SMART-PHONE KA UT ~ Pastor Thangdoulal Suantak

Nu-le-pa tamtakte'n a siamlouh uh, hilezong a siam ut mahmah leh a khoihdan a siamlouh uh leh khoihsiam a lunggulh mahmah uh bang ahia? Chiin khat leh khat kidong lehang, i dawnna uh pen SMART-PHONE ahih ngei diing ka lam-en hi. 

Alian aneu, ateek akhangte mittukna SMART-PHONE ahi a, hih Smartphone pen adeihlou kuamah omlou hi zong a chihtheih diing in ka gingta hi. Tulai a KEYPAD-PHONE bek tawite pen SMART-PHONE thamsiamloute ahi taangpi uh hi. A khangtou deuh i chihte un KEYPAD-PHONE leh SAMRT-PHONE tawikhawm ua, a khenmte'n lah, Smart-phone a thuap-thuap in a tawi uh hi.

I muhnate uh zong ngaihsut a neilou in, nu-ngak ahih a, tangvaal khat ahihleh, Keypad-phone tawh kilawmkei, tulai ngaina hikei i chi ua, tuachiin Smart-phone tawi teitei diing ngaihsutna i nei taangpi mawk uh hi.  Tuaziak in i leitung uh pen  Smartphone in hoihtak in a hung zougawpta hi. Hibang a Smart-phone in a zawhna gam a teengte leh hinkhua zanghte i hihtaak ziak un Smartphone tawilou a hithei lou mi tamtak a ki-omta a, Smart-phone tawhlou a hinkhua thomhaau tamtak a ki-omta hi.

Smart-phone ah eima bank mobile app i ki-kep chiat ua, tuachiin i Smart-phone uh pen, khat veivei i bank uh hung suakthei zeel hi. Sum-le-paai kikhaaktuahna ah, laikhaak a thu kikuptuahna ah, lim ki-ettuahna ah, live video a kimuhtuahna ah leh a dang tamtakte ah Smart-phone zanghta i hihman un i Smart-phone uh pen i neih dangte saang in kipoimawh-ngaihzaw phial-phialta hi.

Nupi khawtai (A pasal kiang pan a a pianna a nu-le-pa kiang a kileh kiik) khenkhatte bang in, a tate uh nusia ua, a Smart-phone uh nusia ngamlou uh hileh kilawm bangtak in, a fb account-te uh leh a Whatsapp status-te uah thu kilawmpipi, awmtaktakte bang postthei mawk uh hi. Hih Smart-phone tungtaang tawh kisai a ka lung ka geelgeel leh, Rapture (Misiangthoute lakna) hung tungta leh zong, Smart-phone a game kimawl a, gaaldou pawl in phawkkei le-uh kilawmsa mai ingh. 

Tate tawh houlim a, kimawlnate saang a Smart-phone a kimawl leh lawm-le-gualte tawh i omna mun pan a kitext hiam, ki-sms hiam pen nuamzaw maithei mah in teh, hilezong tate khasethei diing uh ahihman un kidawm ni. 

School Naupangte Kiang a Dokna leh Dawnna Lamdang.

Pasal naupangte kiang a dokna: 

Teacher: Naupangte, 'Bang hileteh na ut pen ei?'

Naupang Dawnna:  Kei Rabit, Kei zong Rabit,

Teacher: Bangziak in?

Naupang Dawnna:  A ngou ziak leh a hoih ziak in.

Teacher: Awle, Awle,

Tun numeite dong ni aw, 

Naupang zousiah: Awle.

Teacher: 'Tulaitak in bang hileteh na ut pen ei? Khat khat in hung dawng un aw…

Naupang Dawnna: Kei Smart-phone ka ut pen hi.

Teacher: Bangziak in? Na gen chiang deuh thei diam?

Naupang Dawnna: Awle, 

Ka nu-le-pa'n Smart-phone a it mahmah ua, tuachiin a omna uh leh a paina mun zousiah uah tua Smart-phone a nusia ngaikei ua a tawiden uh hi. Hilezong kei a hung zawhpih ngaikei uh hi. 

Phone a gin pouhpouh chiang in ka nu'n a hihtheihna zahzah a kinawh in a la pialpual a, hilezong kap in bangteng chi nanleng, ka kiang ah ka nu a hung paikei hi. 

Ka pa a Smart-phone ah game a kimawl a, kei a hung kimawhpih ut ngaikei hi. 

Luai a hung kiveisak diing in ka pa ka chial a or ka ngen a, hilezong a hung ngaihsak kei a, tuachiin ka pa'n a Smart-phone mah a tawi tawntung hi.

Hung kimawlpih diing a ka nu ka chial leh, hung subuai ken, Phone a chatting ka hihlam mulou maw? Chi-in a hung phawkgawp hi. 

Ka pa'n a lup chiang in a khut gei ah leh a kiang nai ah a Smart-phone a koih gige a, hilezong hung kawi kawm in a hung luppih ut ngaikei hi.

Ka nu'n a Smart-phone a charging diing lam a mangngilh ngaikei a, hilezong ka nu in, an a hung piak diing pen, khat veivei a mangngilh zeel hi.

Ka Smart-phone hih utna pen ahihleh ka nule-pa kiang a ka om ut tawntungna ziak ahi.

Na Smart-phone na poimawhna saang a lianzaw in na tate'n nang hung poimawhzaw uh ahi, chih mangngilh kei in. 

Toupa Pasian in hih thu na simna tungtawn in thupha hung pia hen…

Share: