TBC2021: AGAPE Vs LOVE

Pasian Itna Kuate'n Zanghthei?

By: Pastor Thangdoulal Suantak

 "Ittakte aw, itna zungpi Pasian ahihziak in, khat-le-khat ki-it ni; itna nei mite Pasian tate ahihman un, ama'un Pasian a thei uh hi. Pasian  itna ahihziak in, itna neilou mite'n Pasian a theikei uh hi. Pasian in a Tapa tang-neihsun leitung a a hung sawlna tungtawn in, Pasian in eite a hung itna a kilangsak hi: tua pen Amah (Jesu) zaal a i hintheihna diing uh ahi. Hih ka gen itna pen, eite'n Pasian i itna thu uh ahikei a, Ama'n eite hung it in, i khialhnate uh a kimai-theihna diing a, A tapa a hung sawlna thu ahizaw hi" (1Jn. 4:7-10). 

Leitung mihingte lak ah itna chi nih (nam nih) a muhtheih in a om a, khat pen kizanghthei taktak lou in, adang khat pen kihahzakh mahmah hi. Hih itna nam nih tegeel ahihleh; AGAPE itna leh LOVE kichi itna ahi. Hih a nuai a bang in ngaihsun khawm ni aw…

1. AGAPE Itna

Hih AGAPE itna ahihleh, mawhnate, khelhnate, tatsiatnate leh giitlouhnate a maisak teitei, leh a ngaihdamna diing lampi a zong teitei itna ahi a, hih pen Pasian in eite a hung itna ahi. 

Leitung mihing tampite lak ah hih AGAPE itna a zanghthei mi khat bek Bible ah a kimuthei a, amah ahihleh Kumpi David ahi.

1. A. Kumpi David AGAPE Itna.

Leitunga ah, ta-le-nau neite lak ah, kuamah in ka ta nap kihdak ing, a ek kihdak ing, niin-talua kihdak ing chi in a tate uh kihepsan lou hi. Hilezong, azun uh, a ek uh i siak, i tate'n i thu a manlouh ua, ei deihna leh hoihsakna, lemsaknate a hung lemsakpih louh chiang un naa kisa-thei mahmah chiat hi. Tuachimah bang in David zong, a zun, a ek a siak a tapa Absalom in a hung lehdoutak in naa sa mahmah a, ka tapa Absalom aw, na zun, na ek k'ung siaksa hilou na hi hiam, na seen na tui a k'ung kepsa hilou na hi hiam? Chihte ngaihsun thamtham diing hi. Tuachiin a mawhna lou ah a gaaltaai a, a gaaltaaina lampi a mite kousiatpa hinalai hi. ahizong in, David in a tapa Absalom it teitei a, a mawhna, a khelhnate a ngaihdamna diing lampi zong teitei hi. Hih pen AGAPE itna hi. Absalom ngaihdamna tangtaak hiloupa, hehpih a khotuah teiteina pen itna lamdang ahi a, LOVE kichi itna hilou hi. 

Etsakna:

1. Adam a khial a, hilezong Pasian in a mawhna uh khuhna diing zong teitei hi. Aziak pen Pasian itna ahihleh AGAPE itna ahihman ahi.

2. Kaina in a sanggampa Abel a thah khit a, mite thah diing laau a a taai kawikawi hunlai in, a lungnopna leh a damna diing in, Pasian in a talpaang ah chiamtehna bawlsak a, tua thu tawh Kaina khamuanna pia hi.

3. Esau zong, beidong kisatak a, a omlai in, Pasian in amah a diing lampi zonsak teitei a, tuachiin a suan-le-khaakte luahna gam ah kuamah a luutkei diing, chi in Pasian in a lampi diing zonsak teitei hi.

4. Numei aangkawmnu zong, Jesu'n a ngaihdamna diing lampi zonsak teitei hi.

Hihte tengteng pen AGAPE itna a pan a hung piangkhia ahi a, LOVE kichi itna a kipan a piangkhia hilou hi.

2. LOVE kichi Itna

LOVE kichi itna ah ngaihdamna omlou hi. Tualeh leitung mihingte'n hih LOVE itna hinpih pen in zong i nei uh hi. Hilezong hih Itna pen Ziak-nei Itna ahi.

Etsakna:

1. Bang diing a na zi it na hia? Chiin kidong lehang, i dawnna diing uh pen, Hoihsak ziak leh deihziak ahi diing hi.

I tate zong pen, eita/ i ta ahihziak ua ki-it ahi.

2. Bang ziak a china/damlou veh? Saptuam mi ahihziak.

3. Bang ziak a vathuumsak? Saptuam mi khat ahihziak.

Hilhchetna: Ataktak a chih in, i kiteenlai ua Pastorpa in a hung kichiamsaknate zong pen i zuih uh saang a i zuihlouh uh a tamzawkna muh diing tampi om a, tuate ziak diktak hibang hi. Kichiamna nei a, "A mit-taw in a khelbai leh zong," i chih pen uh maw, i kiteen masang ua mit-taw hiam, khelbai hiam hileh pen kiteenpih lou diing hihang. Hoih i sak man leh i deih man ua kichiamte kihi leltak in it nguut-nguut ziak hikhollou hi. Tuaziak in hih LOVE kichi itna pen a ziak-nei itna hi. 

Ta thumang in nu-le-pa itna ngah deuh a, a manglou deuhte'n ngahlou deuh uh hi. Aziak pen nu-le-pate zong hih LOVE kichi itna mah tawh a khosate i hi ua, AGAPE itna a zanghthei loute i hi uh hi. Tuaziak in hih LOVE kichi Itna pen a KIKHOL hi.

Hilhchetna: Innvengpa bawng/gan pen i lou a hung suak leh, a khatveina ahih chiang in ngaidam ning e, kichi in, vasuak kiikta henla hileh, a nihveina hita lou maw? Bangchidan a nag an uh hoihtak a keemlou? (Phun leh haan thuah) hung suaksak kiik pouhpouh ua, thei nave uh chin, chi. A thumveina diing a vasuakkha kiikta, tuachiang a, tutung pen chi in gaam/liausak chihbang ahi taangpi hi. 

Pawlpi nasan zong hibang in kilamkaih simsim hilehang kilawm hi. Nna semi khat in mawhna a neih leh, hou ut kisa seng2 meeting sap diing kaal ngaklah chihbang, tualeh houna diing zousiah a a kihoukhit chiang a, a khatveina chi a ngaidam, explanation call chihte kibawl hi. 

I tulai saptuamte uah LOVE kichi itna bekbek kizang ahihman in, Kumpi David in zong Pastor nna seemzou kei leh kilawm kasa mawk hi. Aziak pen David mawhnate Saptuam daan tawh kikalh vive ahi. Paul zong in zong seem zoukei leh kilawm hi.

Tuni a i neih uh leh i zakh uh itna pen LOVE kichi itna ahihleh Pasian tate hilou diing i hi uh hi. Aziak pen Pasian tate'n a pa uh Pasian a kipan a a muh uh leh a ngah uh itna, AGAPE itna nei ua, zong zangh uh hi. AGAPE itna ah ngaihdamna om a, mawhna kichiamteh lou hi. Hilezong LOVE kichi Itna ah ngaihdamna omlou in i mawhnate kichiamteh a, ki-mangngilh lou hi. Hih thu na simna tungtawn in Toupa Pasian in a thupha hung pia hen.

 

Share: