TOUPA GOUTAN A MITE AHI By: Pastor Thangdoulal

BIBLE: "Toupa goutan ahihleh ama mite ahi a, Jakob ama goutan ahi." (Deut. 32:9)

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante'n lung kituaktak in, Innmun pan in chibai ka hung buk hi.

GOU HILHCHIANNA

Gou kichi pen, Gen. 43:23 in a gendan in, 'Vanh leh bang hiam a manpha a i neihte uh' ahi. 2Kum 20:13 ah, gou kholna inn khat a kimu a, tua goute kikholna inn a om vanhte ahihleh 'Nguunte, khamhte, nektheih namtuite, sathau manphate, gaalvanhte,' ahi. 1Khang 29:3in, 'Ka mimal gou neihsa khamh leh nguun,' a na chihziak in 'Khamh leh Nguun,' pen gou a suak hi.

Tutung a i kikup uh Gou pen mikaangte gendan in, treasure ahi a, Hebrew mite gelhdan in, סְגֻלָּה (sǝgullāh) סְגֻלָּה (sǝgullāh) chih ahi a, Thukhun Lui ah giatvei a kimuthei hi. Bible Dictionary in hih Gou tawh kisai hibang in a na gen hi; 

1. Neih-le-lam (dangka) kholkhawmte.

2. Vanh leh sil, mailam hun a zakhtheih diing a kaihkhawmte. 

3.Laa 135 gendan in vanh manpha mahmahte.

4. Kolosate bung nihna gendan in, a thupi leh tamte ahi.

Tuaziak in, Gou kichi pen, dangka (sum-le-paai) hiam, sil dang, a manpha chi a i kholkhawmte uh ahi.

TOUPA GOUTAN A MITE AHI

Bible in, 'Tuni a a (Pasian) lampite a pai a, a (Pasian) thusehte leh a (Pasian) thupiakte, leh a (Pasian) biakna daante zui a, a (Pasian) thu na man uleh, Toupa pen noute Pasian hi diing in na thukim uh hi.  A thupiakte zui diing a a (Pasian) hung chiam bang in, tuni in Toupa goutan namte hi diing in a hung thukim hi. Tua pen a siamsa nam zousiah tung a hung laamsaang a, minthang leh thupitak a noute hung tungding diing in ahi; a chiamsa bang a, Toupa na Pasian ua diing a nam siangthoute na hi uh hi,' (Deut.  26:17-19) a na chi ahihman in, eite a diing in ngaihsut diing thu khat a om a, tua pen, Pasian goutan mi khat hi diing a kiphal na hi hiam? Ahihkei leh kiphal lou? Chih kikaal thu ahi. Pasian goutan na hihkei leh, Pasian meelmapa goutan na hi diing hi.

MIHINGTE POIMAWHNA 

Leitung mihingte lak a nna sep ut mahmah sil, nam (chi) nih a om a, a nih ua kha sil bawltheihna nei tuak (A sil bawltheihnate uh saandan leh ngiamdante gendah ni) ahi uh hi. Ama'uh tegeel deihna a kibang kei a, khat in i tu dinmun leh i hun nu-nung dong a i hoihna diing uh lampite bek a hung zuihpih ut a, a dang khat pen in i tu dinmun a hoihdan a kilangh hoihloute leh, i hun nu-nung dong a i siatna diing uh lampite bekbek a hung zuihpih utzaw hi. Tuaziak in leitung mihingte pen, muhtheihlouh khate kidouna gaalphual i hi uh hi. Hih muhtheihlouh khate ahihleh, mihingte sung a kidou, Hoihna diing leh Siatna diing deih, kha kituakloute ahi a, mihingte lou in mihingte lak ah, a nih un nna a semthei kei uh hi. Tuaziak in ama'uh a diing in leitung mihingte poimawh mahmah hi. Hih Kha kituaklou i gen tegeel uh ahihleh Pasian leh Dawimangpa ahi a, Pasian in itna tawh eite hoihna diing deihna ziak in, i tung chiat uah vai a hawm a, khatveivei a thuakhak bangta lehzong hoihna diing deihna ahihman in hoih hi. Hih i gen uh Pasian pen leitung mihingte kipatna leh tawpna diingpa ahi. Hilezong Dawimangpa pen leitung mihingte kipatna leh tawpna diingpa ahikei a, Pasian khutsuakte lak a manpha penpen leitung mihingte suksiatna tungtawn a Pasian dou a, Amah (Dawimangpa) lam beel a Pasian khutsuak mite bawl a, Pasian gaal zawhsawmpa ahi. Gen. 4:7 in a genbang in, Amah (Dawimangpa) deihlamte a bawl a nuam a, a zuih zong nuam hi. Tuaziak in nang pen, Pasian leh Dawi a diing a poimawh mahmah leitung mihing na hi a, kua pen thu na zuih diing e? chih pen nang thu ahi. Pasian goutan hi diing na hia? Dawimangpa goutan?

 

BANGZIAK A MIHINGTE PASIAN GOUTAN HITHEI E?

Leitung ah ta nei nu-le-pa zousiah in a tate uh a itdante uh a thei chiat diing un ka gingta hi. Hih nu-le-pate itna saang in Pasian in eite hung itna lianzaw ahihman in, sihna tawh eite (leituing mihingte) kalvari mual a chihna mun ua singlamteh tung ah, mikhialte kithahna mun ah, nang leh kei a diing in a hung si a, Amah eite a diing in a sita chih thu taksanna tungtawn a tatkhiat a omte i hi uh hi. Hih tatkhiatna pen Pasian mite i suakna uh ahi a, Pasian goutan i hihna diing ua kalbi masa pen ahi.

Pasian goutan i hihna ziakte uh ahihleh;

1. Pasian a diing a a manpha mahmahte i hihziak uh ahi.

2. Pasian in a Pasian hihna tawh kituak a Amah phat diing, taangtawn hinna tawh a hung bawlte i hihziak uh ahi.

3. Pasian in a it mahmah leh a it nguut-nguutte i hihziak uh ahi.

Pasian a diing in, A mite saang a manpha zaw, A mite saang a deih-huai zaw, A mite saang a it-huai zaw bangmah a omlouh ziak in, A mite pen Amah a diing in a goutan ahi hi. Nang, Pasian mi na hita hiam? 

DOKNA NGAIHTUAH DIINGTE;

1. Pasian mi na hi hiam? Ahihkeileh Saptuam mi?

2. Jesu thu zui/ thu mang na hi hiam? Ahihkeileh mihing thu mang?

3. Satan (Dawimangpa) goutan na hi hiam? Ahihkeileh Pasian goutan? 

4. Pasian mi na hihdan na hinkhua a a kilatna gen diing bangzah na nei a?

5. Leitung mihingte sung a thuneih ut, kha kituaklou nihte deihna koi pen zuih na sawm a?

Hih Thute Na Simna Tungtawn In Toupa Pasian In A Thupha Hung Peta Hen.

Share: