Khutsiam Silbawlte Saang in Pasian Bawlte Thupisak Ni

Khutsiam Silbawlte Saang in Pasian Bawlte Thupisak Ni 

By: Pastor Thangdoulal Suantak

Leitung mihingte'n lamdang a sak mahmah uh sil chii sagih a om a, tuate pen 'Seven wonders of the World,' chi a theih in om hi. Hih a lamdang chii sagihte tengteng pen, mihingte khutsiam silbawl ahi a, khut a bawl nnate leh mihingte khutsuakte ahi hi. Hilezong nang pen, mihingte khutsiamna a bawl leh deihdan a bawl na hikei a, Pasian khutsuak, leh deihdan a bawl na hi. Tuaziak in nang pen nang a hilou in, Pasian a na hizaw a, na hoihna leh hoihlouhnate zong Pasian a ahizaw hi. (1Sam 2:30; Pau. 3:11; Rom. 14:10-13; 1Tim. 4:12).

Taj Mahal kilawmna leh hoihnate tuni dong in kigen minthang a, leitung a a lamdang sagihte lak ah khat in pangpha hi. Tuaziak in Taj Mahal en diing in, mun tuamtuam leh gam tuamtuam a kipan in mite hung pai zunghzungh uh hi. Hilezong, a taktak a chih in, Taj Mahal saang a hoihzaw, kilawmzaw, etlawmzaw a om a, tua pen nang na hi. Taj Mahal pen mihingte khutsiam silbawl ahi a, hilezong nang pen Pasian khutsuak, Pasian bawl na hi hi. Taj Mahal pen khutsiam silbawl ahi a, nang pen Pasian bawl na hi. Tuaziak in, Taj Mahal saang in a tuul a then a tamzaw in na kilawm a, na hoihzaw hi. Pasian in zong Taj Mahal saang a hoihzaw a hungsak diing ka lam-etna ahi. Na kilawmna pen Taj Mahal tawh tehgual ahikei hi. Taj Mahal bawlna a engineer pen mihing ahi a, nang hung bawlpa, nang bawlna a engineering pen Pasian ahi chih ka muhchian bang in, nang zong kimu chian in. Na Pasian a diing in na etlawm mahmah hi, chih mangngilh ngaikei in.

Nang hung bawl Pasian in a bawlte na ngaihsut ngai hiam? Pasian bawlsa Mual-le-taangte etlawmnate, gampalak a lui luang etlawmnate leh tuipite, singkung namkim leh paak namkimte, gamsate, innsate, tungleeng vasate, vaante leh vaan a om a i theih uh aksite leh khapi kilawmnate, leh a sil bawl dang tamtakte kilawmnate zong gentam ngailou a i theih diing un ka gingta hi. Pasian in a silbawl hizah zouzaite lak ah, kilawm a sak penpen mihing ahi. Tuaziak in Pasian in mihingte ngai a, tuachiin suulzuih tawntung hi. Pasian in leitung mite ngaihsaan, 'Seven wonders of the world,' chihte ngaisaanglou a, a bawlsa mihingte mah ngai poimawh hi. Tuaziak in mihing khutsiam silbawlte saang in Pasian bawlte mah thupisak zaw hamtang ni..!! Leitung a na ngaihsaan penpen nna leh silte tengteng saang in, nang mahmah na thupizaw a, na ngaihsaan-huaizaw hi. Nang hung bawlpa Pasian tawh na pankhawm naakleh, leitung a na ngaihsaante tengteng zong, nang khut ah omthei a, nang a kipan in zong piangthei hi. 

Hih thu na simna tungtawn in Toupa Pasian in a thupha hung pia henla, na thupina hung theikhesakta hen….

Share: