Khristmas Herald:

Tukum Khristmas, Nang Leh Na Innkuante'n Bang Na Hihsakm Sawm Ua?

By: Pastor Thangdoulal Suantak

Theilouhkaal in 2020 in beilam a manawhtou zeel a, tu in a bei diing kuan ahita hi. Kum beikuan sial a Khristiante'n tawndan a i neih Pawi khat a om a, tua ahihleh Khristmas ahi. 

Ahihleh tutung Khristmas, nang leh na innkuante'n bang na hihsak sawm ua? Taanglai mi thupi Herod mahbang a Jesu thu semsemna diingte leh a let semsemna diingte ngaihsun lou a, Jesu thupiakte leh deihnate thah theihna diing/ sihna diing lampi zong in, a ningkiil khat ah zu dawn hiam, lawm-ngaih tawh kimu in hun nuam zakna hiam, zi guukna hunlem hiam, zawnvaakna hunlem hiam in na zaksawm maw? Na lungsim puak bangbang a na innkuante zong hung gamta diing uh ahihziak in hoihtak in ngaihsun in, nang leh na innkuante'n tukum Khristmas bang na hihsak sawm ua? Chih dokna nu-le-pate tengteng kiang ah k'ung dong ut hi.

Nu-ngak tangvaalte aw, tukum Khristmas bangchibang in na zakh sawm ua? Kiheelna hunlem a zakh diing lunggeel na neikha uh hiam? Pasian tapa Jesu Khrist nang tungtawn a mite mai a a thupina a kilatna diing in pan na laksawm uh hiam? Pasian tapa tangkhat nang leh kei khualna ziak a mihing a a hung pianna pen bangchibang a zakh diing lunggeel na ei ua? Hoihtak in ngaihsun lechin nang utna bangbang un zang ngamlou maithei diing na hi. 

Bangteng hitaleh, tukum Khristmas pen Pasian deihna leh hoihsakna tawh kituak a zakh ahihna diing in panlak sawm chiat ni. 

Taanglai Mithupi Herod in Judahte kumpi diing khat a hung piangta chih thu Suahlam mipilte a kipan a a zaak hun a kipan in Kumpi thak diingpa siatna diing bekbek a lungsim ah ngaihsun a, a thah theihna diing lampi zon chihtak in zong hi. Kumpi thak hung hi diingpa kipahpihna a lungsim omkha lou hi. 

Tuni a nang leh ke'n zong Jesu Khrist thupina diing, letna diing leh mi zousiahte kumpi ahihna diing lungsim a i neikei a ahihleh, taanglai Herod tawh a kilamdang lawlou himaithei diing i hi uh hi.

Taanglai Mithupi Herod in kumpi thak diingpa a kipahpih louh hunlaitak in a kipahpih diing mi tam mahmah hi. Jesu pian a a deihlou a dou masa pen Mithupi Herod ahi a, hilezong a deih a kipahpih mi tamtak om hi.

Tutung a Pasian tapa, nang leh kei a diing a hung kipepa na kipahpih kei leh, mi vaangsia hikha thei diing na hi. 

Taanglai in Judahte a diing in  Bethlehem ah Aksi a taang a, tua pen ama'uh a diing a a kumpi thak uh hi diingpa kichiamtehna hi a, hilezong Judahte'n mulou ua, tua pen ama'uh a diing in sup-huai mahmah hi.

Tualai in eite'n zong taanglai Bethlehem Aksi theihzingna a ngaihsun in Aksi, eima eima lemdan chiat un i taang uh hi. 

Taanglai mite Aksi in makaih a, tulai in eite'n tua Aksi i ut hun uh leh hoih i sak hun chiang un i taangsak zeel uh hi, chihtheih diing in omta hi.

Taanglai a mithupi Herod in tha-le-zung in Jesu dou a, thah diing bekbek ngaihsun in nei hi. 

Tulai in eite'n Jesu saang a i poimawh zawk uh tamlua hileh kilawmtak bang in, Khristmas mang manlou or zang manlou chihte, biakna kikhopna a pang manlou chihte leh Jesu thupina diing leh a let semsemna diing a hun pia manlou chih bang, a kitam mahmahta in ka mu hi. Tuaziak in Tukum Khristmas, Nang Leh Na Innkuante'n Bang Na Hihsakm Sawm Ua? Chih i kidokna uh thupi pen ahi.

Bangteng hitaleh, tutung Khristmas pen kilamdanna tawh zakh sawm chiat ni aw!

Toupa Pasian in thupha hung peta hen….

Share: