Sheba Kumpinu Taangthu By: Pastor Thangdoulal Suantak

Kumpi thupitak Solomon kiang a vahawh kumpinu Seba tawh kisai taangthu ngaihnop-huaitak, tuni in i suutkhawm diing uh hi. Christiante leh leitung a mi tamtakte'n a theih-ut uh hih Seba kumpinu, ama hunlai a kumpi thupitak kua ahia? Chih thute mun tuamtuam a thu kigelh leh kigente a pan in, hih a nuai a bang in i suutkhawm diing uh hi. Tualeh hih thu pen kei gelhna tan ah hunsak kenla, a ban zonbeh in, na thu muhte ah na ngaihdante hung kikuppih in chiin zong i ki-ngen uh hi.

Sheba Kumpinu Bible A A Kimuhnate 

Sheba Kumpinu tawh kisai Bible in a genna mun a tamkei a, a kimuhna masa pen ahihleh 1Kum. 10na ahi a, hilezong Sheba tawh kisai in thu a genkei a, a silpiak tamdan a genzaw hi. Anihna 2Khang. 9na ah tamlou a kimu kiik a, tuachiang in Matt.12:42 ah Simlam kumpinu chiin a kigelh a, Luk. 11:31 ah zong Simlam kumpinu chiin a kigelh a, Bible mun dangte ah a kigelhna a omlou hileh kilawm hi.

Kumpi Solomon kiang a dokna haksa taktakte dong diing a, Arabia lam a kipan a hung kuan, hih Sheba kumpinu kua mawngmawng e? a suan-le-khaak a kigente kuate ahi ua? Bible a i muhbang ua Sheba kumpinu chihlouh a min dang lah, eite lak ah a thei kuamah i omkai ua, Bible a amin leh a hung kipatna themkhat kigelhte chihlouh, amah tawh kisai a thu a kigelh tamlouh man in, theih a haksa hi. Hilezong Middle East leh Africa a teengte taangthu ah tamtak a kigelh hi.

Sheba Kumpinu Min Dang Leh A Khaak A Kigente

Islam biakna lai siangthou Quran leh Arabia mite leh Persia mite taangthu ah, kumpinu Sheba min Bilkish chi a gelh in a om hi. Ethiopia lam mite taangthu ah kumpinu Sheba min pen Makedah (Simlam kumpinu) chi a gelh in a om hi. Tualeh hih kumpinu'n Ethiopia  mite pupa tawndan ah leh lai gelhna (literature) tawh kisai in poimawhna liantak nei hileh kilawm a kilang a, tuachiin Ethiopian vaihawm mite leh Falasa mite'n a suan-le-khaakte uh hi in a pom uh hi. Hih Falasa mite ahihleh Judah mi Ethiopia a teengte ahi uh hi. 

Sheba Kumpinu Doknate

Sheba kumpinu'n Solomon pilna thute a omna pan a na zakha a hihman in a kiang ah a hung hawh a, tuachiin Bible ah, Sheba kumpinu in Solomon kiang a dokna haksa taktakte a dong hi chih thu bek a kimu a, hilezong a doknate bangbang e, chih taklat in a omkei hi. Tuaziak in hih kumpinu doknate thei-ut mi nang leh kei bek hilou in, a kitam mahmah a, tuachiin Theologian kichi mi pawlkhatte, Bible thu tawh kisai a zilna saangtak neite'n, hih kumpinu'n kumpi Solomon kiang a a doknate bangbang e chih a zonna ua, Israel leibu luite leh Judah nam a kigen Falasa namte laibu luite a kilatdan in kumpinu'n Solomon kiang ah sil kibaklouhna leh lamdanna tawh kisai lam deuhte a dong hi, chiin a mukhia uh hi. Tualeh Kumpi Solomon kimuhpih diing a Sheba kumpinu kuan hun pen B.C. 965-926 kikaal hi diing in gingta uh hi.

Dokna Khatna: Kumpinu Sheba in paak a hoihdan kibang, a tak leh a kheem theihkhen theihlouh nih Solomon a ensak a, "Khoi pen a tak hi a, khoi pen a kheem e?" chiin a dong hi. Hilezong Kumpi piltak Solomon in khuai zangh in tua paak a tak leh a kheem a enchian a, tuachiin a dokna baihlamtak in a dawng hi. Aziak pen khuai in paak kheem a bawm utkei a, paak taktak pen mah a bawm utzaw hi.

Dokna Nihna: Sheba kumpinu'n dokna dang khat a dong kiik a, "Sagih a pawt a, kua a luut hi, nih in dawn diing a bawl ua, khat in a dawn," chiin a dong hi. Solomon in piltak in a dawng kiik a, "Hih pen numeite kha-sial hun neihte tawh kisai genna ahi a, ni sagih sung a daih hi, naupaaina in a zom a, kha kua sung a daih hi, nau nawi a ensakna a hi kiik a, nausen in a nu nawi a nek thu ahi," chiin a dawng hi.

Hihte bek hilou in, dokna haksa taktakte zong Solomon kiang ah a dong a, tua a doknate ahihleh a kuan masang a a gam a mi pil teeltuamte a kipan a a hung puak ahi. Hilezong Kumpi Solomon in ngaihtuah buai zong ngailou in a dawngthei hi.

Sheba Kumpinu Hung Kipatna 

Cambridge University a mi pilte'n a muhdan un, Israel kumpite taangthu kigelhnate leh Islam mite lai siangthou Quran leh Arabian leh Persian taangthu a a kigelhdan in, Sheba Kumpinu leenggam pen, Asia continent sung a om, Arabian Pennisula sim-saklam a om gam khat, tulai kisiatnate in a buaisak gige Yemen hidan in a gen uh hi.

Yemen leh Jerusalem kikaal km. 2000 a kigamla ahi a, Sheba kumpinu khual-hawh hunlai B.C. 965-926 hunlai in kikawmtuahna lamlian hoihtak om diing in lam-et omlou hi. Tuaziak in Solomon pilna theih-utna bek tawh vahawh ahi diam? Chih pen mi pilte theih-ut khat ahita hi.

Sheba Kumpinu Summeetbawlna

Kumpi Solomon hunlai in Judah kumpite'n gamsung kikawmtuahna lampite a opkhum uh ahihziak in, Sheba kumpinu sumbawlna lawktak mura (myrrh) singnai a kipan a kibawl, gimnamtui a kizanghte, leh haal namtui (incense) tawh kisai a haksatna a tuak ziak a Solomon tawh kihoulemna neih diing lunggulhna ziak a hung kuan zong a hikha diing hi a chi uh hi. Tuachiin Solomon tawh kilemna kiptak nei in Sheba kumpinu a kilehta chih muh a hihziak in, summeetbawlna tawh kisai in Sheba leh Solomon in kilemna a nei uh hi, zong a kichi hi.

Sheba Kumpinu'n Solomon tawh Zawlta Nei??

Mi pilte leh Bible zil mi Theologiante leh Ethiopian National Epic (Ethiopia gam a mi minthangte taangthu kigelhna laibu) a Kebbranagat a chih uh laibu kum zabi 14 hunlai veel a kigelh ah, Solomon leh Sheba kumpinu'n zawlta pasal khat a nei ua, a min Menirlik hi a gen in a om hi. Solomon kiang a Sheba kumpinu a vahawhlai in a lumkhawm ua, tuachiin a gamlam uah a kilehta hi. tuachiin a gai a, tapa Menirlik a nei hi. Hilezong kumpinu Sheba in a tapa Menirlik kum 21 ahih dong a pa tawh a kimusak kei a, kum 22 a chin in a pa leenggam Jerusalem ah, a pa tawh kimu diing in a sawl hi, a chi uh hi. Solomon in a tapa amuhtak in kibang a kisa a, taangthuluite a a kigelhdan in, Menirlik a pa Solomon tawh a kisun mahmah ua, Solomon leh kumpi innkuante a diing a zong Solomon tapa hikei chih ngam-huailou khawp a, pilna leh meel a kibangtak ahi uh hi, a chi uh hi. Tuabang a a pa Solomon kiang a hun bangtan hiam a omtak in, Solomon in a ngai a, kileh lou a, a kiang a om a, goutan zong pia diing in a zolta hi, tuachiin hih thute ziak in Solomon innsung ah buaina a hung omta hi, chiin zong a kigen hi.

Sheba kumpinu dawithu siamna, meel hoihna, a keeng a mul tamdante, Solomon in amah kimuhpih diing a a sap ahi chih thute leh a taangthu dangte hunlem dang ah genkhawm thak mai ni aw!...

Share: