Interview: Roslyn Kimbuang Zo

EIMI Gospel Singer lahah Pasian thu hi'n testimony hitaleh frank tah a share ngam, Zolienu Roslyn Kimbuang Zo, tutung Zogam Today in Exclusive Interview hing kisuo hi.

Pa M. James K. Zou, stam vendor, SDO Ccpur a sem leh Nu Lucy Chiinzavung'te gil-a-ga goutan taa thum -- Pasal khat leh numei nih -- lahah amilai pe'n ahi. Uu pasal leh nau numei anei hi.

Lailam ah science a graduate ahi, 2017 kum in. BSc (Zoology) Churachandpur College, Lamka ah 59% (Second Class) in ana zou a, Class-12(Sc) leh Class-10 khu First Division tuotuo in Don Bosco Higher Secondary School, Lamka apat 67% (2015) leh 64% (2013) in ana zou hi. Class-10 leh 12 Zou MIL ah Letter Mark ana khenkhie khat ahi. Duang ching, etlawm, maitai siusieu, akicheina khat poupou toh kilawm, gamtat khohei ah etton ta'h ching mawng mawng hi kichi. A mintah, M. ROSLYN LUANNEIKIM (M=Mantuang) ahi, Zoumunnuom khuo a teng. Fans te'n Facebook, Instagram leh YouTube lamah ana ngaihven mai un, a Album Nihna hing pawt bai ta ding hi.

August 04 chieng 24th Birthday meel mu ta ding hi. Birthday Gift present nuom Or Wish send nuom ten ana kitepteh vuo!

Gospel Singer Roslyn Kimbuang Zo toh Bruce K. Thangkhal, Joint Editor, Zogam Today houlimna tam anuoi a bang ahi.

Zogam Today (ZT): Interview theidia hun nang pieh ziehin lungdam ing.

Roslyn Kimbuang Zo (KB): Kei zong ka lungdam.

ZT: Tulai bang buoipi? Biel fang chi dan deu khat ka na zaa a, banglam e?

KB: 2014 May in Pasian in a nasem dingin ahing han a tuachiin 2019 March 23 in Pasian hatna toh ka kuan khe thei pan hi. Pasian in Zogam na fang ding ahi chithu ang theisah ziehin Behiang area ah ka lut masa hi. Ministry pen nei din ka ki gingta a min ding pen HALELUJAH MINISTRY OR MINISTRY OF CHILD EVANGELISM.

ZT: Tam ministry koi sponsor? Koikoi in sem?

KB: Lasah na a sum leh pai ang ki pete ka kholkhawm zel a tuachiin kei leh kei Pasian hatna toh kaki toudel hi. Tutan in lawm leh pai hagau mi khatkhat in zong khat veivei niangtui man ding ang hawm thei zelta uhi. Atung uah zong Pasian min in kipahthu ka gen ngal hi.

Upanu Gouching toh ka semkhawm zel uhi. Sep dan pen Pasian in a hun leh mun zil in ang pui zel hi.  Atangpi in nitah teng in ka ki khawm zel uhi.

ZT: Naupang te bang bang na hil uaileh? Ni bangzat hun na zangh khom ua?

KB: 1) Hundamna Thu. 2) Pasian hagau nei poimaw dante. 3) Eima mimal hinkhua ah Jesu toh kituah a poimaw dante (Personal Relationship with Christ). 4) Gingtu hinkhua chite kaki hil tangpi uhi.

A tang pi in ha khat vel ka ki khawm zel ua akikhawm peih a um phot leh ka ki khoppi hi. Ahin Pasian lungsiatna toh ka punghat mama uhi.

ZT: Nang, naupang te banglam na hil eile? Naupang te Pasian thu lunglut in na mu ei?

KB: Bible simding dan leh a poimaw dante. Pasian Thu Pasianin ahing pieh dandan in ka hil hi. Naupang ten Pasian Thu ahina bang tahtah a ihil leh a ngai nuom mama uhi.  Thu leh la action song khenkhatte ka hil zel hi.

ZT: Album a hing pawt bai di a um ei?

KB: Pasian lemsahpi na kinem in ka album ni na ding; MANGPA HOI HI VOL-2  ka buaipi lel lel a, Collection a din zong. A sawtlou in ang pawt paita ding neukhat a um hi.

ZT: Tutan in album bangzat na bawl tai?

KB: Full Allbum ah khat. Collection ah 5 bang ka pang khata hi.

ZT: Na album masapen bang kum a kibawl? Amin, la umzat, koikoi phuoh?

KB: 2017 kum in ka Album:  MANGPA HOI HI VOL-1 aki release hi. La 13 apha hi. Mituomtuom phuoh ahi.

ZT: Kum bangzat mi na hi'n mipi mai ah la nasa pa'n ei?

KB: Kum 14 vel ka hi in ka school uh Donbosco ah mini auditorium ah la kana sa kha hi.

ZT: Na neu lai in bang na na tup/aim pen ei?

KB: Medical Doctor.

ZT: Na piching nu'a in banglam na tup ei?

KB: Kang piangthah zou in Pasian na sem a loh pen hi chi kang thei chiengta a, tuachiin Pasian in ang hanta a, chop leh chil in tun alungsietna vang in keia dia a guot lampi ka zawt khata hi.

ZT: Lasah na pienken a siem nama, awleh na kiha zil zieh?

KB: Pienken siemna nei hilou ka hi chi ka kithei chieng hi. Ahin ka lung a lut a ka sahsah leh vocal training te kang pang tou leh kang sa theita hi.

ZT: La na bang chi kizil? Koi in lasah dan ang hil?

KB: La pen kaki eil dan tambang hi. La kangai a asatu sah bang chetchet in sah ka som a ka hapan thei mama hi. Lasah dan hing hilchet a um siha hinanleh ka Pu Gen Mate in VOCAL TRAINING ang pih a kipat in la sah kang siem deu ta hi.

ZT: La sah lam koi kung apat encouragement/ hanthawnna namu a? Bangzieh a la lunglut na ma?

KB: Lasah pen encouragement hing na petu khu ka Nu ahi. Tua leh anina ah unaunu Lalparzo Sinate ahi. Ka NU pen ang hanthawntu lian penpen ahi. Ka neulai apat in depression kana nei a stage2  tan vel ka tun a pat in la sah kang lunglut a, Ka lungkham chieng in la ka ngai zel a huchiin sah ut na ka neijel a ka sah chieng nuom kasa thei mama hi.

ZT: Lasah lamah na kiha pieh mama a, a chang chieng na nu-le-pa te'n gen-le-sah hing nei kha lou uh ama?

KB: Lasah pen ka nu leh pa'n tha ang pe mama uhi. Kipat tunglai in pen lekhasim lai in la ka sa kha zel a tuapen ang kipahpi sih uhi.

ZT: Saptuom tuomtuom ah la nasah mun ta a,  nopmaw nasahna aum kha ngai ei?

KB: Nuam ka sa bei hi. I bieh uh Pasian kibang ahi man in.

ZT: Mi'n na hattuom ang dong kha ngai uai? Ang kidoh chieh nuommaw nasa thou ei?

KB: Hing ki dong tangpi khat ahi. Nopmo sah na ka nei sih hi.

ZT: Biehna /hattuom lam toh kisaiin na innsung uah na kikum kha ngai uai? Na pa'n bang ngaidan anei?

KB: Kikum mama ung. Kapa pen mipil ahina toh, zalenna (freedom with responsibilty) ahing pia a ka telsiem leh pilvang ding in ang deisah hi.

ZT: Na innkuon uh bang hattuom a kikhawm?

KB: Kou pen Catholic ah kaki khawm uhi.

ZT: Baptisma na tang ei?

KB: Tang ma ing.

ZT: Mi'n na Piengtha kha tai ang chileh, na bangchi dawn diei?

KB: Ing. JOHAN 3:5 ah a gen mabang in ka piangtha chi ka ki thei chiang hi. Jesu Khrist ka Lal leh hundam in ka sang a... tui leh hagau ah ka piangtha zou in Personal relationship kang nei thei pan a ka tahsa deidante supichin lou hamham leh a hagau danthupiehte zom pen ka kipahpi thupi pen ahi chinglou pumpum in.

ZT: Tep leh Muom -- Beri, khaini, kuva, etc --  lam khu bangchi'n na ngaai ei?

KB: Bible ah Mark 7:14-23 ah khun adan uh toh kituo a misubua thei agenna ahi a, a context tuami verse i et chiang khut sil leh sillou tungtang ahi man in huam sau ka sa sih hi. Tunin Christian khat ihi leh pen Sienthouna hi i identity masapen ahi a. Ginglou mite etton a um ding leh Khantanhoi toh i um dan ang kituo ngai chi ahi chieng Hindu leh sakhuo tangpi ten a kidah silte eiten i neh pen uh bang chiin Jesu mel ei ah alang diei?

ZT: Tulai Christian-te bang tasam pen in na thei?

KB: Ittna dihtah (1 Korinth 13, Galatia 5:22-Hagau a te. Mark 16:17- Christian sign)

ZT: Na favourite Bible verse bang?

KB: Luke 10: 18-20.

ZT: Bible ah bang 'Bu' na sim ut pen, sim nop nasah pen?

KB: A bon in hoi ka sa mama a ahin ka passion leh ka deipen chu Book of Acts (Nasepte) ahi.

ZT: Bible pumpi na simsuo kha tai?

KB: 3 times vel ka sim suo kha ta hi.

ZT: Bible sungah etton tah dia hoi nasah Numei khat leh Pasal khat nang gen thei diei?

KB: Etton tah dia hoi kasah mama numei ah Deborah ahi, pasal ah Abraham ahi.

ZT: Gensietna or kidem chivel na tuo/zaa kha ngai ei?

KB: Tuo ma ing.

ZT: FB Messenger leh WhatsApp Message tungtawn ah hing eng dai or hing try/propose vel lah um zeuhzeuh di hia, tuate khu na bang ci deal ei?

KB: Ka WhatsApp leh Messenger-te hi Pasian kuo ka lan gige a... tutan in hubang abuse vel ka tuo kha nai sih hi.

ZT: Lawm ngai nei maw? Neilou?

KB: Neilou ka hi.

ZT: Mihing hina dawl ah lawmngai lou a umthei na ma?  Bang zieh?

KB: Ngai nuom ma ing hinanleh Pasian in ana sem dia ang hat apat ang phal nai sih hi.

ZT: Lasa in hei sung teng nava tuon kha tai?

KB: Assam, Mizoram, Meghalaya, Telengana, New Delhi. Myanmar- Kalaymyo, Yangon, Khampat, Kapteel, Teddim Lawibual, Zanglenphai, Nongket, etc. Malaysia: Biahinn leh Hall tuomtuom 7 vel ah.

ZT: Lasah a na zinna lahah hei sung nuom nasah pen, azieh?

KB: Mizoram leh Teddim lam nuom ka sa pen hi. Aziehpen ama uah hagau gate muthei in a um a..i lungsim tahsa a tawldam mama a kisuata mama hi.

ZT: ZAU (Zou Artistes Association) ah na pang ei?

KB: Ka ki enroll sih a. Ahin Zoute Artist khat ka hi.

ZT: Zou Artiste nih -- ZAU leh ZOGAA (Zou Gospel Artistes Assn) in kikhen, bangzieh?

KB: Kikhen zong ahi chet sih a hinanleh Gospel pen la maimai hilou ahiman in, meisial khat in luini tan theilou hi chiin  Pasian kammal in ana gen ka zui uh ahi mai hi. Kidaidan na um zong hi tuanlou hi.

ZT: ZOGAA bang kum a iki phut, a tup-le-ngim bang e?

KB: 2016 July in PASIAN leh UZO India theipi na toh aki phut a. Tup leh ngim pen -- Zou Gospel la a tamthei pen a sah khiat, gospel lasa te platform bawl sah, khat leh khat phatna la te, hagau la te ah ki tawsawn... etc.

ZT: Award na mu masat pen bang?

KB: Pasian leh mipite deisahna zal in ZOLMA BEST FEMALE VOCALIST 2017 in kana sang hi.

ZT: Zou documentary film "Elchiin" ah na pang a, tam khu camera na maitua masatna pen ama?  Bangchi'n feel ei?

KB: Amasa in tami film a ei pang sah Pasian leh director Tv. James Taithul deisahna ka tan ziehin amau tung ah kipahthu ka gen masa hi.

Ing, video cemera ka maitua masahna pen ahi. Nervous na chiang um ma e. Ka feel pen nuom kasa a ilunggel na stability or presence of mind a poimaw mama hi .

ZT: Pasian Lasah leh Pasian Thu lam maban ah bang chi peipi tou ding na chi ei?

KB: Pasian thu pen ahina bang tah a hangsan tah leh pilvang tah a peipi ding ka tup thupi pen ahi a, la pen la hing leh hoi Phatna late, hagau late tamthei pen khum ka som hi.

ZT: Zawl La (Love Song) sah in Hagau lam hinkhuo suhbuoi pha in na thei ei?

KB: ing.

ZT: Gospel La sah in mi hinkhuo siempha in na thei ei?

KB: Music in pen mihing emotions a khoi kha mama a, ahin gospel pen tuam mama a leitung gam la kisa hilou a hagau gam la kisa ahi ziehin mihing khat hinkhuo siemkha nah mama hi.

ZT: Programne a lasah dia chielna mu chieng, bang na ngaisun masapen ei?

KB: Ka thum tam nai? Ka lasah pen a tahsa leh hagau chomtu ahi nai? chite ka ngaisun masapen hi.

ZT: Ang kichielnate ah na pei kim ei?

KB: Pei kim lou hing. Ka peithei lou chieng ka lungtang tah in pawi ka sah thute ka gen zel hi.

ZT: Album khat bawl na'n sum bang zat vel atangpi'n na seng ei?

KB: 2017 in ka 1st Tribute Album ah Rs 1,30,000 lakh vel ka seng hi.

ZT: La phuo na nei ei?

KB: Gospel la 6 bang Pasian hepina toh ka phuo kheta hi.

ZT: Thugen leh Lasah koipe'n poimaw nasa ei?  Koi pen nuom zaw din na gingta ei?

KB: A effort pia dan aki bang a hinanleh thugen pen hahsa zaw mama in kei personal experience ah ka thei hi. Tahsa damtheina 40% vel in lasahna toh aki khai hi.

ZT: Masang lai toh tehka in tulai Album zuo lam khu bang dinmun ah um ei?

KB: Ataangpi in CD pen pei nawn senglou a bang na a singtang khuo neuneu lah ah 200 copies vel chu tutan in highly demand ahi. Ahi neh mu na ching zou teuh lou a, track ni man zong ki nga kia zouta lou hi.

ZT: Malaysia ah nih vei tah na zin a, banglam toh kisai ama?

KB: Pasian deisah na leh  MZO (Malaysia Zou Organisation) te deisah na tang in Gospel la sa ding in a Pawi uh ah ahing han uhi, 2019 leh 2020 (MZO Tin Jubilee).

ZT: Malaysia imi isate dinmun bang a chi ei?

KB: Refugee leh migrant worker tamzaw ahi phot chieng pen i theisa ahia hinanleh migam chi lou in hangsan tah in Pasian leh i minam te tawisanna dia pan a lah ngam pen uh thupi sa mama ing.

ZT: Myanmar zong na va zin a, bang toh kisai? Amite bang a chi ua?

KB: Myanmar lam ka zin pen ataangpi in Lasa ding in ka zin hi, amau hing program bawlpieh dan dungzuiin.. amiten ittna nei uh kasa a, mi ngainat leh vaidawn a siam mama uhi. Ten dan leh khosah dan pen nidang tawh te in vang a hoi mama ta uhi..Nasep pen a semlou um senglou chi thei phial hi atangpi in bussiness ahi a nasep uh..essential etc.

ZT: Music instrument bang bang na siem ei? tonic solfa leh staff notation idea na nei ei?

KB: Solfa ah chu Tonic leh staff notation idea ka nei hi. Guitar ka tum thei hi. Average.

ZT: Gospel Artist te'n bang hasatna na tuo uoi? Rate thu la...?

KB: Hahsatna ka tuo uh pen atam mama a hinanleh Jesu min a ka thuo ding mawng uh ahi chiin kaki sang uhi..a dieh in mipi ten judgmental-mindset toh eI et chieng un nop maw mama hi.

Rate tungtang hi ka thei tan ah unau Mizo ten gospel singer leh secular te a rate anei sah ua.. function lah ah mikhat ah bang aprox. in Rs 20,000 bang a pia uhi. Tua pen amaute siam ngai lou in a nampi in siamsah hi. Lasah leh talent nei te dopsang hi a ngaithupi pen lah ua khat ahi a. Ahin ei nam lah ah pen Rate thu aki gen chieng hing ki oii khollou a kitheisiam nailou ahiman in mipi ten ang thei khiat ding ka ngah lel uhi. Rate um in um sih leh Pasian in a tate pen ann ngawl sah lou hi chiin ki henem ung. Ahin ihi chi zel uleh pen i lasah siamte uh "endanger" ahi. Ang paallun ding pen tawm mama ding hi.

ZT: Tuni chieng tan a na kipahna mama khat nang gen theih diei?

KB: Kaki pah na mama leh tul thei lou pen ''ka min laibupi ah aki gelh lut ta chi ka thei chieng na pen ahi''.

ZT: Maban ah Gospel Lasah leh Child Evangelism bangchi pei di na sawm ei?

KB: Line kop hahsa senglou in ka thei a Pasian hatna tawh pei ka sawm hi.

ZT: Unau Mizo La leh Mizo Artistte i gamuh adiehin Lamka sungah kithang peipei, bangzieh a diei?

KB: Reason hoi pipi tamtah um  in ka gingta a... kei mu na tan a khat leh khat ki toisan a siam zieh u leh minam hampha ahizieh uh hi in ka thei hi.

ZT: Lasah khu neh suina ching in na mu ei?

KB: Ching mama hi. Pasian deina bang in um zing poulei.

ZT: Love Song na sakha ngai ei?

KB: Kei ka pian apat lasah ka profession dia kana lah khalou zieh in love song chi vel kana sa khasih a. Kang piengtha zou a kipan Pasian la te ka hinkhuo sukhate kang record leh sa panta hi.

ZT:  Quiet Time, Fasting Prayer vel la, na bawl ngai ei?

KB: Ing. Hagau hinkhuo khanna ding a poimaw pente ahiman in a loutheilou ahi.

ZT: Lockdown ziehin Biakinn Kikhopna um thei nawnlou, bangchin na geel a?

KB: Ahun ah zong a hun lou ah zong Pasian thu gen ding ahi chiin Laisiangthou in a gen mabang in, khut a lam biehinnte kai theilou ma lei i biehpiehna leh kikhopnate topsan sih va ui.

ZT: Tulai igam uah Christiante bang tahsam in na thei a?

KB: Veinatna leh ittna tahtah toh nasep ki tasam pen in ka mu hi.

ZT: Lasah lam lunglutte bang advice na pe nuom ei?

KB: Lasahna lunglut ten a lunglut na uh Pasian a din theitawp suo in hing zangta u hen.

ZT: Tami interview ana simtute bang thu vaikha nuom na nei eile?

KB: Bukimlou mihing ka hina toh genkhial genval um khaleh Jesu min in ngaidam ka hing ngen a.. sim tu tengteng phattuompi ding  ka gen khate Mangpan a chiing thei ding in hing gualzawlta hen.

ZT: Interview-na hun manpha nang piehna tungah lungdam ingh.

KB: Kei zong lungdam sem ing.

~ Zogam Today | 12-07-2020

Share: