Jesu Min In Bang Na Bawlsawm?? ~ Pastor Thangdoulal Suantak

Bible: Nas. 17:28  Aziak pen, 'Amah a hing a, gamtaang a, hinna nei i hi uh hi'; Noute lak mahmah a laa-phuak khenkhatte'n zong, 'Ei zong a suante i hi,' ana chih bang uh ahi. 

Rev. Dr. Ron Secharan in a gelh, 'Personal Evangelism,' chih laibu ah, Jesu (Jesus) pen Hebrew thumal 'Yehovah Yasha'chih kammal a pan a hung kipan Greek haam a kiletkhia a, ei haam a Jesu chih a hi a, Mikaangte haam a a khiatna ahihleh, 'The eternal, Self-existent God, who saves and keeps,' chih ahi a, ei haam in, 'Taangtawnpa, Amah a hingzing Pasian, hundam a keembitpa,' chihna ahi. King James Study Bible in Jesu min a hilhchetna ah, 'Yehovah Saves' a chi a, hih pen ei haam a 'Hundampa Pasian' chihna a suak hi. Tuachiin Jesu'n eite a hung hundam taktak a, i ni sial mawhnate ua kipan leh beidonnate ua kipan in zong a hung hunkhia a, tuaziak in hing leh dam in tuni dong i om uh hi. Jesu'n eite a diing a a bawl zousiah, a thuaknate leh mawhna kolbulh i hihnate ua kipan a a hung tatdante tengteng i theih chiatsa diing un ka gingta a, tuaziak in tuni in nang Amah Jesu Min in bang na bawlsawm a? Bangmah bawlsam lou? 

Jesu Min In

1. Ei hung demsia leh gensia mite a diing in, i Pasian kiang ah thupha i tawithei diam?

2. Ei hung ngaina (Lai-nat) mawngmawng lou mite i lai-nat in i ngaina aw?? 

3. Mite zahdan i siamsawm aw??

4. I ki-ngiamkhiatta aw??

5. Zuau-gen i tawpsan aw??

6. Neek-taak zonna a i ni-sial nna sepnate uah i gin-om in i muan-huaita aw??

7. Khaini (Golden Tobacco) i tawpsanta aw??

8. Zu (Wine) i dawndahta aw??

9. Teep-le-muamte i tawpsanta aw??

10. I ngaihsutna hoihlou i neihte uh i tawpsanta aw??

11. I nun-neem deuhta aw??

12. I nuakdahta aw??

13. Thusia i bawndahta aw??

14. Mimal hiam, pawl hiam demna leh langpannate bawldahta ni aw??

15. Gualzawhna saang, guallelna i teelzawta aw??

16. I innvengte i itdan i kizilthak aw??

17. I nu-le-pate itdan i kisinthak aw??

18. Khentuam neihnate i tawpsanta aw??

19. Tate, tate zite leh tute itdan leh huaidan i kisinthak aw??

20. Bangbang hitaleh, Jesu min in kikhelna, kilamdanna khat beekbeek i neihsawmta aw?? 

Jesu Min in Bang Na Bawlsawm A? 

Bangmah bawlsawm lou maw? Mite muhna leh theihdan a simching hikei leh zong, banghiam khat beek i bawlsawmta diam?? Jesu'n eite a diing a a bawlsate ngaihsut lechin, Jesu min a bangmah bawllou a om ngamna hikei veh aw, na chikei ama?? Mimal in hiam, innkuan in hiam, ahihke'h pawlpi tungtawn hiam in bang hiam khat beek Jesu a diing in bawlsawm lehang hoihlou diing maw? Hoih na chih leh a kipat hun hita hi, ahihke'h ngak sawmlai diing maw?? Aziak pen, 'Amah a hing a, gamtaang a, hinna nei i hi uh hi' (Nas. 17:28). 

Toupa Pasian in hih thu na simna tungtawn in, Jesu min suang a kilamdang leh banghiam khat beek bawlthei diing in thupha hung pia hen…

Share: