Bible: KhangthuteNihna A Lungsim Khoihkha Thute

Bible: Khangthute Nihna A Lungsim Khoihkha Thute

By: Pastor Thangdoulal Suantak

 

LST, Khangthute nihna sung a kipan a chiamteh diing thu-hoih, lungsim khoihkha tamlou tuni in ngaihtuah khawm ni hang in, Pasian thupina ahihna diing in i theihnate uh, i zilkhiat uh thute, leh Bible tungtawn a i ki-haanthawnna uh thute zangkhawm chiat ni, chiin i ki-ngen masa ut uh hi. Khangthute nihna sung a thu-hoih, lungsim khoihkha a i gen utte uh hih a nuai a bang ahi.

 

1. Pasian pen Banghiam Sung a Khumtheih Hilou Hi (2Khang 2.5, 6).

Kumpi Solomon in Pasian a diing in Biak-innpi lamna neita leh zong, leitung a inn kilam zousiah, Toupa omna diing a ching a omkei chih Kumpipa'n a theihsa ahi (Pasian pen inn khat sung a om or mun khat a om ahikei a, mun zousiah a om ahizaw hi). Hilezong Solomon in a bawl inn ahihleh Pasian biakna diing mun ahizaw hi.

Pasian pen muhtheih Saptuam liantaktakte saang in a lianzaw a, ei mihingte ngaihsutnate saang in zong lianzaw hi. Saptuamte, Tumgingte, Sermonte leh i na bawl uh a dangdangte pen Pasian tawh kisai a theihna i neihbehna diing uh leh Amah biakna i piakna uh ahizaw hi. Solomon Biak-inn lam pen Pasian kikhumna diing, omna diing saang in, A biakna mun diing ahizaw hi chih theisiam chiat ni.

 

2. Thangvaan Meikuang (2Khang 7.1-10).

Solomon in a thu-ngetna a zawh in, vaan a kipan in meikuang a hung kesuk a, haaltum silpiak leh kithoihnate a kaangtum hi; tuachiin Toupa thupina in tua biak-innpi a luahdim hi. Mipite'n vaan a kipan a meikuang hung kesuk leh, Toupa thupina in baik-innpi a luahdim daante a muhtak un, keitei aw, lamdang saam e! chiin tua mun a sil tungte thu a kikumkei ua, hilezong innmai a leitual ah a khupbok ua, Toupa bia leh a kiang a lungdamthu gen in, Amah a bia uh hi.

Pasian a kipan a hung kipan thangvaan meikuang in i lungsimte uh a haalkuang tawntung diing ahi. Solomon thu-ngetna zong thangvaan meikuang ama'uhte lak a a om diing ahi a, eite thu-ngetna zong i lak ua thangvaan meikuang a omna diing hileh mi zousiah lungsim ah Pasian teeng diing hi.

 

3. Thu Na Man Uh Leh (2Khang 7.12-22).

Kilemna leh kithutuahna khat pouhpouh in (condition) or thukhun khat chiat a nei taangpi hi. Tuamah bang in Pasian in Solomon kiang ah, 'Ka thu a  na om a, na pa David bang a Ka thukhun leh daante a na om a, ka mitmuh a na muan-huai leh,' chiin thuchiam a nei hi. Tua pen Solomon leh a mite'n gamtuamte pasian a biak uhleh, gawtna a thuak diing uh chihna ahi.

Solomon kiang a thuchiam kipia tawh kibang sim in, Pasian in eite zong hung pia hi. Hih Pasian thuchiam ahihleh A thu i man ua ahihleh Ama'n eite a hung khawtuah diing hi, chih ahi. Hilezong Pasian thu pen saang a dangka, innmun lou-gam, car, bike, kali khat pouhpouhte, thuneihnate, kiletsaknate, zummawhna lamte tawh kisaite i buaipih ua ahihleh, i khut ua om Pasian silpiak hoihte laksak in i om diing uh hi. Tuaziak in Pasian in a luahna diing munte ah bangmah omkei ni.

 

4. Mipil Thumopsiam Zonna (2Khang. 10.1-19)

Solomon tapa  Rehoboam pen a pa bang in a pil kei chih i thei uh hi. Hilezong thupuukna ginaloutak a a laak diing chihna hi sese lou hi. Vaangsiat-huaitak in a khangualte thumopna a zui a, a tung ah siatna a tungta hi.

Rehoboam mahbang in eite'n zong i khangualte thumopnate zuihnop i sa ua, i tung ua mite, nu-le-pate, innsung a i ute thumopnate zuih diing pen i utkei uh hi. Rehoboam bang a na lawhsap utkei leh na tung a mite thumopna leh thuhilhnate zui hamtang in.

(Sutzoplai diing ahi).

Share: