Humpinelkai Bang Haangsanna

Humpinelkai Bang Haangsanna

By: Pastor Thangdoulal Suantak

Pau. 28:1, "Kuamah delhlouh in migiloute a tai ua, hilezong midiktatte pen humpinelkai bang a haangsan in a om uh hi." Leitung ah haansanna tuamtuam tampi a omkha diing a, tuate pen humpinelkai haangsanna tawh kibang diing in ka gingta kei hi. 

1. Humpinelkai Bang Haangsanna Khoi A Hung Kipan Ahia?

Hih haangsanna pen diktatna a hung kipan ahi chih i theih chiat diing uh ka lem-en hi. Ahihleh Diktatna kichi bang e? Diktatna tawh kisai a i theihdan uh bangchibang ahia? Ahihke'h diktatna kichi a thu bek a kigen adiam? Mi diktatte haangsanna leh humpinelkai hangsanna bangziak a tehkaak a om ahia? Ataktak a chih in diktatna kichi pen a mizia lamdang mahmah khat ahi a, diktatna ziak a mimaw tawh kibang a mite'n a hung muh hun uh zong a om ngai diing in ka gingta hi.

2. Humpinelkai Haangsanna Neihna Diing A Poimawh Mizia Ahihleh Diktatna Ahi.

Diktatna kichi pen, mizia lamdangtak ahihziak in Pau. 14:34 na in, "Diktatna in nam a tawisang a, hilezong khelhna pen mi zousiah mualphouna ahi hi," a chi hi. Nam khat thupina diing in pilna leh hauhsaknate poimawh masa pen leh kilawm hi a, ahihke'h a mihing mahmah zong tampi hih diing bang poimawh masa pen leh kilawm hinapi, hih hausaknate, pilnate, mi tampi hih diingte kigen masa lou ahihna ah, ngaihsut diing a kilawm thu om in ka mu hi. 

Humpinelkai pen ama leenggam (kingdom) ah lauhthawngna, patauhna chihte neilou gamhing khat ahi. Eite zong, hih humpinelkai bang a eima hun chiat a i leenggam ua (leitung i damsung ua) lauhthawngna, patauhna chite neilou a haangsantak a nna leh silte i maituah ua, humpi bang a kimuangtak a i omtheihna diing un, hih a nuai a diktatna miziate i neih hamtang diing uh ahi. 

A. Sepna mun a diktatna: Sepna pen a neu a lian in i neih chiat uh ahi. A neulam deuhte sepna ahihleh, laisim ahi. Tua ahihman in School kai hinapi a, homework ngaihsak lou, laisim utlou chihte pen, mi zuautatte ahi ua, a sepna uah gin-omloute ahi uh hi. Laisim nna sep a nei diing hinapi a, sim utloute pen mi diktat zong kichi theilou diing a, humpinelkai haangsanna tawh kibang haansanna zong hih mi zuautatpa/nu hiam in a neikei diing hi. Hibang mite in a Nam tawisaang lehmalak in a daisakzaw diing uh hi. Nang khoi ah na om a?

A.1. Sepna mun kibang kimlou ahihna ah, sum-le-pai zongte'n bang i chi zon ua? Diktatna muh diing i nisial hinkhua uah a om diam? I loukhawhna uah i diktat uh hiam? I singpuak leh tui tawinate uah i diktatna uh muh diing a om ei? I taang nna sepnate uah diktattak in nna im sem taktak na uh hiam? Seki makhai thu ah i diktatna uh hiam? Hibangteng a i diktat chiang bek un, humpinelkai bang in i haangsanna diing uh hi.

3. Humpinelkai Haangsannate

A. Lauhthawngna omlou haangsanna.

B. Patauhna omlou a haangsanna.

C. Kimuanlahna omlou a haangsanna ahi.

Leitung ah humpinelkai bang a haangsanna mizia i neihna diing un, lampi khatbek a om a, tua pen diktatna ahi. Laisimte'n laisimna ah diktattak in laisim ni. Sum zongte'n zong i sum zonna uah diktatna suah ni. Laisim mi in a lai a simkei leh mi zuautat ahi i chih bang un, loukhou mi in zong a khoh diing lou a khohkei leh dikthei tuanlou hi. Eima eima mun chiat ah diktattak in sem lehang, i diktatna un nna a hung sep chiang in lungnuam in i om diing ua, tua hun chiang in i lungdam mahmah diing uh hi. Hih diktatna in nna a hung sep chiang in eite pen humpinelkai bang a haangsanna in a hung thuam diing a, lauhthawngna, patauhna, leh kimuanlahna chihte omlou in, humpinelkai bang in i haangsanta diing uh hi. Hibang dinmun a dingthei diing in Toupa Pasian in thupha hung pia hen.

Share: