I Pasian Uh Taangtawn A I Teenna Uh Ahi

I Pasian Uh Taangtawn A I Teenna Uh Ahi

By: Pastor Thangdoulal Suantak

Laate. 90:1-3, "Toupa, khang zousiah a ka teenna uh nang na hi. Mualsangte om masang ahihkeileh, leitung leh vaannuai pumpi na bawl masang, taangtawn a pan a taangtawn dong a Pasian na hi hi. Nang leivui n'ung suaksak kiik a, 'Nungkiik in, nang mihing' na chi hi.

Mihingte pen taangtawnpa i hihman un eite pen taangtawn a i hi uh hi. Tuaziak in leitung a i dam kumte uh manpha mahmah napi-a, a manphatna taktak pen tungzou nailou ahizaw hi. Tualeh hih Taangtawnpa pen mihingte kipatna Pa Pasian ahi a, Amah mihingte tawpna zong ahi diing hi. Tuaziak in i Pasian uh pen taangtawn a i teenna uh ahi chiin i gen masa ut uh hi.

1. Itna Omna Mun Inn Ahi.

Itna i chih pen innkuan hinna ahi a, itna tawhlou in innkuan pen lamzang lou a, a khan diingdan bangtak in zong khangthei lou hi. Itna ziak a thunun, itna ziak a sawi, itna ziak a vuakna chihte zong a omtham diing in ka gingta hi.

Mihingte'n leitung ah indet, (innmun leina lai poimawhte nei lehang zong) a taktak in i neikei uh hi. Aziak pen, mihingte neipa leitangh or leitung ahikei a, taangtawnpa ahizaw hi. 

2. Inn pen Kihumbitna Mun Ahi.

Leitung mihingte a diing a inn a poimawhdan pen genlouh a zong i theih chiat diing uh ka gingta hi. Aziak pen, Inn ahihleh, 

A. Khosiat-khoniim hun chiang a i kihumbitna uh

B. Haksatna tuamtuam, dah-le-lungkham hun a i belh uh

C. leh i taksa, i lungsim, leh i lungtang tawldamna leh kihumbitna zong ahi. Leitung a inn kilamte'n siat hun a nei chiat a, bangmah a detdou taktak omlou hi. Tuaziak in, i Pasian uh pen, eite a diing a i taangtawn inn uh ahihna diing in, kiphaltak in Pasian kiang ah ki-aap ni.

3. Taaksapte Kimna pen Inn Ahi.

Inn teenna pen ahi diing bangtak a a kiteen leh taksapnate (Basic needs) omlou, ahihke'h i poimawhte uh om hi. Phil. 4:19 ah, "Tualeh ka Pasian in Jesu Khrist a thupina a a hauhsatna dungzui in na taksap zousiah uh a hungpia ding hi."

4. Lungnopna Bukim leh Tawldama Diktak Omna Mun Inn Ahi.

Munchin-gamchin a lungnopna diing leh tawldamna diing bangzah a a kizon hang, lungnopna leh tawldamna taktak pen inn ah omzaw hi. Hih Inn pen leitung mite bawl inn genna ahikei a, Taangtawnpa genna ahizaw hi.

Mihingte pen taangtawnpa i hihman un eite pen taangtawn a i hi ua, tomkhat sung bek a diing hilou, leitung a omden diing zong hiloute i hizaw uh hi. Tuaziak in, "Toupa, khang zousiah a ka teenna uh nang na hi." chithei chiat diing in Toupa Pasian in A Thupha hung pia hen….

Share: