ZOMI SUNGA PAWL TUAMTUAM MAKAITE KITHUAHKHAWM

Lamka 2020 December 28: Zomi Re-Unification Organisation (ZRO) makaihna in tuni December 28, 2020 in Zomi Council leh Zomi Frontal Organisation tuamtuam panin Cabinet Members teng in kithuahkhawmna leh Pasian tungah lungdam thututna hun zangkhawmna nei uh hi.

Kenneth, Vice President ZRO in hun lamkaih a, aman a genna ah covid-19 ziakin Zomi CSO-te tawh kithuahkhawmna leh kikupkhawmna ding hun lemtanglou himahleh 'Nampi' nasepna dinkhawl theih himawklou ahih manin ZRO, ZC leh frontal organisation te'n septheih bangbangin semzom zel uh chi-a, Pasian vualzawlna leh makaihnate ziakin kipahthu genna leh nasepsate kizaksakna hi dingin programme zat ahihdan gen hi. 

John K Ngaihte, Chairman, Zomi Council in hun paisa a Zomi Council kalsuanate leh zanzek a Delhi leh Imphal ah, a kalsuannate uh report pia a, Centre Government MHA a mi poimawh tuamtuamte a kimuhpih hun un Zosuante adia Zoland Territorial Council bawlsak dia ngetna pia uh chi-in gen hi.

Nangzakai Suante, Secretary, Zomi Council  in tulel dinmun in Zomi Council kalsuannte lamzang mahmah hi'n gen a, zanin Union Home Minister, Amit Shah in Imphal hong phak hun ah Zomi Council makaite tawh kimu ding cih himahleh, ahuntakin kimuhsak a omlo uh chi-in gen hi. Ahih hangin, Zomi Council in memorandum a piaklutsate uh zaksak thakna dingin piak behlap kik uh hi. Hun lemtang masapen ah taksa mahmah a, Amit Shah tawh kimuhtheih ding lametna nei uh ci-in zong gen beh hi.

Ketheos Zomi, Secretary, Ministry of External Affairs, ZRO in a genna ah, ZRO tungtawn a nasepna om dingte sepma a genkhiat hilo-in, sepkhiatsate lakah tamlou kigenkhia zel lel hizaw chi hi. Zomi sunga om pawl khenkhat te'n, Zomite taikan sawm zel mahleh uh hitheilou ahihdan theichian semsem uh chi hi. Union Home Minister in zanin Manipur hong phak hun a phaizang CSO te'n agenda a piaklutte un gam teng huamkha ahihziakin eisung ah kikheuhkheuh phatuamlo ding chi-in zong gen hi. Nam lianzaw te'n singtangmite' political talks zekaisak ding deih in, tua hunsung hunlem a la-in amau(meitei) bek hamphatna ding khuatkhiat sawm uh chi-a, tua bang dinmun ahih manin khat leh khat kipanpih tuah a kalsuankhawm hunta chi hi.

Huntawp ah, KC Smack Zomi, Secretary, GAD, ZRO in vote of thanks gen a, aman a genna ah, maban a MDC election om ding tawh kisai notification kisuah nailo ahih manin, a lunglutte adingin kisakkholhna ding hun tam mahmah lai a, tampi seng/suplawh a mimal khasiatna ding tan tuahlohna dinga pilvang dingin deihthu gen hi.

KHALVONTAWI

VOICE OF THANGKHAL

Share: