Pu Benny Khongsai Hinkho Thusim Chomcha

Kuki iconic singer Benny Khongsai breathed his last

PU BENJAMIN (Benny) Khongsai hi January 13, 1968 kum chun D. Phailen, Churachandpur, Manipur ah anapeng in ahi. Amahi (L) Pu Vanlallen (Palen) Khongsai le (L) Pi Ngaijahat (Ngainu) laigilga pasal 3 le numei 1 lah a athumna ahi. 

1. (L) Seikholal (Seilal),

2. Tingneikhol (Khokhol),

3. (L) Benjamin (Benny) leh

4. Tongkhohao ahiuve.

Pu Benny Khongsai hin Assemblies of God (AG) High School, Lamka ah 1983 kum chun Class-X anachai in, Churachandpur Govt. College ah BA (Hons) anachai in ahi. School akailai a pat lasah lunglut leh gunchu anahije. 

1985 chun (L) Pu Nungkholal Gangte, Pu Thangboi Chongloi (TC Network), Pu Khupgin chule Hehen Kipgen toh Band anasem uvin, "Moltinchan" Audio Cassette anasemdoh uvin ahi. 

Chujou vin, abanban in Cross Lampi, Pahhoinu, Jangva, Chavang Ahsi, chule adangdang album 11 anasem in ahi. Hiche cassette-ho a hin ama lasem mongmong 70 vel toh midangdang sem la 100 val anakhum in ahi. 

Pu Benny Khongsai deidan in, la kitihi quantity (atam lang) hilouva quality (agunchena) neisah ding tihi ahi. 2006 kum chun Lelte Award (Aizawl) anasang in, 2011 chun JK Musical Award anasang in ahi. 

 All India Radio (Imphal) Thadou Program a jong la phabep anakhum in, chule munchomchom (Shillong, Guwahati, Bangalore, Mumbai, Delhi, etc.) a jong deilhen jal in lasa di'n ana kalsong in ahi. 

Kukite sunga jat le nam, phung le chang khen louva mi'n angaichatna jouse a pontho le thanom tah a pan lajing mi ahi.

1987 chun Manipur Govt. noi a Sericulture Department ah Farm Overseer (FO) natoh anamu'n, 2019 chun Inspector in anakaisang in ahi. 1997 chun Tuibong HQ ah ana kichon in, tuhin B. Vengnom ah acheng e. 

1990 kum chun (L) Pu Damchinkhup Simte toh (L) Pi Chingzanuam Simte  chanu lhumpen toh D.Phailen ECA Church ah ana kicheng lhon in, chapa 1 leh chanu 4 ahing lhon in ahi. 

1993 chun Judaism ah ana lut in, 2000-2002 kum chun BMC (B'nei Menashe Council) ah Finance Secretary ana tuh in, hiche kum mama chun ORT Administrator in jong anapang in ahi. 

Pathen goupeh achate chu anoi a kisunho hi ahiuve: 

Tehilla Lhingboi (tua Israel a um) w/o Jangminlen Khongsai,

Onycha Lenminlun,

Amalia Nemhoikim (tua Israel a um),

Vered Chinnunnem leh

Leora Chongnuntheng ahiuve.

A talent mangcha'n namsung semphatna di'n lungput le toh in pan anala jing in ahi. KKL (Kuki Khanglai Lawmpi) a zong pan hatah in anala'n ahi. 

1997 chun eimi sung a computerized monthly magazine masapen "CHOLLHA" kiti anasem in ahi.

Pu Benny hi diabetes natna le lungchang dammona jeh in January 24 chun Imphal a RIMS anajon un, chua kon chun Sky Hospital ICU ah hapta khat tobang akizen in ahi. 

February 1, 2021 (5:00 am) chun Heart Attack in ahin pha'n, damjou talouvin angaicheng innsungmite le ahinlai a ama  jaila ngaicheng dalha'n Pa kom a choldo di'n anache masa tai.

~ Thang Khongsai

Share: