Behiang ah Revival ni 3 sung um

"I gam ua Revival a tun theina di'n thum hat va ui" ~ Roslyn Kimbuang Zo

Lamka, February 1: Ei singtangmi Zo suan lah a Revival ngai poimaw mi bangzat hiei khat panlahna toh ni thum sung, 29-31 Jan 2021, Behiang khuo ah "Heart of Worship" chi'n revival programme nuam tahin zang uhi. 

Tam revival thupi ahileh "Pasian khu hagau ahi a, huchiin abe ta pouin hagau leh thutah in a be ding uhi (John 4:24)". Ministry thum -- Disciple Making Ministry (DMM), Lainat Ministry, leh YWAM (Youth with a Mission) kigawmkhawm "Undivided Heart" chia kiminvaw pawl tami revival a sai uh ahi.

"I gam ua revival a hing tun theina ding a Behiang a kibawl ahi," chi'n Roslyn Kimbuang Zo, Organizer in gen hi. "Pasian kunga bang mission field a kuan ding ka hiei chia ka dohlai in, Pasian in foreign gamte ahing pe sih a, Behiang a kuan ding in ahing haan zaw hi," chi hi. 

Tunai in Lia Kimbuang in Disciple Making Ministry (DMM) kichi khat Pasian sapna dungzui in pan a, Behiang ah kibulphu hi. Behiang ah Pasian theisahna dungzui in a centre mun ua Cross phut in, thumna mual in zang uhi. I gam uh Pasian lam a halthahna atun theina dia ana thumzing leh theitawp a sem ahi. "I gam uh ka vei mama a, revival ang tun theina di'n thum hat chiet va ui" chi. Tualeh naupang genthei bangzat hiei khat enkawl lellel hi. Pasian zaal in naupang te'n it leh ngai mama uh, chi Zogam Today in mitin mu hi.

Revival sung thugente ahiuleh khangdawng lam ngen ahi a, mun tuam tuam a Pasian thugen leh nasem a umte ana hi uhi. Amaute apat in Pasian thu ngaikhiet in um hi. Mr Muana Langel, Director, YWAM, Lamka-based; Mr Pauchinkhup Tunglut, Director, Lainat Ministry; leh S. Chinmuansiam, YWAM Staff, Shillong te apat thugenna ngainuom huoitah mai ngaikhiet in um hi. Experience ana tuohte uh zong sharing nei uhi.

Tangval Muanding Ngaihte, Biakmuan Samte, leh Roslyn Kimbuang Zo te'n gospel laa ngai tahtah sa in mipite maitai leh kipahtah in um sah uhi. Testimony sharing nei, khangnou khat in mittui luang zen in apa khamthei bawl a shi ahidan gen a, tulai naupang, khanglaite, nu-le-pate thum hat di'n hanthawn hi.

Khenkhat in tambang in gen uhi. Tonjang khuomi, Hill Academy Phaibem a Class IV simlai Nuamneikim (12 yrs) in, "U Roslyn Kimbuang a mel hoi, lasah siam, Pasian thugen zong hangsan ka sah. Ka zahtat mama hi," chi. Unau 8, pasal 4, numei 4 lahah a 4-na ahi a, "Ka pa neh suitom ahi, kei ka let chieng, Medical Doctor ka hi ut hi", chi.

"Kei ka let chieng Airhostess ka hi ut, lai ha sim a ka sim ding. Ka nu leh ka pa government service hilou," chi'n Chinghounuam (12), Class-V student, St Mary's School, Behiang in gen hi. "Ka U Roslyn, ken maw thugen siam kasah, hang zong hangsan ka sah" chi hi.

Hill Academy Phaibem a Class-IV simlai, Lundeihching gendan in unau 7, pasal 1 leh numei 6 lahah a 4-na ahi a, "U Roslyn te'n Tonjang a Revival ang bawl ua pat, ka pa a lungsim hing kihei in, tuazou in Moreh ah camp va lut hi. Tu'n ju dawn nawnlou", chi'n Zogam Today hil hi. Ama'n a let chieng doctor hi ut chi.

"Kei Piangtha sah, Baptisma zong tang, hagau zong tang. Sil ka bawl khiel chieng a ka lungsim nuom lou, ka zau zel. Zingkal devotion ka pei chia Pasian kunga ngaidam ka nget zel," chi'n Thang Joshua, Class-V student, St Mary's School, Behiang in gen hi. Agenbehna ah, "tambang a Pasian kunga thumna nei ding, ngaidam ngen ding te khu ka U Kimbuang ang hil ahi," chi.

"Kei ka pa Chennai a hotel a sem, ka pa'n khamthei a bawl lai lai, sum chu hing ha zelzel. Ang phone chia, pa khamthei na bawl lai ama, ka chi chia, bawl nawn sing a chi. Ahiva a bawl veve. Ka pa adia Pasian kunga ka thum gige. Ka nu'n singpi hotel a bawl. Ka U Kimbuang ka mu chia ka kipah mai, ka gen di ka theilou" chi'n nuapang kum 12-mi khat in Zogam Today hil hi.

Zogam Today in Behiang Tung a teeng Pa Thang Samte kichi khat toh lamkal a kituo kha, ahoupina ah, hichi'n gen: "Ka tate 5 (Numei 3, Pasal 2) ahi ua, a tahpenpa tu'n Lamka a Class-10 sim in um hi. A dang teng pe'n St Mary's School, Behiang a kaai ahi uhi." chi.

"Meihol hut leh singtanglou bawl a nesui ka hi. Melhol khu ha khat ah bag 18-20 lah bang kila zou. Bag 1 ah Rs 150 in kikhong giap hi. Gari luttheina tan ah meiholte ka koi a, a lei te'n tuana pat gari toh pawkhia uhi," chi.

Tualeh Sunday Zan kikhop a, anualang khat a tou, nupi khat Nu Man kichi khat in, "Roslyn Kimbuang leh a lawite mama, sawtpi taam lai leh uh ut huai sam e..." chi'n Zogam Today kungah gen hi.

Tutung revival a Kimbuang leh a loite ahing pei uh khu, ka kipahpi mama mai. Naupang, nu leh pa tampi'n Pasian thu leh laa ah kiphattuampi mama mai hi chi'n gen.

Tutung revival ah Lamka apat mi 40 vel kuan uhi. Organizer Undivided Heart-te ahiuleh Pasian thu leh laa a kipe zou, i gam ua revival tunna ding a lampi bawlte ahi uhi. Sum leh paai a bangma a nei sih ua, revival a nei ding chieng un sum leh paai sui theithei na ah sui uhi.

---

Exclusive Interview: Roslyn Kimbuang Zou

Visit: https://www.khalvontawi.com/2020/07/zt-exclusive-interview-roslyn-kimbuang.html

----

~ Zogam Today | 02-02-2021

Share: