing uh hi.

Share: