Saptuam kichi nangmah ah na muthei hiam?(E02) By: Pastor Thangdoulal Suantak

Saptuam kichi nangmah ah na muthei hiam?

Saptuam i muhdan uh bang zeel a gamta leh vaihawmte i hihna uah, i Saptruam muhdan un gen-le-sak hau mahmah hi. Mizote laa khat in, 'Mi fel rual omkhawmte zing ah hian, kan tan hmun a awm ve silo,' a chihbang sim in Saptuam kipuakna daan leh kalsuanna daante ah, mi khenkhat a diing a khasiatna diing khop a thupukna bawl pen baihlam mahmah hi. Mi tamtak in eimah ah Saptuam kimuthei lou hileh kilawmtak bang a om in, Pasian beel Saptuam leh Saptuam beel mihing leh Pasian beel mite Saptuam sung ah ki-omthei mawkta hileh kilawm mahmah hi.  Tuaziak in tutung in Saptuam beel mite leh Pasian beel mite kikaal thu i ngaihsun diing uh hi.

Buhtak Lak Ah Buhkheem (Matt. 13:25-26)

Mi khenkhatte pen, piangthak lou, a hinna Jesu'n a kheel hilou a Saptuam member a pang, leh Saptuam tawh kisai a nna sep diing leh banghiamte a thakin mahmah ki-omthei hi. Hitalezong Jesu'n, 'Buhtak lak a buhkheem,' thu a na gente ziak in lamdang i sakei uh hi. Hibang mite a diing a Saptuam poimawhnate ahihleh;

1. Sih-le-man ka tuak chiang a hung vui diing

2. Hung khawlpih diing

3. Ka taaksap ni chiang a hung panpih diing

4. Innsung vai leh khotaang vai a kei hung tem diing

5. Ka lungzuan ni a hung khamuan diing chihte leh a dabg tampite ahi.

Hihte ziak a Saptuam beel, Saptuam kibukna a zangh mi tampi ki-om leh kilawm mahmah hi. 

Saptuam beel mite'n Saptuam tungtawn a vaihawm ut mahmah uh hi.

Saptuam beel mite'n Saptuam tungtawn in phuba la ut mahmah uh hi.

Saptuam beel mite'n Saptuam sung ah a dem diing uh zongden ut mahmah uh hi.

Saptuam beel mite'n Saptuam ah a lungkim louhna diing uh muthei deuh sese uh hi.

Saptuam beel mite'n Saptuam ah a khasiatna diing uh thei deuh sese uh hi.

Saptuam beel mite'n Saptuam ama'uh hamphatna diing in zaksawm teitei uh hi.

Saptuam beel mite'n Saptuam pen Pasian saang in ama'uh omna dan in tuatthei hi.

Saptuam beel mite'n Saptuam pen, Pasian hehpihna tungtawn a Jesu Khrist tungtawn a tunding ahihlam lungluuttak in ngaihsun khollou uh hi.

Saptuam pen Pasian mite kipawlkhawmna ahihman in belhtheih mah hi.

Saptuam mi-le-sa hihna saang a Pasian mi-le-sa hihna deihzaw i hihman un ngaihsun thak chiat ni. 

Hilezong Pasian beel mite pen hibang ahikei hi. Tuaziak in Pasian beel mite puaknatna pen hih a nuai a bangte ahi taangpi hi.

Pasian beel mite'n Saptuam chidamna diing ngaihsun uh hi.

Pasian beel mite ki-ngiamkhiat taang uh hi.

Pasian beel mite'n phuba lak sawm teiteina lungsim neilou uh hi.

Pasian beel mite Saptuam ah phunhaat lou uh hi.

Pasian beel mite'n Saptuam khasiatpih ngailou hi.

Pasian beel mite'n Saptuam hamphatpih teitei sawmlou uh hi.

Pasian beel mite'n ama'uh mahmah saptuam ahihdan uh theisiam uh hi.

Pasian beel mite'n Pasian hehpihna ziak a Jesu Khrist tungtawn a Saptuam member ahihdan uh theisiam uh hi. chihte leh a dang tampi genbeh diing a omlai diing hi.

Share: