Thadou-Kuki: SUSHANT SINGH RAJPUT

KLS hausa, siemang pachong ho leituol chan a thu ahung kisei tah jieh in, KLS ten jong gala kuon hiche thina hi agah kive in, hiti hin gah sei u hite gal apat khuosung lamkai hon amu dan u.

Sushant Singh hi ihet ma bang uvin lekha thiem tah, national level chana jong pachatna chang, engineering sim ahije. Ama hi lekha thiem ahi vangin lim tho (acting) ahung lung lut nin, hiti chun lim tho na lam sanga hung lut ahije.

Film industry hi business line ahoi jin ahi. Chule, aki vaipoh dan u khu, ei ho hausa kivaipoh banga a sung lama khu vai puo um ahiu ve. Kapoor te inkuo, Khan te inkuo chule mi dang phabep ho khu hausa kivaipoh banga film industry hi apu, apa teu apat hung kipe suh peh ahiu ve.

Film industry lut jouse khun, Kapoor te ahi lou le Khan te inkuo khalhang ajut diu, ama ho lungdei ahol diu ahije. Kapoor, Khan, Yash Chopra te ho lung toh kituoh lou va chat loh chu, film industry apat pot kipoh a pot doh di ahi jenge. Ama ho loi dia, film industry hi agou (property) u ahi je.

Sushant Sing hi amelhoi keu hilou, Bollywood adia lekha thiem loi ahin, chule ama lim tho ho hi ahoi jin, Kapoor le Khan, Yash te ahin khel thei din muna um ahijeh in mite thangthip na atuo jing ahi. Bollywood sunga jong khu faction kikhen kit uva, Kapoor faction, Khan Faction, Yash Faction abon uva Sushant Singh hi avetda u ahije. Hiche thil ho hi Sushant dia thoh ngam hilou, dou jou hilou ahi.

Sushant Singh hi kikhailih ahije ti chu ihe suoh hiel uve. Ama hi meithal, lou le ai imacha mang louva melma ten a tha u ahije. Tuhin India pumpi mihiem atam jon Khan family, Kapoor family, Yash faction oimo na sang tah a chan uvin, nitin hin media dunga mipi akiphin jing uvin ahi. Sushant thina thu hi high court chan geia a thu khuol dingin ngehna asiem uvin, Sushant u pa, O.P Singh jong a sopi thina thu ahin a lunglhai pon, khuolchilna um tei din adei jin ahi.

Ipi chu hi ta le, film industry sunga khu thunei aum uvin, ama ho loi lunghol lou kiti chu lha mah di ahi mai uve. Hausa kivaipoh banga anei agou u hung kipe son peh ahiu vin, anei agou u chu asopi lou iti apeh diu ham? Hiche lai tah hi ngaituo thei khopset ahije. Kapoor, Khan, Yash te khu Hausa tabang ahiu ve. Hausa chun a lenggam le ama gam sunga ama sanga lien jo le bolthei jo chu amoh vet lou hiel di ahije. Ama gamsung, ama vaipoh na sunga ama chu a lien pen hiding ahi.

Sushant hin film gup a contract anei ahije. Hiche film gup jong chu Khan, Kapoor le Yash te kithoh uva a lah pieh kit u ahi. Ama ho gamsung, ama ho toh kinai apat apem pai uva, ama ho to kinai apat apaimang u ahije. Hiche ho hi agel le a lungin thoh jou talou, lethuh dan la um lou, kidin te pi dia ama imacha hi kit lou hijeh a Sushant hi lunggel chol vala kithat ahije.

KLS te koi tabang film lut nuom ium ule, ei ho vang mi genthei ihiu vin, kisuon pi di nei lou te ihiu vin film ilut u jong le Kapoor faction ham, Khan faction hama lut utin, ama ho thunuoi ja ikun diu, hiche tailou hi sochat na aum poije. Hausa te lung ihol diu, hausa lunglam ibol lou ule akhuo apat ei kai doh diu ahije. Hausa kidei hih jong le ei hon la isumang thei pouvin, Hausa chu dem lou di ahi maije. Hiche bang chu ahije film industry jong hi.

~ KLS

-:(19-06-2020):-

Share: