PAWL SAWM KA FAIL ZAN

~ Rev. Dr. Kh. Khaizakham

Kum 1966 ah pawl sawm (class X) result en dingin ka lawite mi thum tawh Lamka ka chiau a (Lingsiphai ah ka umlai), kinem tak kawm, lau thim kawm kawm ah chia ka hi. Zia lai ah chun result chu Imphal ah newspaper suaten result radio apat a la zik thak uh chu a hun suau ki en sek a hi. Tulai ah internet ti chu a min le um nailo a hi.

Result kisuana newspaper ka mu sun uh chu Meitei pau ah Khollao kiti kha a hia. Ka roll number chu Chura-199 a hi. Zia ka roll number umna ding dawl taka chu 190 a um a, keia chu a la um puai. Ka lawiten, Pawl sawm le pass zo lo, a sam metmui ding a hi ei tiu a, hakvana manthei lo takin sammette in ah ei sawnlut ua, sammetpan bakche le manglo in ka sam chu a getin a get nam zung zung mai a, ka luchang chu a dul liau luau mai a. In ka tunin ka nun, La pawl sawm fail sangin la sam metmui chu ka da jawi ei la tia. Ka neu apat ka sam kimet mui kha lo a hi.

Mi khatin eulau deu melpu in, a aw-phawi apat le ei musit mama a hi ti hiat thei dingin, Nang fail ziang mawh? ei hung tia. I, ka fail hi ka tia.

Nitak khua a hung thim in ka kingaitua veng veng a, ka thangtawm mama mai a. Kum kit leh nasa deu ah passed tup in lekha sim ka kipan a. Commercial Geography sim pat ka gua, ka lunglutna subject le a hia. Question khat dawnhuna ding ka lakhawm pan a, ka text book lianpi tawh note bu (Sure Pass, Sure Success kiti chi haw khah) pathum ka lakhawm a, ansawr khat ding chu ka  buaipi pan ta. A kum kit ah exam ngei ngei leng chu, zia question ka kiginna chu a hung suak ngei ngei leh Gauhati Board (Zia lai ah chun Manipur Board um nailo a hi) nuai ah examte ei pha ding um lo hial dinga ki ging ka hi. Zan sawt chan ah ka buaipi a hina chu, ka zo man pua, a zingkal in ma takin ka tho kit a, ka sunzom a.

Chutia lekha ka zik zik lai tak ah chun, U Kamzakap in lamlian apat ei hung ko a, (ka in uh chu tu ah Mangbeldam chenna mun khu a hia, insawng a hi). Ka vak dakdaw leh, La result a suak ta ei! ei hung tia. I, a suak a, ka fail hi ka ti leh, La passed vei ei tia. Assam Tribune  nitak vaigei lam ah hung tung chu a la mu hi ding a hi. Ka sammet lai kha le hi maw puana.

Ka cycle in Lamka lam ka del chu lamto le lengdok zung zungin Thingkangphai khawlai lamto haw le lamsuk batsak hialin ka tai a. Hill Town ah ka taito leh ka hotupau Pu Suonkholal Gangte chun, Khama, hung ah, thingpi hung dawn ah ei tia, Assam Tribune  copy khat chu a la et zing lai a hia. Sir, ka passed em? ka ti leh, Zie hin na roll number a um hi ei tia, ka vak et leh lamdang takin second division lakin ka la um ta mai a. Ka sam lah ka metmui zo ta! Fail ah kikawih nunga second division ah passed mai chu ginchak a haksa lelam a (Ka fail kha chu mak ka sa gu thim tho a). Sapten, too good to believe a tiu khu a hi mai hi. College ka kaina dinga passport size limlak a ngai a, lumuipa lim chu a hawi sam puai.

Tuni ah ka hun gen nop pen chu, ka passed kipakna pen hih ei pua. Ka fail-na da um tak ka dawnhu dan kha ahi. Kuama ei tilkhau le kei pua, himaleh kum 18 (zia lai a dinga chun pawlsawm exam dingin naupang mama ka hi), lunggel piting le hi nailo in zia guala ngaituana ka nei kha a hi. Tuni ah kum 60 val ta Khama hin zia ni ah kum 18 bep hi pan Khama kha a chuam in vak mu thei hi leng pakcha nuam mama ding ka hi. Ka fail chu lungngaipi ziang lo in a kum kit a dingin ka kisa pan ngal a hi. Zan khat pawlsawm fail chu ka hia, zil ding tam tak a um hi.

Lekha simna bep hilo in, damlai lamsuk lamto ah hin lawsapna chu bei puana, himaleh, kingaiselo a, bang gualin i dawnbut em ti hih a poimaw pen a hi zing hi. Ei sang ah gam cheng ah pil jaw leh a la pil masa jaw Sapte chun, Lawsapna chu lawtinna bul a hi a la tiu hih a dikna mu deu deu inla, lawsapna hih bang law ding a hem ti la hiat po leh.

Lungkiakna guam apat kinepna mualvum hung kai to dingin ka hun chial hi. Jesu ka hiatchian ma ah bawn zia guala khan lunggel ka la nei thei hi. Tulai khangthak, piangthak ta, Lal Jesu zuitute hin damlai ni etdan leh mudan khawvel mite a toh kibang lo i nei uh a ngai hi.

"Genkham hilo keima chanchin leh gensen hilo Pathian lopina" - Rev. Dr. Kh. Khaizakham

via Vaiphei Tawngsua
16 June 2020

Share: