Tuni Toupa Bawlkhiat Ni Ahi (Laate 118:24) ~ Pastor Thangdoulal Suantak

 Tuni pen Toupa bawlkhiat ni ahi a; nuam leh kipaaktak in i om diing uh hi (Laate 118:24). Tuaziak in zingchiang a dingin lungkham kei un; aziakpen zingchiang in amah a ding aki lungkham nading hi. Tuni a dingin tuni buaina ahun hi (Matt. 6:34). Tuin hungpai un, nou, "Tuni hiam ziingchiang hiam in hua khawpi ah i pai diing ua, huamun ah kumkhat i vataam diing a, lei leh vazuak in i vapung diing uh," chite aw, ziingchiang a bang hung om diing chih na theikei uh hi. Na hinna uh bang ahia? Tuimei tomnoukhat hung dawk a mangkiik bang leltak ahi. Hua saang in, "Toupa`n pha a sakleh i hing diing a, hih hiam, hua hiam i bawl diing," na chizaw diing uh hi (Ja. 4:13-15). Tuaziak in, Khasiangthou gen bang in, "Tunia a aw na zaak uh leh, hibang in thum un: 'Ka pa uh van a om: Na min kizahtak hen; Na gam hungtung hen; Na deihlam van a a kibawl bangin, lei ah zong kibawl hen. Nisial a ka nekkhop uh ann hung pia in. Ka tung ua khialte ka ngaihdam bang un, Kou khelhnate zong hung ngaidam in. Khemna ah hung puilut kenla, Gilou lak a pan hung hunkhe zaw in.'Gam leh sil bawltheihna leh thupina, kumtawn a Nang a ahihziak in. Amen. chi-in (Matt. 6:9-13).

Tuni Tuni Toupa Bawlkhiat Ni Ahihziak In;

1. Kuamah tawh kibuai kei ni. Tuni Bawlpa Pasian lungkimlou thei hi. 

2. Mite thuaklah diing thute genkei ni. Tuni Bawlpa Pasian lungkimlou thei hi. 

3. Kuamah gensia/ housie/ samsia kei ni. Tuni Bawlpa Pasian lungkimlou thei hi. 

4. Tuni a i sepna uah gin-om chiat ni, tua ahihkei leh, tuni Bawlpa Pasian lungkimlou thei hi.

5. Tuni in eima letna diing zonkei ni. Tuni Bawlpa Pasian lungkimlou thei hi.

6. Tuni in i omna leh a pawtna, i-vaak-i-leenna uah Diktat ni, tua ahihkei leh, tuni Bawlpa Pasian lungkimlou thei hi. 

7. Tuni'n eimah a diing a hoih saang in, midangte a diing a hoih banghiam bawlsawm ni, tua ahihkei leh, tuni Bawlpa Pasian lungkimlou thei hi.

8. Tuni'n Jesu nungzuite i hihlam uh kimangngilh kei ni, tua ahihkei leh, tuni Bawlpa Pasian lungkimlou thei hi.  

9. Tuni ei ni/ eima bawlsa ni ahihlouh daan mangngilh kei ni. Tuni Bawlpa Pasian lungkimlou thei hi. 

10. Tuni pen Pasian bawlkhiat ni ahihziak in, Pasian kiang ah thupina pia ni.

11. Tuni in, eite'n thuneihna diing bangmah i neikei ua, hilezong i utdan bang chiat a i zaktheih diing un Pasian in hungpia hi. Nang tuni hung pia Pasian kiang ah bang na piakthuk dia?

Na Tuni Thupukna Bang Hisak Diing Na Hia?

Tu a Toupa nna sep diing na utkei uh leh, kua nna e na sep diing uh, tuni in teel un. Na pubulte un Tuipi gal a a nna a sep uh pasiante maw, ahihke'h na teenna gam ua Amor mite pasiante nna? Ahinlah kei leh ka innkuante'n Toupa nna ka sem diing uh hi," a chi hi (Josh. 24:15). Kinepna lam ah kipak tawntung unla, gimthuakna lam ah thuak vevaw un, thumna lam ah kuhkal tawntung un (Rom. 12:12).  Tuaziak in i lungkia kei uhi. I pulam hinna uh zawngkhal semsem lezong, i sunglam hinna uh Pasian in nisial in athaksak hi. Aziak tomnoukhat sung i gimthuakna uh zaangtak in tangtawn thupina giktak thupi zawsem in ahung bawlsak hi. Sil muhtheihte enlou in, sil muhtheihlouhte i en zaw uhi, aziak sil muhtheihte tomnoukhat sung a diing ahi a, hinanleh sil muhtheih louhte pen tangtawn a ding ahi zaw hi.

Toupa Pasian in Thupha Hung Pia Chiatta Hen

Share: