Khristmas 2020~ Pastor Thangdoulal Suantak

Khristmas Gammanpihte Hihdah Ni Aw!

By: Pastor Thangdoulal Suantak

Thupatna: 

"Christmass" kichi thumal pen ei haam hikei lezong, ei haam bang a i ngaih uh kam mal khat ahi. Christ i chih uh Greek haam pan a kilasawn Saap haam ahi a, ei haam in "Thau nilh" chihna ahi. 'Mass' pen Hebrew ham pan a kilasawn mipi (mitampi) omkhawmte chihna ahi.

A khaw nungin MASS chih thumal in theihsiamlouhna tun in mite buaisak-pha mahmah a, hih hun laitak in Roman Catholic-te'n Chritmass a na min vawh dan uh pen 'Jesu theih gige na pawi' ana chi uh hi.

England gam a saptuam pawlpi om masa penpente pawl in hih Christmass lungdam pawi pen 'Christos Mass' chi in ana zang uh hi. Spain gam a saptuam pawlpite'n Natividad chi in ana min vawh uh a, Italy a Saptuam masate'n Natale a na chi uh hi. French a Saptuam masate'n 'Noel' a na chi leuleu uh hi. Germante a din 'Ann ngawl a Pasian biak hun chihna ahi a, tua pen German haam in 'Weihnacht' chih ahi. A khiatna ahihleh 'Siangthou taka laan or Piakkhiat Zaan chih na ahi. 

Tulai eite dan hileh pen Christmass 'Neekkhawm Ni' zong kichi khathei diing a, hite saang in zong, kisiamn, kicheini zong hikha maithei diing hi. Lai Siangthou sung a i muh Christmass leh a kizakhdante leh eite'n tuni a i zakhdante uh enthak ni.

1. Khristmas Hihna Diing Diktakte, Leitung in Sumzonna Suaksakta Hi. 

Jesu pian hunlai in, Gankuang gei ah, Vuuk, Vaantungmi, Ganta leh Belaampute themkhat bek a om ua, tulai in tua Gankuang gei ah eima suangtuahna dungzui in a behlapna (imaginative additions) tamtak omta hi. Khristmas Decoration chi in i teenna innte uh leh i Biak-innte uh, ei hihtheihna saang a zong saangzaw in i zeem ut ua, tualeh ei mahmah zong kizeem ut ahihman un, KIZEPNA in Khristmas hihna diingte, sumzonna suaksakta hilou hiam? Khristian hi in hikei lehang zong, khopi shopping mall-te ah Snow Man lianpipite welcome gate ah kidingsak a, Khristmas Market chihte bang i thangsak mahmah ua, i buaipih diing uh a Khrist saang in a market-lam buaipihzawta i hihman un, leitung in i Khristmas uh sumzonna suaksakta hilou hiam??

Tuachiin Khristmas hihna diing diktakte, leitung khantouhna zang in Setan in a kheelta hi. Leitung khantouhna in i sahkhua paidante uh, i ginnate uh a kheel diing ahi diam? Hilou hi. Khristmas diing chiang bek a i Biak-innte uh, i teenna innte uh leh ei mah taksate i zep diing uh adiam? Ei kizem/ kichei diing maw Khrist zem/ chei zaw diing? Biak-innte kilawmtak a zem/ chei diing maw Khrist zem/ chei zaw diing?? Lk. 10:38 a kigen Martha bang a Ei-lam buaipih lua hang a, (i sat hah diing uh, sa bawl diingte uh, sa huan diingte uh leh a tuamtuamte), Khrist nusiat a omkha zel hita lou maw??

2. Kha-lam Hinkhua Manphatna Kiamta (Spiritual Value Declined).

Khristmas chiang in kizepna i uang bawl mahmah ua, tuachiin khenkhatte bang in, Santa cloud, Flying Reinder, Elves, Frosty the Snow man, Mistletoe, Christmas trees leh lights chihte uangtak in bawl uh hi.

Jesu a diing a eima lungsung kilawmtak a omsakna saang in pawlam a muhtheihte kilawmtak a omsak diing pen i puaknat mahmah uh hileh kilawm hi. Nang bang na chi a? Na kha hinkhua bang a chi a? Sa deihna paipih diing maw? Kha deihna paipih diing? Chihte ngaihsut chingtak ahi.

3. Khristmas pen Kha-lam a Thaksuakna Hun Ahih Diing Ahi. 

Mi zousiah in "Kha hinkhua" kituaktak a i zakhtheihna diing ua Pasian eite (Mihingte) kiang a, taksatak a a hung ompihna kipatna Khristmas ahi. Aziak pen i Toupa Jesu min tamtakte lak ah, "Immanuel" zong khat ahi a, a khiatna ahihleh, "" ahi. Tuaziak in Jesu Khrist pen taksatak a Pasian, mihingte kiang a a omna ahi (Ref. 1Pet. 1:23; Jn. 1:1-5,14; Jn. 1:11-12 (1Cor. 3:16, 23). Ahihleh eite'n i kiang ua om, or eite hung ompih Pasian bangchibang in i mu ua? Khristmas chiang in Kha hinkhua leh Sa hinkhua tehkaak lehang kua pen a lungdamzaw diing ua?? Khristmas pen Pasian-lam a mi thak i hihna diing uh Pasian deihna leh tupna ahi a, Pasian deihna leh tupnate i zuihpih un i lunglutpih uh hiam? 

Atawpna a Ngaihsut Diingte

 1. Nang a diing in Khristmas kichi bang ahi a? 

2. Neekkhawmna pawi maw? 

3. Bang hiam vanhthak leina maw? 

4. Lawm-ngaihte tawh kimuhna maw?

5. Nuamsatak a omana maw? Jesu tung a buaina liantak om pen mu kawm-kawm a, nuamsatak a om i hi uh hiam? 

6. Ataktak a chih in, Khristmas kichi bang e? 

7. Khristmas ahih dungzui in, kikhawtuahna i khangsak uh hiam? 

8. Ki-sanggamtuahna or khat-le-khat sanggam i hihna uh i khangsak uh hiam? 

9. It taakloute itna i khangsak uh hiam? 

10. Leitung buppi lemna leh hoihna diing in thu i ngeen uh hiam? 

Limtak in ngaihsun ni. Khristmas gammanpih kei ni aw…

Share: