Singngat MLA GS Haupu in Chivu toh kisai in RPZI, ZC leh ZCA kimuhpih

Imphal 14th November 2020: Tuni taklam dak 4:00PM in Singngat MLA Pu Ginsuanhau Zou @ GS Haupu quarter Babupura, Imphal ah MLA pu in Research & Preservation of the Zo Identities (RPZI), Zomi Council (ZC) leh Zomi Chief Association (ZCA) te Chivu toh kisai houlimpihna neihpih hi. 

Pu R. Sanga in meeting patna thumna a neih zawh in, Pu GS Haupu in Chandrikirti Park toh kisai a amah dinmun pulakna nei hi. Amah gen dan in December 2017 lai a Zougal Centenary vaisaite'n Chief Minister Biren toh kithuzak a, Chandrakirti Park honna di program vaiguan bawl uh ahi chi a, amah bialtu MLA dot a le om kha lou in, Zougal Centenary honna dia hawh lai, Chandrakirti Park foundation stone hon dia hong om pen maksa a, foundation stone ah amah min bang a om 'surprise' mahmah ahih dan gen hi. Ama'n Chandrakirti toh kisai history bulbal theithuklou ahih ban ah, amah bial MLA ahihna zal a hiai park toh kisai nasepna enkai dia CM in mohpuakna guan ahih dan zong gen hi.

Tunai in pawl khenkhat in CM pu va mu ua, amau deihlam ngetna a bawl kawm ua Chandrakirti park protection pe dia gen bang a om ahih dan gen a, CM pu in Chandrakirti Park toh kisai nasep sutzop ut in, bialtu MLA toh Arts & Culture Director pa toh November 9, 2020 in amun va en khe dia sawl a om ahih dan zong gen hi. Huchia park bawl thouthou di ahih leh chi in Guest House toh Chowkidar quarter bang le suggestion kana bawl beh ahi chi hi. November 12, 2020 in Chivu mun a va phakna CM pu kiang ah report a piak kawm in, "Chandrakirti park bawl di i hih leh kou history le i telsak di ahi" chi a, CM pu in le "phajare, phajare" hon chih pih ahi chi hi. Pu GS Haupu in a gen zomna ah, ama'n history theihthukkei mah leh, development hoihsa ahih kawm a, ei history le telsak sawm teitei ahih dan gen hi.

Pu GS Haupu in thu a gen khit in, pawl tuamtuam paikhawmte akipan ngaihdan genna hun pia a, amasa pen in RPZI heutute'n amau pansan genna hun nei uh

hi. RPZI akipan Chairman Pu Khamkhanthuam, General Secy Pu V. Chinkhan
pau leh Vice Chairman Pu Thangneihkham in RPZI panna san leh bialtu MLA in pan hon lakpih dia a deihte uh genna nei uhi. RPZI in development nasep doudal hilou in, Chivu mun a Meitei te'n history dikloutak inscription a gelh uh pen deihlou ahih dan gen ua, hiai history dikloutak pansan a park ahih kei leh suangphum i bawl a leh singtangmi leh phaizangmi kal ah kimelmakna chi tuh kihi thei dia, sisan suahna bang le piangthei di ahih manin, deih huai lou ahih dan gen uhi. Pu GS Haupu in CM pu kiang a hiai history dikloutak kigelh pen ka mipi te sentiments sukha lua ahih man in hiai park bawl toh kisai khol phot hoih a sak dan gen pih a, bawl teitei di ahih leh hiai thugelh (inscription) bawl dik dinga CM gen pih dingin RPZI heutu te'n Pu GS Haupu ngetna bawl uh hi. 

RPZI heututen a gen khit un Pu R. Sanga in thugenna nei a, RPZIte panmun support pe kawm in, ASI in Manipur Archaelogical dept-te lai a piak pen ua Epigraphy 26 toh kisai dispute om pen sukvaiveng ahih ma, hiai Park bawlna pen delay phot hoih a sak dan gen hi. Zomi Council Chairman Pu John Khatthang in le history dikloutak a kigelh pen bawldik tuak asak dan gen a, gam leh nam a dia pang gige di ahih dan le gen hi. Zomi Chief Association lam a makai Pu Khamkhohau leh Pu Paukhenkhup te'n le a ngaihdan gen ua, RPZI panmun support ahih dan gen uh hi.

Makai paikhawm te'n Pu GS Haupu in amah bial sung a issue om toh kisai consultative meeting a sap pen kipahpih ahih dan uh gen chiat ua, kihoukhawmna a tam zawh phot leh kitheihsiamna piang ahih dan gen uh hi. 

Pu GS Haupu in thugen teng a ngaihkhiak khit in, Chivu toh kisai history theihbeh tampi nei ahih dan gen a, aman le a kinthei lam a CM pu kimuh pih a, Chivu stone inscription khek ahihna dia CM pu ana gen pih dingin gen hi. Politics ah bargaining om gige a, ei lam in le bangtan hiam a theihsiamna nei a lungsim kihongtak a om ding a deih dan zong gen hi. A poimoh bang zel a kimu tou zel ding lemsak ahih dan gen kawm in, tawpna thumna Zomi Council Vice Chairman Pu Khatkhotong in thumna in meeting khak hi. 

~ Media & Publicity,

Research & Preservation of the Zo Identities.

-------------------------------

KHALVONTAWI

VOICE OF THANGKHAL

Share: