Interview: Miss Dimzangai, Editor, Ruth Messenger

NU LEH PA lou nasem ahiziehin, anaute don ding toh innsung nna toh, buoi thei den khat ana hi. Innsung khosah hasat ziehin school zong hoitah in ana kai zou sih hi. Hinanleh ama khu i gam ua numei "Editor" umsun ahing suo a, kum 24 val Editor apuo a, tu kum a 25-na ahi.

Ama ahileh Lamka pansan a kibawl Christian Magazine kithang mama, "Ruth Messenger" Editor Miss Dimzangai ahi. Zenhang Lamka khuo a teeng Pu Tualzakham Khuptong (1920 - Jan 1999) leh Pi Thangkung Khuptong (1927 - May 1, 1999) tate 7 -- Pasal 3 + Numei 4 -- lahah u-pa pen, 19 Oct 1954 a piang ahi.

Page 36 a kibawl Ruth Messenger ahileh '2 months' ah Issue khatvei suo ahi, "numei" ngen buoipi Christian magazine sim nop tah khat ahi. Tu kum, December, ah Silver Jubilee meel mu ta ding.

A ngai nuom huoi mama, Ruth Messenger Editor Dimzangai toh Zogam Today Joint Editor Bruce K. Thangkhal houlimna tam anuoibang ahi:

Zogam Today (ZT): Interview thei dia hun nang pieh ziehin lungdam ingh.
Ruth Messenger (RM): Pathian in hunhoih hon piak ziak ahi a, kei le ka lungdamlua hi.

ZT: Tulai bang na buoipi?
RM: Ruth Messenger Magazine diing ka buaipih laitak ahi.

ZT: Bangchidan a Quarantine Centre va tung? Lungkim huai nai?
RM: Delhi a hoh ka hong pai in dan bang a Quarantine Centre a va omkha ka vele, nek-le-dawn gilvahna diing khop hon pia ua, lungkim huai ka sa.

ZT: Bang achihleh Koppi neilou a um kha? Na Lungkim na maw?
RM: Ha ha ha… Bangziak ahia hitan dinmun a ka om, pasal chihte kinei manselou, pasal neileng tua ka septe deihbang a sem theilou diing, tua Pathian' nna ka sep bang a leng sem theilou diing ka vele (muhlouh ziak ahizaw diam ah…). Tu'n lungkimtak in ka omthei a ka kipak mahmah.

ZT: Ruth Messenger hing bangchi kipat? Tu'n copy bangza na print zel uh?
RM: Ruth Messenger, December, 1995 in kipan a, 'Ruth Weekly' chih minvuah in nihvei kihawm man hi. January 1996 a kipan 'Ruth  Messenger' kichita hi. Idea neitu Mrs Lalrawnkim ahi a, a pankhetu leng amah ahi. A kipattung in laipek 1 in kisun lel a, copy 500-1000 kikal kihawmkhia hi. 1997 June kha a unau kal a kitheihsiamlouhna hong om in, kumkhat kikhawl a, 1998 November in kipannawn a; huai a kipan abu in kibawl hi. Pathian' panpihna ziak in copy 2750 kisun in kihawmkhia ahi.

ZT: Ruth Messenger "issue khat" print na'n bangzat a bei?
RM: Rs. 41,000/- val zek khawng ahi.

ZT: Article hing ki-submitte "Paite" haam a bangzieh a translate ngai sese?
RM: Article neite deihdan a Paite pau a kiletkhia ahi tangpi hi. Ets: Rev. Dr. Dongza Thawng article-te ama' deihdan a Paite pau a lehkhiak ahi a, Rev. Dr. Hmansang Songate leh Rev. Vanlalzuata-te article-te bel Paite pau a lehkhiak di'n kingen hi. Aziak bel, a simtu tamzaw in amau' pau a theihlouh ziak un.

ZT: Ruth Messenger ah Editorial Board koi teng nahi ua? Banglam na buaipi pe'n a?
RM: Board Member-te a [Ruth Messenger] cover ah kitaklangte ahi, Editorial Board kihivek mai. Magazine avek phial in ka buaipih ngai hi. Asst. Jt. Editor in Hmar pau a translate a, proof-reading mi nih in a bawlzoh chiang un ken final ka bawl hi.

Ruth Messenger Editorial Board:
Editor: Miss Dimzangai
Finance -cum- Joint Editor: Miss H. Khawlching
Assistant Joint Editor: Ms Thangngaihmawi
Founder: Ms Lalrawnkim

Circulation Manager:
Ms Chonghminglian
Ms Ngailianmawi

Consultants:
Rev L Kham Kho Lun
Rev T Zuanlal
Rev Dr H C Stephen
Rev Stephen Chinzathang
Rev Dr V Hangminthang

Advisers:
Miss Liankhoman
Mrs Chingnu Ngaihte
Rev Dr Dongzathawng

ZT: Ruth Messenger Layout Design leh Typing kua'n hing bawlsah?
RM: Layout design ka deihdan ka gen a, Thawnsau te'n ka deih bang in hon bawl uhi. Typing ka hihzel hi.

ZT: Ruth Messenger in semtu nei maw, neilou, bangchi kivaipuo?
RM: Ruth Messenger in semtu tuam neilou, RM asuah chiang a Board Member te'n packing ka bawl ua, thumna/latna ka neizel ua, veng/khua teng a Agent-te hawm diing in kipekhia a, kou hihtheih lamchiat ka sem uhi.

ZT: Manipur State pulam koimun lakah na thot ua, copy bangzat?
RM: Ei singtang mite omna teng hikimphial hi. Copy 650-700 vel kithonkhia ahi.

ZT: Ruth Messenger in Fee muhoih
na maw?
RM: Pathian panpihna in ka muhoih uhi. Ka Agent-te uh a ginom mahmah uh.

ZT: Ruth Messenger toh kisai bang haksatna na tuak kha ngei a?
RM: Haksatna tamtham hi, laisiamlou ka hihman in, laimal gawm leh khen tungtang a ka buai hun a om a, pau zatdan kilawm leh hoih ka taksap hun leng tam a, ka gelhtam leh ka theihna a tawmdan ka mukhe semsem a, ka buai deuhdeuh hun om hi. Thildang ah buaina gendi a omvak kei.

ZT: Ruth Messenger Editor nahi masang in magazine ah nasem ngei or article na gelh ngei maw?
RM: Kum 16 vel ka hihlai in Convention Press ah ka na sem ngei, article ka gelh lam ka theichian kei.

ZT: Na neulai in bang nahi ut a?
RM: Ka neulai a ka ut masak pen nungak chiang a Pathian thugen ahi. A nihna numei police a pan.

ZT: School khoi ah na kaai?
RM: Ka naupan lai in Lamkanuai (tu a Zenhang Lamka) a mission sikul ah ka kai man zek hi. Himahleh, innsung khosak haksat ziak in Class-10 tan le ka simzou kei (unau lak a alianpen ka hi a) ka nu leh pa lou nasem ahihman un, ka naute don kawm in innsung nna ka mohpuakna hipah ahihman in.

ZT: Laigelh lam lunglut lechin kilawm, bangchi'n laigelh lamah na kipia a?
RM: Laigelh sang in mite' laibu gelh sim ka lunglut zaw hi. Ruth Messenger a kipat apan laigelh ka kipan hi.

ZT: Saptuam ah bang panmun na tu a?
RM: EBC Central ah Dorca's (numei pawlpi) President ka hih laitak ahi.

ZT: Bangdia Bible ana zil kha lou, na lungkim na maw?
RM: Grace Bible College ahong kipattung lai 1980 in Class-10 zouloute adin le Bible ziltheihna lampi ahong om a, ka ut mahmah hi. Ka Pa kiang a ka nget leh, "Na naute ahong letdeuh ua, nang  dinmun ahon luahtheih (inn a ngaktheih) chiang un Bible na zil diing" hon chi hi. Ka naute hong letdeuh, 1983 in form lak ka tup laitak in, ka kal (kidney) lam ahong buaia, operation bawl in RMC (tu-a RIMS) kichi ah 1983-1984 kum kizom in operation ka bawl hi. Ka damdeuh in GBC ah form ka va la  hi. Himahleh, doctor te'n le hon recoment ngamlouh ziak un ka kingaise mahmah a, "Bangdia ka Bible zilna hun di Pathian in ahon bawlsak louh! chi in Pathian tung  ah ka vui hi. GBC a kaisawm a form 3-vei hial ka laknung inle operation ngai in ka om zihzeh a, Bible zilthei di'n ka chidamna in a zohlouh ziak in ka lungkim theikei hi. Nikhat, Rev. N. Phungzapau (GBC Principal ahihlai) in, ka kiang ah, "Ngai, nang zaw Bible zildia Pathian in kong hon honsaklou  ahi diing, na utlouh leh tuplouh le hilou hi a, lemthei mahmah lou, Pathian min a na kalsuannate ah, mite'n, 'Nang Bible zillou hiteh,' chi-a hon sawlkik kei nak ualeh lungkimta mai in, Pathian in lemsalou hikha diing ahi," chi'n hoihtak in hon houlimpih hi. Huai ni a kipan Bible zil ka utna ahong nepdeuh a, Pathian' hon pidan ka theisiam hiaihiai a, lungkimna khat ka hon neithei khong hi. 

ZT: Theology lamah eimi numei kiva'ng a kichi a, bangzieh adiei?
RM: Theology lam a numei a kitawm ziak hi a ka ngaihdan tuh, tua lampang lunglutna dia kisinsakna innsung leh saptuam sung a atawmluat ziak hidi'n ka ngaihtuah.

ZT: Na piangtha dan nang gen thei diei? Kuan hing Baptisma?
RM: October 1972 kum in Singngat a EBC Mission school ah Bible camp a om a, thugente' tungtawn in Pathian' houpihna za in mikhial pumlum ka hihdan Kha Siangthou in hon theisak a, ka beidong petmah…! Himahleh, Jesu'n ka khelhna tengteng ngaihdamna dia Khros a athuakdan leh ka khelhman sihna ana pekhinta ahihdan chiangtak a thei in pianthakna\kitheihchetna ka nei hi. Pastor E. Paukhanlian khut ah Baptisma ka tang.

ZT: I gam ua Pasian thugen - Evangelist leh Pastor te'n bang tasam pe'n in na mu a?
RM: Pathian thugen - Evangelist leh Pastor-te' taksap pen hi a ka na muh ahihleh, "mittui" ahi. Kha mangthangte veina a "itna mittui" kitasam pen hi in ka mu.

ZT: Na hinkhuo ah kisikna na nei kha ei?
RM: Thil neuhneuh ah kisikna diing omtham e. A pipen in, kei hihtheih hikei mahleh, lai ka na sim teitei louh ka kisik pen hi. Tu-a ka dinmun ah kisik tuntun na diing ka thei tadih kei hi (hinkhua kisikna tawmdeuh dia zat ka thil tup khat ahih toh kiton in Pathian' hehpihna ziak in tua ka sikna diklai hi a ka theih ziak in). Lai ka na sim hamham louh ka kisik pen.

ZT: Na hinkhuo ah kipakna na mangnilh theilou a um ei?
RM: Ka pianthakni in ka kipak penpen a, ka mangngilh theikei a, ka mangngilh ngeikei diing.

ZT: Nam-le-Nam kal ah bangchi'n kitanauna (brotherhood), kituakna (unity) sukhat thei ahi diei?
RM: Ngaihdan mawltak in genle: Saptuam te'n lungkelou in a hitheitan in panla zel in, khua leh khua, veng leh veng khawng kivehtuah in thumkhawm, kapkhawm-maukhawm in Pathian' tung ah khelhna thuphatawina neikhawm theizel lehang phatuam diing in ka gingta.

ZT: Bible na simsuo kha tai?
RM: Ka simnop atam ziak in 7-vei ka simsuak man a, mit hatlouh ziak in simsuak dian abanban a sim lampang ka khawlsan hi.

ZT: Old Testament leh New Testament ah bang sim nuom pe'n nasai?
RM: Thukhun Lui (OT) ah Jawlneite laibute, Thukhun Thak (NT) ah Tanchin Hoih-te leh laikhakte.

ZT: Bible ah na ngaisa'ng pasal khat leh numei khat tel di hilechin koi na tel diei?
RM: Joseph leh Esther.

ZT: OT leh NT ah mi mudah/mihuat (most hate) khat tuotuo tel di hitalechin koi na teel diei?
RM: Ka theikei

ZT: Lockdown (Coronavirus) ziehin Sunday kikhop um theilou, bangchi'n na geel a?
RM: Innkuan adia hoihzawkna diing hi in ka gel a, Pathian' temple i hihdan chiangsem in ka thei.

ZT: Biakinn sunga phone puaklut hoih or hoihlou?
RM: Pawlutlou in omthei chiat le hoih ka sa.

ZT: Eimi Christiante bang na puaknatpi/veii pe'n? Bang kitasam pe'n in na mu a?
RM: Amin maimai (piangthakloupi) a Khristiante veihuai pen, ka puakgikte lak a khat ahi. Khristian kichite lak ah diktatna leh itna i tasam un ka mu.

ZT: Tulai Christian Khanglaite (Youth) lakah bang kitasam pe'n in na mu a?
RM: Pianthakna diktak nei i tasam ua, diktatna le i tasam uh.

ZT: Christiante di'n Tep le Muom -- Beri, Kuva, Khaini, etc. -- toh kisai bangchi'n na ngai?
RM: Hioh ahi chihna di om in ka theikei.

ZT: Christian te'n Love Song sah ding ahisih chi khenkhat um a, bang'e ngaihdan?
RM: Khristian piangthak diktak te'n mi lak ah love song sa diing un ka gingta kei.

ZT: Pasal neilou hinkhuo na bangchi kikhamuan a?
RM: Pathian in mi tengteng pasal/zi neivek di'n hon phutluihlou ahihman in, pasal neilou dia sehte laka telkha hidan in ka kikoih hi. Huan, koppih neilou dia a sehte bel tan a lungkimna pia hi. Tua banah, kei leh kei kikhamuan ngaiselou in, ka hihna dia Pathian' hon koihna theichian in ka lungkim a Pathian in hon khamuan hi. Pathian' hon koihna i theihchet nakleh midangte'n i hinkhua buaipih mahle uh, ei kibuai selou hi. Lamdang ka sak ahihleh, pasal ka na neihlouh tuni dong a ka kisik theihlouh ahi.

ZT: Himi interview simtute bang na advice/encourage nuam ei?
RM: Laigelh a Pathian' nasep ana manpha mahmah a, Pathian' nasepna kahiang khat ahihdan i theihthak uh deihhuai hi; i tunphaklouh, i siik phaklouhna mun tanpha a nna va sem ahihman in, gelh a Pathian' nasep pibawlthak poimoh ka sa hi. Agelhtheiten gelh in, mipi lamte'n sumsen zek thasiallou in ana leisak/panpih kawm in thumna toh delhzui thei lehang ut-huai mahmah hi. Huan, Pathian thu hi-in, khovel thuthang tuanna Newspaper-te hitaleh, laigelh kichi thil baihlam ahihlouh ziak in, agelh peih omsunte' laigelh phatuamngaitak in ana simsak ni. Khovel in koilam hon manohpih a, koitan tungta, bang maituah diing, bangthil hong tungdiing chihte theihna dia 'khodakna' hoihpen ahihman in, pangkhawm in simchiat lehang masawnna leh khantouhna thupitak hidiing hi.

ZT: Na hun mantam tah nang pieh ziehin kipah ing. Hing lawching semsem ta in.
RM: Kei le kipak ing e.
                     -----------------------

Courtesy: Zogam Today [13-09-2020]

*Bruce K. Thangkhal is also the Editor of KHALVONTAWI MEDIA (www.khalvontawi.com)

~ Admin

Share: