SUALAM MIPILTEN MANGPA JESU VEHNA | Pastor M. Thangboi Zou

Thumapui: Khristmas na ding Ni 1/2 akivat ta a, nuom leh kipahtah a mangthei lou ding (Khopi a teng ten) ihilai un, a pawi sangin lungtang siengthou tah a man khu athupi zaw hi, chi thei masa chiet lei ka nuom mama hi.  Tunin tamna i thupi khu laibu tuomtuom pansan in ka hing kaikhawm a, achingla leh akivat tampi um ngei ding in zong ka gingta hi, simtu zousie in achingla leh akivat te noute theina toh ana suhdih chiet unlen, hoitan ana sim chiet din Pasian min in kahing ngen leh chiel hi. 

Tunin. Sualam mipil thumte tanchin tomkim leh a silpiehte uleh a etsah, tualeh ahing kalsuondan uh moltah a kikum dingin ka hing giel a, simtu zousie Mangpa Pasian in thupha hingpe chiet tahen, chi ka thumna ahi hi.

1.    Sualam Mipilte tanchin tomkim envai:

Tamna Sualam mipilte tanchin ahileh getdan tuomtuom in a kigen a, mun tuomtuom apan hing kipan chiet hi'n Laisiengthou siemte leh Tangthu gielte'n (historian) amu khieh uhi. Amaute khu Leeng hichiet ahi ua, amin uleh ahing kipatna uh, tualeh asilpiehte uh ahileh, tam anuoi a bang ahi:

i) Balthasar (Jepethson): Ama khu Aigupta mi Damaska Leeng ahi. A khente gendan in Ethopia mi achi uhi. Ama khu Kum 40 velmi ahia, a tahsa tung adup chetchut a, a khamul sau ahi. Aman "Murrah" apieh hi. Murrrah in a etsah ahileh athuohna leh ashina ding a ensah hi, tualeh a Kha (bitter) zong akichi hi.

ii) Caspar (Hamson): Ama khu Grik mi Arabiah Leeng ahi a, akhenten Tursur mi zong achi uhi. Ama khu Kum 20 velmi ahia, atahsa pua khu misang, khamul neilou, midamtheita, asan hiuhiau a, khangdawng melhoitah ahi akichi hi. Aman "Ngun/ Sana" apieh hi. Tamin a etsah ahileh Leeng (King) ahina a ensah hi.

iii) Melchoir/ Melkheuda (Shemson): Ama khu Hindu mi Ethopia ahi a, akhenten Nubia leh Arabia gam a Vaihawmpa achi ua, ama khu mineu, Khamul sau, tualeh kipawlkhawmna a ja umtah mi ahi achi uhi. Aman "Bego/ Chim" apieh hi.  Tami'n Siempu Pasian a ding ahina a ensah hi.

iv) Magi: Tami thuteng "Magi" kichi khu "August" chin zong akithei hi. Tami khu Medes mite leh Persia miten amaute hatlai a Biehna a nasem mite min ana hisa uh ahi. Amaute khu "Thuguh kem, mipil leh Pasian nasem ahi ua, tualeh theina giltah anei uhi, tua theina giltah anei u'khu Aasi siemna (Astronomer)" akichi hi.

Khovel a mipilte suidan in BC 7 in Aasi lienthum (3 planet) ahing lengkhawm ua, mipilte Aasi mu zong tam Aasi hi ding hi achi uhi. Nanleh tampen sil hitheilou ahi, aziehpen Bible in ahinghil danin Aasi khu Naungeh (Jesu) umna tungah akhawlta hi (Mt. 2: 9). Aasi ngeinate vang tuabang in khawl/ ding ngaisih uh, tuami ziehin Bethlehem Aasi pen Aasi lamdang Mangpa Jesu pien hun phuonkhietna ding leh Sualam mipilte Jesu Khrist kunga puidie Pasian silguon ahi, chilou thei ding koima aum sih hi. Sualam mipil thumte khu Pasian in amaute azat ahi. Sualam mipil thumte khu tuinitan in a Lugu hom (skull) uh khu Cologne Biehinn ah aum nalai hi, akichi hi. Mipilte gendan in amaute khu Gentelte ahi uh, achi uhi.

 

2. Mipilten I Mangpa Jesu piending athei dan uh:

Amauten I Mangpa Jesu Khrist hingpien dingdan atheidan uh ahileh Guolneite genloh napan athei uhi, chi'n akigen hi. Juda guolneiten agendan ua, hun khat chiengin Lamkai ding Aasi khat hing vah doh dinga, tuami'n mite akhelna uapan, ahun khe ding a, Zalenna ape ding chi agingta na zal un kum tampi tam Aasi khu ana enzing uhi. Amaute ngazing leh asuizing uh tam Aasi khu amaute mudia ahing umdoh ahi. Mipil thumten Aasi angmu tah un anua ahing zui u'leh Bethlehem Bawnginn sungah naungeh Jesu Khrist khu avamudoh ta uhi. Tuachin chibai buh in silpieh ape chiet uhi.

3. Mipilten sillamdang atuate uh:

Tangthu a ithei bangun Sualam mipilte khu Babylon pan san Aasi khu ahingzui pai uhi. I Mangpa Jesu pienthu azah tah un, aumna uh pansan heisung a pieng ahiei chia asuidie ahing kuon lai un, I Mangpa Jesu Khrist chibai abu masang ua, sillamdang a thei u'khu tamte ahi.

i) A hingkipat ua kipan atunkie tadong un (Jesu Khrist chibai abuh tan dong un) lamkal ah a Ann neding ua apuote u'khu khat zong akiem sih hi, chi athei khie uhi.

ii) Aasi in amaute Bethlehem lam a apui lai un amansuo tamoh uhi. Bethelehem zuon apei laiin azui uh Aasi in Jerusalem khopi lam ah apui tamoh hi. Amaute geldan in Jerusalem khu Leeng pienna mun hingeidin angaisut ta uhi. Jerusalem ah aluta un, khopi a um miten mipilte amu tah un lamdangsa chiet uhi. Tuachia kidang asaguoh uh hilou in, mipilte thugen in alungsim uh asuhbuoi deudeu nalai hi. Mipilte'n sil umdan amute uleh azate uh lamdangsa sengseng un, mipil teng khu Leeng Herod innpi ah apuilut ta uhi. Tuachin mipilten Herod leh mipite mai ah tambang thu ahing gen kheta uhi. "Judate Leengpa hing pienna hei sung ahiei? Sualam a Aasi kamu ua, Ama be dinga hingpei kahi uhi" (Mt. 2:2) achita uhi. Tamthu Leeng Herod leh mipiten azatah un, Herod Innpi sung khu lungzinnan adimta hi. Tamthu Leeng Herod in azatah in, a gamsung a Guolneite kaikhawm in sil umdan adongta hi. Guolneiten Judate Leengpa khu Bethhlehem a hing pieng ding ahidan ahilta un, Leeng Herod in thangsietna ahing nei tahi, aziehpen ama thakhel ding Leeng hing pieng ding ahiman in. Tuachi'n Leeng Herod in mipil thumte kungah _"vasui unlen, amun na thei chiengun, ken zong chibai kabuh theina din hing hil un"_ chin agenta hi (a tha nuom aman ahizaw bou hi). Tuachin mipil thumten Jerusalem nusie a ahingpot ta ua, lamkim ah luidung khat amu ua, tuana tuidon ding in a Sangawngsaute (Camel) uh tui donsah die lui a akumsuh uleh, azui zing uh Aasi khu ahing mu kieta uhi.  Gendan tuom khat ah, "Mipil thumten Jerusalem anuosie jou tahun, azui uh Aasi amukie uhi" chipawl zong aum hi.

iii) Mipil thumte zie'n Siemputen zong khelna ngaidamsa dinga I Mangpa Jesu Khrist Bethlehem ahing pieng ahidan, akitheisa ta uhi.

4. Mipilten I Mangpa Jesu Khrist chibai avabuh dan uh:

Mipil thumte'n azui zing uh Aasi ahing mutah un akipah mama ua, tuachi'n azui ua Aasi in asuipa uh Nazareth Jesu Khrist puonnem a kituom Gan annkuong sung a kisiel avamu ta uhi. Tuachin amauten silpien khat chiet pie in ang kinualeh kiata uhi.

Laisiengthou siemte suikhiet/ mudan in, mipil thum teng in I Mangpa Jesu Khrist pienjou a chibai avabuh ni u'khu 6th January hiding in agingta uhi. Tualeh Mipilte gendan in I Mangpa Jesu chibai avabuh lai un, I Mangpa Jesu Khrist khu Hapta Kalni (2 weeks) hipan nailai dingin asui khie uhi. Mi dangte suikhietdan ahileh, I Mangpa Jesu Khrist Kum Ni (2 years) achinua a, mipilten Igypt gam a chibai avabuh uhi, chia gingta pawl Laisiengthou siem mi aum veve uhi. 

5. Mipilte khu amopuohna uh ngaikhote ahi uhi:

Tahsalam hiin, Hagaulam silthu hitazong leh, koipou a mopuohna ngaisa/ gelkho a zou mi khu mi khu mi lawching leh guolzawl na atang ding uhi. Tua mabangin, mipil thumte zong khu a mopuohna uh ngaisa/ gelkho mi ahi zieh u'leh, ahapan na ziehun, amaute toh mun kigamla aum I Mangpa Jesu Khrist chibai vabawl in silpieh zong apechiet uhi. Mopuohna zoute ahiman un tuni chiengdong in, I Mangpa Jesu Khrist pienthu akigen na teng ah, tamna mipil thumte tanchin zong akigen zingta uhi. Amaute apilman uleh asiemna ua I Mangpa Jesu Khrist avasuikhiet uh hilou in, a mopuohna uh gelkho/ ngaisah mi ahi zieh ua chibai avabuh uh hizaw hi, chin Laisiengthou siemten agen uhi.

6. Bawlkhelnate, bawldih dia panlate ahi uhi:

A zui uh Aasi amansuo ta chieng un, Jerusalem khopi ah avalutta ua, tuanah khotheilou a lungmuong tah a um Leeng Herod avaphongkhie ta uhi (Leeng tha hing pieng ding chia avadoh u'khu). Leeng Herod in ama thakhel a Leeng pieng dingpa tha ahingsawm a, mipil thumte kungah, "vasui unlen, amun nathei chiengun, keizong hinghil un, chibai kabuh theine dingin" chia agetpen, I Mangpa Jesu amutah un, leeng Herod vahil nonlou dingin Pasian Vansawltah in mipil thumte lampi tuom a peidin thu apieh tahi. Mi koizong Jesu Khrist a Hinna tha (new life) ahing nei chiengin, alampi lui uh zui kia nonlou in, lampi tha azuita uhi, chi tamna mipil thumte pan zilkhiet leh mukhiet theiin ahing um hi. 

"Mipil ngen hi ua, bangzieh a azui uh Aasi amansuoh thei uh adiei?"

Tamna mipil thumte khu "Sualam mipil thumte/ Aasi siemte" chia chimte ahi ua, bang achileh azuilaipi uh Aasi mansuoh thei uh adiei? Chia nabuoite moltahin tambangin hilchetna ipi ding hi. Judate Kumpi hing pieng a chibai bawldie hing kuon ahiman un, Bethlehem khota mun ngiempen a vapeipen lunglut huoilou, thamlou in Kumpi pienna Mundie gingta lou uhi. Bethlehem khopen kho neunou ahia, Judate Kumpipa hingpienna mun die neusa uh, Bethlehem atun nading uh 6 Klm. Akivat giep tahin, khovel lampi/ ngaisutna toh hing gelkha tah chiengun, Jerusalem khopi ah avalut uhi.

Tamna pan zilkhiet thei ding khat ahileh, mipil hi in, mi siem hi in, mihau hitazong leh Pasian deina bang nuol a, eima pilna, siemna, hausatna suong a "a hing siempa Pasian nuoh izui sawm leh tamna mipil thumte bangin kilam vai thei ahia, thamlou in, Leeng Herod I vaphong kha ding hi. Juda gam sungleh akimvel a pasal naupang kum 2 nuoilam mi 200 valten shina atuoh loh uhi. Thamlou in, Pasian nna nasep khawmpite suh hase thei ding na hi ziehin, Pasian lam enkawm a Pasian nuazuite a dingin damna leh bitna asua thei hi", chi ahing mukhesah hi.

Tamna pan bang na zilkhie ei? Na zilkhiette Pasian thupina ding leh Pasian thutah thei nailoute hilsawn ding khu na mopuoh ahilam thei zing inlen, agensawn leh ahilsawn theite hichiet din Mangpa Pasian in hing guolzawl chiet tahen, Amen.

"Khristmas zatnuom chiet vai…. Kum tha in nang adin damtheina, lawchina leh guolzawlna hing tung chiet tahen."

Share: