SAPTUAM (E01)

SAPTUAM (E01)

By: Pastor Thangdoulal Suantak

Saptuam i chih uh Pawlpi maw? ahihke'h Mihing? Mikaangte'n, "The Church as an institution," chih leh "The Church as People," chih thu a na buaipih mahmah ngaita uh hi. Ei gam ah zong buaipih-huaitak hileh kilawm in a omta hi.

Saptuam i chih uh Pawlpi ahi hiam? ahihke'h Mihing? Chih tawh kizop in dokna dang k'ung dokbeh utlai a, tuate ahihleh;

Khatna: Saptuam i chih uh eite hung kipumkhatsaktu ahi hiam? Ahihke'h hung khenzaaktu?

Nihna: Saptuam i chih Pasian gam liansaktu maw? Ahihke'h Pasian gam Saptuam sung a i khumluut uh?

Thumna: Saptuam in Jesu a hung naihsak taktak hiam?

Lina: Saptuam leh Jesu kua pen na naihzaw a?

Hih a tung a dokna tuamtuamte na dawnna pen, Saptuam chih thumal/kammal na theihna ah a ki-nga mahmah diing hi. 

Bible a kimu Saptuam chih kammal pen, Greek haam a 'Ekklesia' chih kammal a kipan a hung kipan ahi a, 'Ekklesia' pen Hebrew haam a 'Qahal' chih kammal pan a hung kipan ahi. Tualeh 'Qahal' chih kammal khiatna pen 'Pasian mite paikhawm ahihke'h kikhopna,' chihna ahi. Tuachiin Saptuam pen, Pasian mite paikhawm ahihke'h kikhopna chihna ahi a, a paikhawmna uh leh a kikhopna uh pawlpi pen hilou a, a paikhawmte leh a kikhawm mite ahihleh Saptuam ahizawta hi.

Saptuam tawh kisai a Bible in a gente, a theihnop diing leh a tomlam a gen in, Saptuam pen, Kha Siangthou in ama teenna diing a, Jesu Khrist tungtawn a a leptuak leh a khopkhawm Jesu Khrist taksate ahi. Tuaziak in Saptuam pen Jesu Khrist tatna tungtawn kikhawmte ahi a, a kikhopna uh pawlpi hilou in, a mihingte, a paikhawmte, a kikhawmte ahizaw uh hi.

Pawlpi buaipihte'n Pawlpi hoihna diing leh masawnna diing bek a ngaihtuah ua, mihing buaipihte pen in, Saptuam a mi zousiah hoihna diing a ngaihtuahzaw uh hi. Saptuam it mahmah leh, Saptuam a diing a kipezoutak hinapi, tua Saptuamsung a om mite itlou a zong omtheih ahi a, tuachiang in Pawlpi buaipihte'n Saptuam hausa hih diing, Building leh sil dangte hoihtak a neih diing, Pawl lian hih a, member tamtak hih diing chihte a ngaihtuah taangpi uh ahihman in, hih mah a buaipih uh hi.

Mihing buaipihte'n, i damkim un, i khangtou chiat uai? Kha ah hinna i nei uai? Chihte a ngaihtuahzaw uh hi. I gam a Saptuamte dinmun taangpi ka et leh, i hau un, Biak-inn hoihtaktakte i neita ua, hilezong a sung a kikhawmte bangchibang i hita ua le? Tam leh let a, thupitak a om diing pen poimawh mah hi, hilezong Jesu'n tawm leh tam thu a na buaipih kei a, 'mi nih hiam, mi thum hiam ka min a kikhopna uah, kei zong ama'uhte lak ah ka om hi,' a chi hi. 

Pawl buaipihte'n bikhiah leh bituk nei in gamgi a bawl ua, tuachiin i theihlouh kaal un Saptuam pen, mihingte khenzaaktu, kihuatna, kimeelmaakna tuntu i suaksak zeel ua, a poi mahmah hi. Hilezong Khrist taksa a i Mihing buaipihte'n mi zousiahte Jesu Khrist taksa a i kizoppihte uh ahihman in kikhenna pen a siangkei hi. Pawlpi muh a Saptuam mute'n, Saptuam tungtawn in Pasian a kinaihpih ua, ama'uh hinkhua ah sianthouna a omkei hi. I gam uah zong Saptuam tungtawn a Pasian naih i tamziak un siangthouna, diktatna, gin-omna leh a dang tampite i tasamta uh hi.

Mihing muh a Saptuam mute'n Pawlpi a mi-le-sa i hihtheihna uh pen, Jesu sisan zaal a Pasian mi i hihna ziak uh ahi chih a mu chian ua, tuachiin ama'uh hinkhua leh Pasian kikaal a buaipihzaw uh hi. Pawlpi muh a Saptuam mute'n a omna uh Saptuam tungtawn in Pasian nna a sem ua, Saptuam leh program tungtawn a Pasian nna a sep diing dan in a koih uh hi. Tuachiin program ah a ki-nga ua, program makaih Khristian a suak zeel uh hi. Hih tawh kibang sim taangthu, Bible ah zong muhtheih in om a, tua pen Jeriko lampi a suamhaatte tuakkha a, sibup zen a ompa vamukhate ngaihtuah lehang, siampute leh Levi mite ahi uh hi. Ama'uh pen Jerusalem a a program uh zang diing a pai hikha diing ahihman un, a progam uh hikha loute, a pawlpi uh mi-le-sa hikha loute a buaipih mankei uh hi. Hibangte Jesu'n a deihkei hi. Tuaziak in, Saptuam program a i panna hilou in, Jesu tawh i kizopna un hung makaihzaw leh chih a deih-huai mahmah hi. Program makaih Khristian hih saang in Kha Siangthou makaih Khristian hihna pen deih-huaizaw hi. Pawlpi mi-le-sa hihna saang in Khrist mi, Pasian mi-le-sa hihna deih-huaizaw ahihman in, Jesu Khrist sisan vaang a Pasian mite kikhopna pawlpi a om i hihlam uh theizing kawm in, Pasian lim-le-meel leitung a kilanghsak diing a saptuam i hihna uh i kalsuanpih diing uh hi. Toupa Pasian in thupha hung pia hen.

Share: